५३औं वर्षमा कृषि विकास बैंक : साना किसानमा लगानी बढाउने वाचा

A+ A A-

कृषि विकास बैंकले एक वर्षमा साढे ५ अर्ब रुपैयाँभन्दा बढी सहूलियतपूर्ण कृषि अनुदानमा लगानी गरेको छ । ‘कृषिलाई नछोड्ने, अरुलाई जोड्ने’ नीतिसहित अघि बढेको बैंकले गएको एक वर्षमा सहुलियतपूर्ण कृषि अनुदान कर्जामा ५ अर्ब ५८ करोड रुपैयाँ लगानी गरेको हो । स्थापनाको ५३औं वर्षमा प्रवेश गरेको अवसरमा अहिलेसम्मको प्रगति र आगामी योजनाबारे जानकारी दिन आइतबार काठमाडौंमा आयोजित पत्रकार भेटघाटमा प्रमुख कार्यकारी अधिकृत (सीईओ) अनिलकुमार उपाध्यायले यस्तो कर्जाबाट २५ सयभन्दा बढी सर्वसाधारण लाभान्वित भएको बताए ।

उनले कृषिक्षेत्रमा बैंकको लगानी ४४ प्रतिशत रहेको जानकारी पनि गराए । ‘आगामी दिनमा पनि कृषि क्षेत्रमा बैंकको लगानी बढाउँदै लैजाने योजना छ,’ उनले भने, ‘ग्रामीण तथा कृषि क्षेत्रको विकासका लागि सरल र सुलभ कृषि कर्जामा बैंक केन्द्रित छ,’ उनले भने ।

उपाध्यायले कृषि विकास बैंकको पाँच दशक लामो इतिहासलाई ग्रामीण क्षेत्र रुपान्तरणको प्रमुख यन्त्रका रूपमा हेर्न सकिने दाबी गरे ।बैंकले साना किसान विकास आयोजनामार्फत सामूहिक प्रणालीमा आवद्ध हुने, शैक्षिक एवं स्वास्थ्य कार्यक्रम, बचत परिचालन र सामूहिक जमानीमा कर्जा कारोबार, उक्त आयोजना समूहलाई नै सञ्चालन गर्ने क्षमता अभिवृद्धि गर्दै सहकारीमा रुपान्तरण गरी सुदृढ बनाउने प्रयास गर्दै आएको उनले बताए ।

कृषि विकास बैंक अब सवल र सक्षम वाणिज्य बैंकका रूपमा स्थापित भएको सीईओ उपाध्यायको भनाइ छ । ‘२७ वाणिज्य बैंकमध्ये हाम्रो स्थान चौथो वा पाँचौं नम्बरमा होला तर आर्थिक समृद्धिको अभियानमा योगदान गर्ने र कृषकको विश्वास जित्नेमा हामी पहिलो हौं,’ उपाध्यायले भने ।

उनका अनुसार बैंकले यो वर्ष समयमै वार्षिक साधारणसभा सम्पन्न गरी सेयरधनीहरूलाई ३० प्रतिशतको आकर्षक मुनाफासमेत वितरण गरेको छ ।

लामो समयसम्म आइटीको समस्या झेलेको बैंकमा अब यस्तो समस्या नरहेको उनले बताए । ‘आईटीको समस्या हामीले पूर्ण रूपमा समाधान गरिसकेका छौं,’ उनले भने, ‘साइबर चुनौतीको सामना गर्न हामीले विशेष सयन्त्र नै बनाएर काम गरिरहेका छौं ।’