मन्त्रीको गृहजिल्लाबाट सुरु भयो खरको छानो विस्थापन अभियान

A+ A A-

भूमि व्यवस्था, सहकारी तथा गरिबी निवारणमन्त्री पद्माकुमारी अर्यालले सुरक्षित जनता आवास निर्माणका लागि सरकार देशभरका खरका छाना विस्थापित गर्ने अभियानमा लागेको बताएकी छन् ।

खरको छाना विस्थापित गर्ने अभियानअन्तर्गत स्याङ्जाको वालिङमा खरका छाना भएका जनतालाई चेक हस्तान्तरण गर्दै मन्त्री अर्यालले सरकारको प्रमुख मुद्दा गरिबी निवारण भएको बताइन् ।

‘सरकार सन् २०३० सम्म नेपालमा गरिबी निर्मूल पार्ने अभियानमा लागेको छ । त्यसैको सुरूवात सुरक्षित जनता आवासका लागि पहिलो किस्ताका ३० हजारको चेक हस्तान्तरण गरेका हौं,’ अर्यालले भनिन् ।

जनताको जीवनको सुरक्षाका लागि सरकारले उक्त कार्यक्रम ल्याएको भन्दै मन्त्री अर्यालको नेपालमा १८ प्रतिशत गरिबी रहेको र त्यसको निर्मूल पारिने बताइन् ।

खरकाे छानामा छिटो आगलागी हुने भन्दै यस आर्थिक वर्षमा २ सय ५० घरपरिवारका खरका छाना विस्थापन गरिने मन्त्री अर्यालले बताइन् ।

स्याङ्जा– २ का वालिङ, गल्याङ, चापाकोट, भीरकोट नगरपालिका र कालीगण्डकी गाउँपालिका गरी पाँचवटा स्थानीय तहका २ सय ५० खरका छाना हटाइने र त्यसका लागि ५० हजारका दरले दुई किस्ता गरी रकम दिइने उनकाे भनाइ छ । बाँकी रहेका खरका छानाको लगत संकलन गरी पुन: यसरी नै खरका छाना हटाइने मन्त्री अर्यालले बताइन् । उनले आफ्नो निर्वाचन क्षेत्रमा यस वर्षभित्रै २ सय ५० घरपरिवारमा टिनका छाना लगाउने अभियानको थालनी गरेकी हुन् ।

प्रकाशित मिति: आइतबार, पुस २०, २०७६ १६:३०