विराट एक्स्पाे: कृषिका फरक उत्पादनहरूमा उपभोक्ताको चासो

A+ A A-

विराटनगरमा जारी विराट एक्स्पोमा कृषिका स्टलहरूमा राखिएका फरक उत्पादनहरूमा उपभोक्ताले चासो देखाएका छन् ।

एक्स्पोमा राखिएका एबोकाडो, खरायो, अर्ग्यानिक तरकारी, चियालगायतका कृषिउपजमा उपभोक्ताको आकर्षण देखिएको छ ।

खरायो हेर्न र पाल्नका लागि जानकामरी लिन आउनेहरू धेरै रहेको उदयपुरबाट खरायोको स्टल लिएर आएका हेमन्त भण्डारीले बताए ।

‘विशेष गरी खरायो मासुका लागि पाल्ने गरिए पनि नेपालमा खरायोको मासुका फाइदाका विषयमा उपभोक्तालाई ज्ञान छैन,’ उनले भने, ‘यही कारणले खरायोलाई सौन्दर्यका लागि मात्रै पाल्ने चलन छ । तर, खरायोको मासु्मा स्वास्थ्यका हिसाबले धेरै फाइदा छ ।’

विगत एक वर्षदेखि व्यावसायिक रुपमा खरायो पाल्दै आएका भण्डारीले खरायो पालनबाट राम्रो आम्दानी गर्न सकिने सम्भावना रहेको बताए ।

खरायोमा मात्रै हाेइन, चियाका स्टलमा पनि उपभोक्ताको चासो उत्तिकै छ । विशेष गरी ग्रीन टीका विषयमा उपभोक्ताको धेरै चासो देखिएको विराटनगरका व्यवसायी समिर आचार्यले बताए ।

ग्रीन टीका थुप्रै फाइदा रहेकाले पनि उपभोक्तालाई ग्रीन टीका विषयमा जानकारी दिनु आवश्यक रहेको आचार्यले प्रस्ट्याए । एक्स्पोमा कृषिका नयाँ उत्पादन हेर्न मात्रै नभई स्वास्थ्यका लागि उपयोगी ज्ञानसमेत पाइएको उपभोक्ता शम्भु राजवंशीले बताए ।

एक्स्पोमा राखिएका कृषिजन्य उत्पादनका स्टलहरूमा उपभोक्ताको अत्यधिक चासो देखिएको प्रचार समिति संयोजक नन्दकिशोर राठीले बताए । विशेष गरी नयाँ खालका एबोकाडो, किबिलगायतका कृषिजन्य उत्पादनमा उपभोक्ताको चासो देखिएको उनको भनाइ छ ।

दर्शकको चाप र कारोबार उत्साहजनक रहेको आयोजकको भनाइ छ । फागुन १० गते शनिबारसम्म सञ्चालन हुने एक्स्पोमा अन्तर्राष्ट्रियसहित ३ सय ४० वटा स्टल राखिएका छन् ।