महोत्तरीमा दुईवटा पोखरी सौन्दर्यीकरणको शिलान्यास

A+ A A-

मुख्य मन्त्री स्वच्छता अभियानअन्तर्गत महोत्तरीमा दुईवटा पोखरी सौन्दर्यीकरणको शिलान्यास सम्पन्न भएको छ ।

प्रदेश २ का मुख्य मन्त्री लालबाबु राउतले महोत्तरीको महोत्तरी गाउँपालिका– ३, मडैस्थित ब्रह्मबाबा पोखरी र जलेश्वर नगरपालिका– ४, सुगास्थित सुकदेव सरमा सौन्दर्यीकरणको शिलान्यास गरेका छन् ।

मडैमा आयोजित शिलान्यास कार्यक्रममा मुख्य मन्त्रीका साथै प्रतिनिधिसभा सदस्य एवं राजपा नेपालका अध्यक्ष मण्डलका सदस्य शरतसिंह भण्डारी, प्रदेश सभा सदस्य सुरिता साह, सिंघासन साह कलवार, मुख्य न्यायधिवक्ता दिपेन्द्र झा, पूर्वकृषिमन्त्री हरिनारायण यादवसमेतकाे उपस्थिति थियो ।

सो कार्यक्रमलाई सम्बोधन गर्दै मुख्य मन्त्री राउतले प्रदेश सरकारले सामाजिक रुपान्तरणका लागि सुरु गरेको स्वच्छता अभियान र ‘बेटी पढाऊँ बेटी बचाऊँ’ कार्यक्रममा जनसहभागिताका लागि सबै वर्गलाई आग्रह गरे ।

उनले प्रदेश सरकारले ल्याएका योजनाहरूमा सबै पक्ष वर्गले सहभागिता नजनाएसम्म सफलता पाउन नसक्ने उल्लेख गर्दै आ–आफनो स्थानबाट सबैलाई सहयोग गर्न आग्रह गरे ।

मडैमा शिलान्यास गरिएको पोखरी सौन्दर्यीकरणमा प्रदेश सरकाले ४ करोड १७ लाखको लागतमा एक वर्षभित्र पोखरीमा घाट निर्माण, सभागृहको निर्माण, क्यान्टिन, शुलभ शौचालय निर्माण गर्ने भएकाे छ ।

पोखरीको शिलान्यासपछि मुख्य मन्त्री राउतले प्रदेश सरकारको लगानीमा मडैमा निर्माण गरिएको द्वारको उद्घाटनसमेत गरे । त्यसपछि जलेश्वर नगरपालिका–४, सुगास्थित सुकदेव सरको सौन्दर्यीकरणको शिलान्याससमेत गरिएको छ ।

१ करोड ६७ लाखको लागतमा हुन लागेको सौन्दर्यीकरणको शिलान्यास मुख्य मन्त्री राउतका साथै प्रदेश नं. २ का पूर्वप्रदेश प्रमुख रत्नेश्वरलाल कायस्थले संयुक्त रूपमा गर्नुभएको छ ।

सो कार्यक्रममा मुख्य मन्त्री राउतले मधेश आन्दोलनको बलमा गठन भएको प्रदेश सरकार आन्दोलनको भावनालाई कदर गर्दै आन्दोलनमा उठेका मांगहरू क्रमशः सम्बोधन गर्न प्रतिवद्ध रहेको बताए ।

उनले प्रदेश सरकारले पछिल्लो समयमा चालेका कदमहरू दलित सशक्तिकरण ऐन, महिलालाई ५० प्रतिशतको आरक्षण, अन्य जातीय समुदायलाई संख्याका आधारमा आरक्षणजस्ता कार्यक्रमहरू ट्रेलर मात्र रहेको र यसकाे परिणाम आउने १० वर्षमा देखिने उल्लेख गरे ।

कार्यक्रममा प्रथम प्रदेश प्रमुख रत्नेश्वरलाल कायस्थ, पूर्वकृषिमन्त्री हरिनारायण यादव, प्रदेश सभा सदस्य रामअशिष यादव, सिंघासन साह कलवार, मुख्य न्याधिवक्ता दिपेन्द्र झा, नीति आयोगका उपाध्यक्ष डा. भोगेन्द्र झा, प्रमुख सचिव रामकृष्ण सुवेदी, जलेश्वर नगरपालिकाका प्रमुख रामशंकर मिश्र, मटिहानी नगरपालिकाका प्रमुख हरिमण्डलसहितको सहभागिता थियो ।

प्रकाशित मिति: आइतबार, मंसिर २९, २०७६ ०९:०८