उद्योगमन्त्री भट्ट सुदूरपश्चिम भ्रमणमा, सुक्खा बन्दरगाहको काम प्राथमिकतामा

उद्योगमन्त्री भट्ट सुदूरपश्चिम भ्रमणमा, सुक्खा बन्दरगाहको काम प्राथमिकतामा

A+ A A-

उद्योग वाणिज्य तथा आपूर्तिमन्त्री लेखराज भट्ट सुदूरपश्चिमका औद्योगिक तथा वाणिज्य क्षेत्रको अवलोकन गर्न सुदूरपश्चिम भ्रमणमा आएका छन् ।

मन्त्रालयका उच्च पदाधिकारीसहित यस क्षेत्रका मुख्य औद्योगिक योजनाहरूको अध्ययनका क्रममा मन्त्री टोली यहाँ आएको हो । बिहीबार धनगढी पुगेका लेखराज भट्टले गेटा विमानस्थलमा पत्रकारहरूसँग कुराकानी गर्दै यस क्षेत्रमा रहेका विशेष आर्थिक क्षेत्र, औद्योगिक क्षेत्रहरूको अवलोकन गर्न मन्त्रालयको सचिवस्तरीय टोलीसहित सुदूरपश्चिम आएको बताए ।

उनले कैलालीको हरैयामा रहेको विशेष आर्थिक क्षेत्र (सेज), कन्चनपुरको छेलामा रहेका औद्योगिक क्षेत्र, दोधारा चाँदनीमा रहेका सुक्खा बन्दरगाहलगायत क्षेत्रको स्थलगत अध्ययन गर्न मन्त्रालयको टोली लिएर आएको बताए ।

‘विशेष गरेर हामी झलारीको छेला, दोधारा चाँदनीको सुक्खा बन्दरगाहको योजनालाई कसरी छिटोभन्दा छिटो कार्यान्वय गर्न सकिन्छ भनेर अध्ययन गरिनेछ,’ मन्त्री भट्टले भने, ‘कैलालीका हरैया आर्थिक क्षेत्र र डुडेझारी औद्योगिक क्षेत्रको पनि अध्ययन गर्नेछौँ र त्यही अध्ययनका आधारमा रिपोर्ट तयार पार्नेछौँ ।’

उनले गेटा धनगढी रोडमा पनि औद्योगिक कोरिडोरको कामलाई अगाडि बढाइने बताए । गेटा (धनगढी कोरिडोरमा पनि धेरै उद्योगहरू खोलिएका छन्, काम अगाडि बढेको मन्त्री भट्टको भनाइ छ । यस्तै, उनले गेटा मेडिकल कलेजको सञ्चालन विधिका बारेमा पनि छलफल भइरहेको बताए । उनले यस क्षेत्रका जनताको आवश्यकताबमोजिम मेडिकल कलेजलाई स्वायत्त प्रतिष्ठानको रूपमा अगाडि बढाउनुपर्नेमा जोड दिए ।

भ्रमणका क्रममा यस क्षेत्रका औद्योगिक क्षेत्रको विकासका लागि यस क्षेत्रका उद्योग व्यवसायी, स्थानिय निकायका जनप्रतिनिधि सबैसँग छलफल र अन्तक्र्रिया गर्ने र त्यसको निचोडअनुसार नै अगाडि बढ्ने उनको भनाइ छ ।

मन्त्री भट्टले एक फरक प्रसंगमा एमसीसी संसदबाट जसरी पनि पास हुने बताए । उनले भने, ‘पार्टीभित्र कुनै पनि विषयमा छलफल बहस हुनु नौलो कुरो होइन, एमसीसीको विषयमा अध्ययन गर्न पार्टीले कार्यदल बनाएको छ, त्यसैले त्यो कार्यदलको सुझावअनुसार नै पार्टी अगाडि बढ्नेछ ।

प्रकाशित मिति: बिहीबार, माघ २३, २०७६ १९:०९