‘त्याे टाइम बम थियाे’

A+ A A-

टाइमर प्रयोग गरी धनुषाको क्षिरेश्वरनाथ नगरपालिका– ५, महेन्द्रनगरमा प्रेसर कुकर बम विस्फोट गराइएको दाबी सुरक्षा निकाय र प्रशासनका अधिकारीहरूले गरेका छन् ।

आपराधिक समूहले प्रेसर कुकर बममा रिमोट कन्ट्रोलसहितको सामग्री प्रयोग गरेर सुनियोजित तरिकाले विस्फोट गराएको दाबी धनुषाका प्रमुख जिल्ला अधिकारी प्रदीपराज कँडेलले गरेका हुन् । बम विस्फोटनबारे अनुसन्धान गरिरहेका संघीय प्रहरी इकाई कार्यालय जनकपुरधामका एसएसपी राजेन्द्र चौधरीले पनि टाइम बम विस्फोट गराइएको बताए ।

‘शक्तिशाली टाइम बम प्रयोग गरेर घटना गराइएको हो,’ एसएसपी चौधरीले भने, ‘तर त्यसमा रिमोट प्रयोग गरिएको छ वा छैन, त्यसको गम्भीरतापूर्वक अनुसन्धान भइरहेको छ ।’

‘म आफैं पनि घटनास्थलमा पुगेको थिएँ, सुरक्षा निकायले गरेको प्रारम्भिक अनुसन्धानबाट प्रेसर कुकर बममा टाइमर फिट गरेर विस्फोट गराएको भन्ने निष्कर्ष निस्किएको जानकारी पाएको छु,’ सीडीओ कँडेलले भने, ‘नेपाली सेनाका सुरक्षा विज्ञसहितको अनुसन्धान टोलीको प्रतिवेदन आएपछि मात्र त्यसले आधिकारिकता पाऊला तर हालसम्मको निष्कर्षमा हामी प्रेसर कुकर बममा टाइमर नै फिट गरेर सुनियोजित तरिकाले विस्फोट गराइएको भन्नेमा पुगेका छौं ।’

विस्फोटक पदार्थको जाँच गर्दा प्रेसर कुकर बममा फलामका किलाहरू, साबुन आदिजस्तो सामग्री प्रयोग गर्नुका साथै मोबाइलका डीभाइस तथा प्लेटहरूसमेत पाइएको जिल्ला प्रहरी कार्यालय धनुषाका प्रहरी नायब उपरीक्षक रामेश्वर कार्कीले जानकारी दिए ।

धातुका टुक्राहरू तथा टाइमरमा प्रयोग हुने विभिन्न किसिमका सर्किट, प्लेट तथा डिभाइसहरू घटनास्थलबाट बरामद गरिएको धनुषाका प्रहरी प्रवक्तासमेत रहेका डीएसपी कार्कीले जानकारी दिए ।

साबुनले गति तीव्र बनाउने, फलामका टुक्राले छर्राको काम गर्ने भएकाले उक्त विस्फोटन अत्यधिक शक्तिशाली भएको सुरक्षा अधिकारीहरूको निष्कर्ष छ । त्यसमा पनि फलामको ग्रिलमा नै विस्फोटन भएका कारण विस्फोटपछि ग्रिलका टुक्राहरू समेत थप छर्राको रूपमा परिणत भएका थिए ।

घटनास्थलबाट पड्केको बमको टुक्रा र अवशेष संकलन गरेर अनुसन्धान थालिएको नेपाली सेनाले जनाएको छ ।

घटना कसले गराएको भन्ने अन्योल कायमै

बम विस्फोटन घटना कसले गराएको भन्नेमा अझै सुरक्षा अधिकारी अन्योलमै छन् ।

घटना भएको दुई दिन भइसकेको छ र प्रहरी अहिले पनि अनुसन्धानमै छ । प्रहरीका अनुसन्धान अधिकारीहरूका अनुसार औषधि व्यवसायी राजेश साहसँग व्यक्तिगत रिसइवी वा नेत्रविक्रम चन्द नेतृत्वका ‘विप्लव’ नेतृत्वको नेपाल कम्युनिस्ट पार्टीको संलग्नता भन्ने दुवै आशंकामा अनुसन्धान भइरहेको छ ।

प्रहरीले शनिबार दिउँसो घटनामा संलग्न रहेको आरोपमा तीन जनालाई पक्राउ गरेको छ । प्रहरीका अनुसार उनीहरू विप्लव समूहका स्थानीय नेता हुन् ।

पक्राउ पर्नेमा हंसपुर नगरपालिका–२ की ललितादेवी महरा, सीतादेवी महरा र मिथिला बिहारी नगरपालिका–१, भुतहीका रामशोभित धानुक रहेका छन् ।

५१ वर्षीया सीतादेवी महरा विप्लव समूह प्रदेश २ की संयोजक हुन् भने ४१ वर्षीया ललिता केन्द्रीय सदस्य हुन् । प्रहरीका अनुसार रामशोभित भने कार्यकर्ता मात्र हुन् । धनुषाका प्रहरी नायव उपरीक्षक रामेश्वर कार्कीका अनुसार उनीहरूलाई घेरा हालेर पक्राउ गरिएको हो । अहिलेसम्म घटनाको कसैले जिम्मा लिएको छैन ।

प्रहरी निरीक्षकको असावधानी नभएको दाबी

बम विस्फोटनको घटनामा परेर मृत्यु भएका इलाका प्रहरी कार्यालय महेन्द्रनगरका प्रहरी निरीक्षक अमिरकुमार दाहालको असावधानी भयो भनेर आएको कुरा गलत रहेको प्रहरी निरीक्षक कार्कीले बताए ।

घाइते भएका भिखारी साह वा त्यहाँ रहेका अन्य प्रत्यक्षदर्शीलाई त्यसो लागेको हुन सक्ने भए पनि उक्त घटनामा प्रहरी निरीक्षक दाहालले अत्यन्तै सावधानी अपनाएको देखिएको जिकिर उनले गरे । मृतक राजेश साहका बुबा भिखारी साहले प्रादेशिक अस्पताल जनकपुरधामको शय्याबाट सम्झिँदै भनेका छन, ‘ढोकामा झुण्डिएको रातो झोला देखाउँदै प्रहरी निरीक्षक दाहालले केही पनि होइन भन्नुभयो । प्रहरी निरीक्षक दाहालले यसो भनेको केही सेकेण्डमै ठूलो आवाजसहित बम विस्फोट भयो ।’

‘छोरा राजेश, नाति आनन्द र प्रहरी निरीक्षक दाहाल नजिकै हुनुहुन्थ्यो । हामी केही पर थियौं,’ भिखारीले भने, ‘ठूलो आवाज आउनासाथ म बेहोस भएर भुइँमा लडें, त्यसपछि के भयो, मलाई थाहा छैन,’ साहले भने ।

‘उनले (स्वर्गीय प्रहरी निरीक्षक दाहालले) त्यति सावधानी नअपनाएको भए थप संख्यामा मानवीय क्षति हुन सक्ने थियो,’ प्रहरी नायव उपरीक्षक कार्कीले भने, ‘उहाँले तत्काल भीडलाई हटाएर थप संख्यामा मानवीय क्षति हुन नदिएको देखिन्छ ।’

घरधनी राजेश साहको घरमा दुईवटा गेट छन् । एउटा मूल गेट र भित्रैबाट घरमा पस्ने अर्को गेट । राति १२ बजे जब घरको मूल गेटमा केही शंकास्पद वस्तु राखिएको छ भन्ने कुरा राजेशले थाहा पाए, त्यो देख्नेबित्तिकै अर्कै गेटबाट परिवारका सदस्यहरू बाहिर निस्किएका रहेछन् । प्रहरीमा खबर पुग्नेबित्तिकै प्रहरी निरीक्षक दाहालले जिल्ला प्रहरी कार्यालयमा कार्कीलाई खबर गरेका थिए ।

‘खबर पाएपछि मैले अहिले नै नेपाली सेनाको डिस्पोजल टोलीलाई खबर गर, अहिले नै आउनुभयो भने अहिले नै डिस्पोज गराउने, नभए बिहानै आएपछि डिस्पोज गराउने भनेर निर्देशन दिएको थिएँ,’ कार्कीले भने, ‘त्यतिञ्जेल भीडलाई कार्टेल गरेर साइडमा राख्ने काम गर भनेर निर्देशन दिएको थिएँ ।’

प्रहरी निरीक्षक दाहालले नेपाली सेनाको टोलीलाई पनि खबर गरेका थिए । उनी एकातर्फ नेपाली सेनाको टोलीको पर्खाइमा थिए भने अर्कोतर्फ त्यहाँ जम्मा भएको भीडलाई शंकास्पद् वस्तु भएको स्थानबाट पर राख्ने काम गरिरहेकै बेला अचानक बम विस्फोट भएको थियो ।

‘इन्स्पेक्टर दाहाल बम राखिएको स्थानबाट ४ मिटरजति परै रहेर भीडलाई साइड लगाइरहेकै बेला अचानक बम बिस्फोट हुन गयो,’ डीएसपी कार्कीले भने, ‘न त बमलाई उहाँले छुनुभएको थियो, न त चलाउनु नै भएको थियो ।’

घरका सदस्यले नै गेट खोल्ने क्रममा गेटमा झुन्ड्याएर राखिएको रातो झोला हल्लिएर सेट गरिएको टाइमर सञ्चालन भई टाइम पुगेको समयमा विस्फोट भएको निष्कर्ष केही सुरक्षाकर्मीको छ ।

घरका सदस्यले पनि त्यो झोलाको सामान छोएका थिएनन्, न त चलाएका नै थिए । इन्स्पेक्टर दाहालले आफूखुशी गरेका थिएनन्, बम छोएका पनि थिएनन्, उनले बरू थप मानवीय क्षति हुन नदिन सफल भएको तथा कर्तव्यपालनको सिलसिलामा ज्यान गुमाएको डीएसपी कार्की बताउँछन् ।

धनुषाको क्षिरेश्वरनाथ नगरपालिका–५ मा स्थानीय राजेश साहको घरमा उक्त घटना भएको थियो । शुक्रबार राति १२ बजेतिर भएको विस्फोटनमा परेर प्रहरी निरीक्षक दाहालसहित स्थानीय राजेश साह र उनका छोरा आनन्द साहको मृत्यु भएको थियो भने अन्य चार जना घाइते भएका छन् ।

घाइतेहरूको धरानस्थित बीपी कोइराला स्वास्थ्य विज्ञान प्रतिष्ठानमा उपचार भइरहेको छ । धनुषाका प्रमुख जिल्ला अधिकारी कँडेलका अनुसार घाइतेहरूको स्वास्थ्य अवस्थामा क्रमिक रूपले सुधार हुँदै गएको छ ।

प्रकाशित मिति: आइतबार, मंसिर २९, २०७६ १६:३१