फ्रिज बिग्रिदा एक सय बालबालिकाले खोप पाएनन्

A+ A A-

बाजुराको पूर्वोत्तर चार वटा स्थानीय तहका बालबालिकालाई खोप दिन कोल्टी प्राथमिक स्वास्थ्य केन्द्रमा राखिएको फ्रिज बिग्रदा खोप सेवा प्रभावित भएको छ ।

पुस पहिलो साता सञ्चालन भएको खोप सेवाबाट तीन स्थानीय तहमा खोप सञ्चालन भए पनि हिमाली गाउँपालिकामा भने खोप सेवा सुरु नै हुन सकेन ।

‘हाम्रोमा भ्याक्सिन राख्ने फ्रिजले आइस बनाउन सकेको छैन, अब भ्याक्सिन सुरक्षित हुँदैन यो नबनाउँदासम्म खोप सेवा सञ्चालन गर्न सकिदैन’ कोल्टी प्राथमिक स्वास्थ्य केन्द्रका निमित्त प्रमुख ओमजंग शाहीले भने, ‘हामीले बिग्रेको कुरा जिल्लामा खबर गरेका छौं । यो केन्द्रीय मेडिकल स्टोर प्राबिधिक आएर मात्र बन्छ ।’

यस क्षेत्रमा हरेक वर्ष कुनै न कुनै समस्याका कारण बालबालिका खोपसेवाबाट बञ्चित हुँदै आएका छन् । यसवर्ष पनि पुरानै रोग दोहरिएको हो । जिल्लाको दुर्गम हिमाली गाउँपालिकामा खोप सेवा सुरु गर्न नपाउँदै फ्रिज बिग्रेको हो ।

हिमाली गाउँपालिका स्वास्थ्य शाखा प्रमुख राजबहादुर भण्डारीले भने, ‘खोप भण्डारण गर्न आवश्यक फ्रिज चलाउन सक्ने विद्युतीय स्रोत नभएको र बाजुरा जिल्लाका साविकको उत्तरी क्षेत्रमा रहेका साबिका ११ गाउँ विकास समितिका लागि भ्याक्सिन कोल्टी प्राथमिक केन्द्रमा स्टोर गर्ने गरेको र नियमित खोप सेवा सञ्चाल गर्दा भ्याक्सिन क्यारियरबाट ढुवानी गर्ने गरेका थियौं । तर हाल कोल्टी प्राथमिक स्वास्थ्य केन्द्रमा भएको भ्याक्सिन स्टोरेज गर्ने फ्रिज बिग्रिएकाले यस्तो समस्या आएको हो ।’

उनले यो महिना खोप लगाउन छुटेका सबै बालबालिकालाई अर्को महिनाको खोप क्लिनिक सञ्चालन गर्दा खोप सेवा दिने व्यवस्था मिलाउने जानकारी दिए ।

भ्याक्सिन स्टोरेज गर्न २४ सै घन्टा कोल्डचेन मेन्टेन गर्नु पर्ने हुन्छ । यसका लागि २५ डिग्रीसम्मको तापक्रम कायम राख्न सक्ने क्षमताको रेफ्रेजेनेटर र सोही अनुसारको विद्युत अथवा सोलार पावर आवस्यक हुन्छ । यसका लागि स्थानीय तहसँग स्रोत नभएको र प्रदेश तथा संघीय सरकारसँग सहयोग माग्ने चासो समेत नदेखाउँदा समस्या आएको हो ।

प्रकाशित मिति: मंगलबार, पुस १५, २०७६ ०९:२०