कृषि विकास बैंकले ल्यायो अहिलेसम्मकै उच्च ब्याजदरकाे ऋणपत्र

A+ A A-

कृषि विकास बैंक (एडीबीएल)ले अहिलेसम्मकै उच्च ब्याजदरसहितको ७ वर्षे ऋणपत्र निष्कासन गरेको छ । बैंकले अर्धवार्षिक रूपमा १० दशमलव ३५ प्रतिशत ब्याजदर दिने गरी परिपक्व भएको ७ वर्षे ऋणपत्र आजदेखि निष्कासन गरेको हो । १ हजार अंकित दरका २५ लाख कित्ता अर्थात् २ अर्ब ५० करोड रुपैयाँबराबरको ऋणपत्र निष्कासन गरिएको बैंकका कामु विभागीय प्रमुख अजयकुमार रिमालले जानकारी दिए ।

बैंकले दिन लागेको यो ब्याज अन्य बैंकको तुलनामा बढी हो । अरु बैंकले १० दशमलव २५ प्रतिशत मात्र ब्याज प्रदान गरिरहेका छन् । एडीबीएलले ७ वर्षे डिवेन्चरमा १० दशमलव ३५ प्रतिशत दिने भएकाले यो अहिलेसम्मकै बढी ब्याज हो ।

सुरक्षित भविष्य एवं समृद्धिको यात्रामा ढिलो नगरौं, कृषि बैंकको ऋणपत्र (डिवेन्चर) आजै खरिद गरौं भन्ने नारासहित एडीबीएलले जारी गरेको ऋणपत्र आगामी २०८३ सालमा परिपक्व हुनेछ । ऋणपत्र खरिदका लागि छिटोमा १७ माघ र ढिलोमा १४ फागुनसम्म आवेदन दिन सकिने बैंकले जनाएको छ ।

५३औं वर्षमा कृषि विकास बैंक : साना किसानमा लगानी बढाउने वाचा

२५ लाखमध्ये १५ लाख कित्ता ऋणपत्र व्यक्तिगत तबरबाट खुल्ला गरिनेछ भने १० लाख कित्ता सर्वसाधारणमा सार्वजनिक निष्कासनको माध्यमबाट बिक्री हुनेछ ।

ऋणपत्रमा सर्वसाधारणले न्यूनतम २५ कित्ता र अधिकतम २ लाख ५० हजार कित्तासम्मका लागि आवेदन गर्न पाउने बैंकका कामु विभागीय प्रमुख रिमालले जानकारी दिए । उनका अनुसार नेपाल धितोपत्र बोर्डबाट आस्बा सदस्यता लिएका बैंक तथा वित्तीय संस्था तथा मेरो सेयर सफ्टवेयरमार्फत पनि ऋणपत्रका लागि आवेदन दिन सकिनेछ ।

ऋणपत्र नेप्सेमा सूचीकरण हुनुका साथै यसमा विभिन्न बैंक तथा वित्तीय संस्थाहरूबाट धितो राखी कर्जासमेत लिन सकिने व्यवस्था रहेकाे रिमालले बताए ।

ऋणपत्रलाई इक्रा नेपालले न्यून कर्जा जोखिम जनाउने ‘इक्राएनपी एलए’ रेटिङ प्रदान गरेको छ । ऋणपत्रकाे निष्कासन तथा बिक्री प्रबन्धकमा एनआईबीएल एस क्यापिटल लिमिटेड रहेको बैंकले जनाएकाे छ ।

स्थापनाको ५३औं वर्षमा प्रवेश गरेको एडीबीएल बैंक लिन मात्रै होइन, दिन पनि जान्दछ भन्ने नारासहित अघि बढेको छ ।

बैंकले लिन मात्रै होइन, दिन पनि जान्दछ

के हो ऋणपत्र ?

कुल ऋण पुँजीलाई सर्वसाधारणले खरिद गर्न सक्ने गरी स–साना इकाइमा विभाजन गरिएको अंश वा इकाइलाई ऋणपत्र भनिन्छ । अथवा, कम्पनीले ऋणमा लगानी गर्ने पक्षलाई ऋणको रकम, ब्याजदर र भुक्तानी विधिका सर्तहरू उल्लेख गरी आधिकारिक रूपमा गरिदिएको लिखित पत्र नै ऋणपत्र हो ।

प्रकाशित मिति: मंगलबार, माघ १४, २०७६ १७:५३