आजदेखि साफ महिला च्याम्पियनसीप फुटवल प्रतियोगिता हुँदै

प्रतियोगिताको ट्रफी सोमबार सार्वजनिक गर्दै टीमका कप्तानहरु ।

A+ A A-

मंगलबारदेखि विराटनगरमा पाँचौं संस्करणको साफ महिला च्याम्पियनसीप फुटबल प्रतियोगिता सुरु हुँदैछ । अन्तर्राष्ट्रिय फुटवल प्रतियोगिता मोफसलमा हुन लागेको यो पहिलो पटक हो । प्रतियोगिताको ट्रफी सोमबार सार्वजनिक गरिएको थियो ।

विराटनगरमा अखिल नेपाल फुटबल संघ (एन्फा) द्वारा आयोजित प्रिम्याच प्रेस कन्फरेन्समा ट्रफी सार्वजनिक गरिएको हो। प्रतियोगितामा नेपाल, भारत, भुटान, बंगलादेश, श्रीलंका र मालदिभ्स सहभागि छन् ।

प्रेस कन्फरेन्समा सबै देशका प्रशिक्षक र टिमका कप्तानहरुले उच्च मनोबलका साथ प्रतियोगितामा सहभागिता जनाइएको बताए। महिला साफमा अहिलेसम्मकै शक्तिशाली मानिएको भारतले पनि उपाधि रक्षा गर्ने हिवासमा आफ्नो तयारी रहेको जनाएको छ।

प्रतियोगिताको उद्धघाटन पूर्वप्रधानमन्त्री एवं नेकपाका अध्यक्ष पुष्पकमल दाहाल ‘प्रचण्ड’ ले गर्ने गर्ने तय भएको छ। उद्घाटन खेलमा आयोजक राष्ट्र नेपाल र भुटानबीच प्रतिस्पर्धा हुनेछ। अखिल नेपाल फुटबल संघ एन्फाका प्रवक्ता एवं केन्द्रीय सदस्य किरण राईले प्रतियोगिता आयोजना गर्न विराटनगर तयार भएको जानकारी दिए। उनले प्रतियोगितामा भाग लिने छ वटै मुलुकका खेलाडी टिम विराटनगरमा आइसकेको बताए। यसको अनुमानित खर्च एक करोड ६५ लाख रुपैयाँ रहेको जनाएको छ।

एन्फाले दर्शकको सुविधाका लागि पानीको बोतल बाहेक हेल्मेट, छाता, डन्डालगायत अन्य केही वस्तु मैदानभित्र लैजान निषेध गरेको छ। प्रतियोगिताको लिग चरणका खेलका लागि एन्फाले ३ सय र २ सय दरका टिकट बिक्री गर्नेछ। विराटनगरमा पहिलो पटक अन्तर्राष्ट्रिय खेलाडीको आगमनसँगै सुरक्षा व्यवस्था कडा पारिएको मोरङ प्रहरी प्रमुख एसपी मनोजकुमार केसीले बताए।

उनका अनुसार सडक, प्रतियोगिता आयोजना स्थल, खेलाडीले अभ्यास गर्ने स्थान, खेलाडी आवतजावत गर्ने रुट, सार्वजनिक स्थल, खेलाडी तथा अफिसियल बस्ने होटलहरुमा सुरक्षाकर्मीको उपस्थिती बाक्लो बनाइएको छ।

निरु थापाको कप्तानीमा रहेको नेपाली महिला टोलीले मोफसलको घरेलु मैदानमा पहिलो पटक अन्तर्राष्ट्रिय प्रतियोगिता खेल्दै छ। पछिल्लो समय नेपाली महिला टोलीले सफलता हात पार्ने क्रम बढ्दै गएको छ। दक्षिण एशियाली राष्ट्रमध्ये शक्तिशाली राष्ट्र छिमेकी मुलुक भारतलाई उसैको भूमिमा धेरै समयपछि पराजित गर्दा नेपाली टोलीको मनोबलको मनोवल उच्च बनेको छ। नेपालले समूह चरणमा भिड्ने भुटान र बंगलादेशसँग पछिल्लो समय ५ खेलमा हारको सामना गर्नुपरेको छैन।

पछिल्लो पाँच खेलमा बंगलादेशसँग चार खेलमा जित र एकमा बराबरीको अवस्था रहेको छ भने भुटानविरुद्ध पछिल्लो पाँच खेलमा जितको मीठो अनुभव नेपाली टोलीसँग रहेको र यस प्रतियोगिताका लागि उच्च तयारी गरिएको नेपाली टिमका मुख्य प्रशिक्षक हरि खड्काले बताए।

प्रकाशित मिति: मंगलबार, फागुन २८, २०७५ १८:०४