१० फागुनदेखि प्रदेश ५ मा प्रदेश एक्स्पो

A+ A A-

प्रदेश ५ सरकारले यस सरकारको स्थापनादेखि हालसम्मका अर्थात् २ वर्षको अवधिमा गरेका काम कारवाही एवं गतिविधि र उपलब्धिबारे जानकारी दिन प्रदेश महोत्सव (प्रदेश एक्स्पो) को आयोजना गर्ने भएको छ ।

‘समृद्ध प्रदेश, खुशी जनता’को लक्ष्य राखेको यस प्रदेशले सो उद्देश्य पूरा गर्ने उद्देश्यले दाङको बेलझुण्डीमा १० फागुनदेखि १२ गतेसम्म महोत्सवको आयोजना गर्न लागेको हो ।

यस प्रदेश महोत्सवलाई भव्यरुपमा सम्पन्न गर्न प्रदेश ५ का आन्तरिक मामिला तथा कानूनमन्त्री कुलप्रसाद केसीको संयोजकत्वमा एक मूल समारोह आयोजक समितिसमेत गठन गरी आवश्यक तयारी अघि बढाएको बताइएको छ ।

सो महोत्सवमा मुख्यमन्त्री तथा मन्त्रिपरिषद्को कार्यालय प्रदेश ५ बाट स्थापनाकालदेखि हालसम्म अर्थात् २ वर्षको अवधिमा गरेका कामको जानकारी गराउने सचिवालयले जनाएको छ ।

मुख्यमन्त्रीको कार्यालयबाट मुख्यमन्त्री ग्रामीण विकास कार्यक्रमको जानकारी गराउने, प्रदेश समन्वय परिषद्का गतिविधिबारे जानकारी दिने, सुझाव पेटिका राख्ने, प्रदेश सरकारले तयार पारेका पुस्तिका तथा पर्चा वितरण गर्ने कार्यक्रम राखिएको छ ।

आर्थिक मामिला तथा योजना मन्त्रालयबाट पनि प्रदेशअन्तर्गतका स्थानीय तहका अधिकारीका लागि वित्तीय व्यवस्थापनको परामर्श तथा तालिम सञ्चालन गर्ने, लगानी सम्मेलनको तयारीबारे जानकारी गराउने लगायतका छन् ।

आन्तरिक मामिला तथा कानून मन्त्रालयले पनि सो अवधिमा गरेका प्रगति तथा सेवा प्रवाहसम्बन्धी जानकारी गराउने, विपद्को अवस्थामा गरिने उद्धार कार्यको अभ्यास प्रदर्शन गर्ने, राहत व्यवस्थापन र वितरण प्रणालीको प्रस्तुति गर्ने, सूचना सञ्चार क्षेत्र, टेलिसेन्टर, टिभी, रेडियो र टिभीबाट मन्त्रालयले प्रसारण गरेका कार्यक्रम बारेमा जानकारी प्रदान गर्ने बताइएको छ ।

सो कार्यक्रममा प्रदेशसभा सचिवालयले प्रदेशसभामा गरिएका कार्यक्रमको प्रस्तुति, नमूना सांसदको अभ्यास तथा प्रदेशसभाको वृत्तचित्र प्रस्तुत गर्ने, विधेयक र स्मारिका वितरण गर्नेलगायतका कार्यक्रम प्रदर्शनीका क्रममा सञ्चालन गरिने मूल समारोह व्यवस्थापन तथा कार्यक्रम सञ्चालन समितिका संयोजक जीतेन्द्रमान नेपालीले जानकारी दिए । रासस

प्रकाशित मिति: आइतबार, फागुन ४, २०७६ १६:१६