एमसीसी संसदबाट पारित हुन्छ : मन्त्री गुरुङ्ग

A+ A A-

संघीय सरकारका महिला, बालबालिका तथा जेष्ठ नागरिक मन्त्री पार्वत गुरुङ्गले अमेरिकी मिलेनियम च्यालेन्ज कर्पोरेसन (एमसीसी) संसदबाट पारित हुने बताएका छन् ।

छाउपडी प्रथाको अवस्था अनुगमनका लागि सुदूरपश्चिमको भ्रमणमा रहेका मन्त्री गुरुङले आइतबार डोटीमा सञ्चारकर्मीसँग कुरा गर्दै यस्तो बताएका हुन् ।

‘यो विषयले संसदमा प्रवेश पाएपछि बहस, छलफल हुन्छ । मलाई लाग्छ संसदले सहजै अनुमोदन गर्छ,’उनले भने, ‘एमसीसीका बिषयमा बहस हुनु राम्रो भएको तर अनावश्यक विवाद गर्नु उचित छैन् ।’

नेकपाभित्रैबाट एमसीसीको विरोध भइरहेको छ नि ? भन्ने प्रश्नमा उनले भने, ‘एमसीसी नेपालको हितमा भएकाले यसको विरोध गर्नु गलत हो । अरुले किन विरोध गरिरहनु भएको छ मलाई थाहा छैन् । विरोधीहरुलाई नै सोध्नुहोस् ?’

बालसुधार गृहको स्तरोन्नति हुन्छ

साविकको महिला विकास कार्यालयको भवनमा सञ्चालित बाल सुधार गृहको अनुमगन पश्चात मन्त्री गुरुङ्गले बालसुधार गृहको स्तरोन्नति गर्ने बताए । बाल सुधार गृहको अनुगमन गर्दै छिट्टै बालसुधार गृहको स्तरोन्नति गर्ने उनको भनाइ छ ।

‘यो भवन बाल सुधार गृहका लागि बनेको भवन होइन्, बाल सुधार गृहका लागि जग्गा प्राप्त गरी नयाँ संरचना निर्माण गरिनेछ,’ उनले भने, ‘संरचना अभावका कारण बालसुधार गृहमा रहेका बालबालिकाहरुकालाई आधारभूत आवश्यकता परिपूर्ति गर्न समस्या भएको छ ।’

सुदूरपश्चिम प्रदेशमा रहेको एक मात्र बालसुधार गृह भएकाले यसको स्तरोन्नति गर्न आवश्यक देखिन्छ । २५ जना क्षमता भएको बालसुधार गृहमा हाल ४७ जना राखिएको छ । छाउपडी प्रथाको अनुगमन गर्नका लागि मन्त्रीको टोली अछाम जिल्ला प्रस्थान गरेको छ ।

प्रकाशित मिति: आइतबार, माघ ५, २०७६ १३:३६