मासिक रूपमा प्रगति विवरण बुझाउनुहाेस्ः मुख्यमन्त्री

A+ A A-

प्रदेश १ का मुख्यमन्त्री शेरधन राईले प्रदेश सरकारका मन्त्री र सचिवहरुसँग आफ्नो मन्त्रालयले गरेको कामको प्रगति मागेका छन् ।

मुख्यमन्त्री तथा मन्त्रिपरिषद्को कार्यालयमा आज आयोजित मन्त्रालयगत चौमासिक प्रगति समीक्षा बैठकमा मन्त्री तथा सचिवहरुलाई मुख्यमन्त्री राईले मासिक कामको प्रगति पेश गर्न निर्देशन दिएका हुन् । बैठकमा मुख्यमन्त्री राईले पाक्षिक रुपमा मन्त्रालयगत प्रगति समिक्षा गर्न निर्देशन समेत दिएका हुन् । ‘प्रत्येक मन्त्रालयहरुले पाक्षिक रुपमा प्रगति समिक्षा गर्नुहोस्’ मुख्यमन्त्री राईले निर्देशन दिँदै भने, ‘प्रत्येक महिना कामको प्रगति विवरण मुख्यमन्त्री कार्यालयमा यसरी नै बसेर छलफल गरौला ।’

नीति, कार्यक्रम र बजेट शिर्षकमा रहेर काम गर्नपनि मन्त्री र सचिवहरुलाई मुख्यमन्त्री राईले निर्देशन दिएका छन् । उनले असारे विकासमा ध्यान नदिन सचिवहरुलाई निर्देशन दिदै भने, ‘अरुबेला बजेट खर्च नगरेर असारमा खर्च गर्ने बानीको हामीले अन्त्य गर्नुपर्छ ।’ बलियो इच्छा शक्तिकासाथ काम गर्न मुख्यमन्त्री राईले कर्मचारीहरुलाई आग्रह गरे, कर्मचारी समायोजनलगायतका बहानामा मनस्थिति नबिगार्न उनले आग्रह गरे ।

अनुत्पादक क्षेत्रमा बजेट खर्च नगर्न निर्देशन दिँदै मुख्यमन्त्री राईले भने, ‘उत्पादनमुलक र रोजगारमुलक क्षेत्रमा बजेट खर्च गर्न म अनुरोध गर्दछु ।’ यो आर्थिक वर्षको बाँकी रहेको समय अलिकतिपनि खेर नफाल्न मुख्यमन्त्री राईले कर्मचारीहरुलाई निर्देशन समेत दिए ।

प्रगति समिक्षामा प्रमुख सचिव केदार न्यौपानेले सबै सचिवहरुलाई समन्वय गरेर काम गर्न निर्देशन दिए । चार चार महिनामा मन्त्रालयगत रुपमा समिक्षा बैठक हुुँदै आएको मुख्यमन्त्री तथा मन्त्रिपरिषद् कार्यालयका कानून सचिव भरतमणी रिजालले जानकारी दिए ।