'दुःख दिन दरबार वरिपरिका मान्छे नै लागे'

A+ A A-

राष्ट्रिय प्रजातन्त्र पार्टी (राप्रपा)का अध्यक्ष कमल थापाले आफ्नो पार्टीलाई दुःख दिन दरबार वरिपरिका मान्छे नै लागेको बताएका छन् ।

रूपन्देहीको बुटवलमा मंगलबार पत्रकारहरूसँग कुरा गर्दै अध्यक्ष थापाले राप्रपालाई कमजोर बनाउन र दुःख दिन दरबार वरिपरिका मान्छेहरू लागेको भन्दै उनीहरूले नकारात्मक सोच राख्दैमा राजा र राजसंस्थासँग पार्टीको दूरी नघट्ने बताए ।

राजसंस्था र हिन्दु राष्ट्रको पक्षमा अझै पनि जनताको आस्था र विश्वास रहेको दाबी गर्दै थापाले आउँदो चुनावबाट राप्रपा तेस्रो शक्तिको रूपमा उदाउने उद्घोष गरे । जनताले कम्युनिस्ट र कांग्रेसको विकल्पमा बलियो र भरपर्दो लोकतान्त्रिक शक्ति खोजेको थापाको भनाइ छ ।

उनले जनताले लोकतान्त्रिक शक्ति खोजेको बताउँदै कांग्रेसदेखि विप्लव नेतृत्वको नेकपासम्म सबै ‘सेन्टर लेफ्ट’ विचारधारा बोकेका दल भएको र अब राप्रपा ‘सेन्टर राइट’ पार्टी बन्ने दाबी पनि गरे ।

थापाले आउँदो चुनावलाई लक्षित गरी राप्रपाले महाधिवेशनको मिति सकिनु ९ महिना अगावै महाधिवेशन गर्न थालेको समेत बताए । आउँदो चुनावसम्म देशभर ३ लाख सक्रिय कार्यकर्ता बनाउने लक्ष्यसहित सातै प्रदेशमा सङ्गठन विस्तार अभियान चलाइएको थापाको भनाइ थियो ।

उनले पशुपतिशमसेर राणा नेतृत्वको राप्रपा संयुक्तसँग पार्टी एकता अन्तिम चरणमा पुगेको जानकारी पनि दिए । सिद्धान्त, नेतृत्वलगायतका प्रश्न मिलिसकेको र हलो अड्काउने च्याप्टरको पनि अन्त्य भएको उनले बताए । पार्टी एकताका लागि पशुपतिशमशेर जबरा र डा. प्रकाशचन्द्र लोहनीले मिति तोकेर काठमाडौं बोलाउन मात्रै बाँकी रहेको उनको भनाइ थियो ।

मिलेनियम च्यालेन्ज कर्पोरेसन (एमसीसी) नेपालको हितमा रहेको पनि उनले बताए । तर, यसबारे प्रधानमन्त्रीले संसदमा स्पष्ट जानकारी गराउनुपर्ने थापाको तर्क छ ।

केपी ओली नेतृत्वको सरकारपछि प्रचण्ड नेतृत्वको सरकारमा जानु राप्रपाको सबैभन्दा ठूलो राजनीतिक भूल भएको थापाले स्वीकार गरे ।

प्रकाशित मिति: मंगलबार, फागुन ६, २०७६ १७:२०