कर्णालीका मन्त्री र सचिवले तीन महिना बिदा नपाउने

A+ A A-

कर्णाली प्रदेशका विषयगत मन्त्रालयका मन्त्री तथा सचिवले अबको ३ महिना कतै पनि जान नपाउने भएका छन् । कर्णाली प्रदेशका मुख्य मन्त्री महेन्द्रबहादुर शाहीले बजेट कार्यान्वयनमा केन्द्रित हुन विषयगत मन्त्रालयका मन्त्री र सचिवलाई त्यस्तो निर्देशन दिएका हुन् ।

बजेट कार्यान्वयनका लागि अबको ३ महिना महत्त्वपूर्ण हुने बताउँदै मुख्य मन्त्री शाहीले मन्त्री तथा कर्मचारीलाई कतै नजान भनेको मुख्य मन्त्रीको भनाइ उद्धृत गर्दै प्रेस सल्लाहकार ध्रुव बुढाथोकीले बताए । उनले भने, ‘अबको यो ३ महिना मन्त्री र सचिव कोही पनि बिदामा नबस्नुस्, संघीय सरकारका कार्यक्रम हुन् कि गैरसरकारी निकायका कार्यक्रम हुन्, कतै नजानुस् ।’

मुख्य मन्त्री शाहीले दोस्रो चौमासिकमा हरेक मन्त्रालयको प्रगति ४५ प्रतिशत अनिवार्य पुगेको हुनुपर्ने भन्दै आगामी ३ महिनाको कार्यसम्पादनका आधारमा मन्त्री र सचिवको कार्यक्षमताको मूल्याङ्कन हुने पनि बताए ।

संसदले पास गरेको नीति, कार्यक्रम तथा बजेट कार्यान्वयमा हुने अलमल, ढिलासुस्ती तथा लापरबाही कुनै पनि अर्थमा क्षम्य नहुने बताउँदै मुख्य मन्त्री शाहीले बजेट कार्यान्वयका क्रममा देखिएका समस्या तुरुन्तै जानकारी दिन पनि निर्देशन दिएका छन् ।

‘बजेट कार्यान्वयनमा कहाँ समस्या आउँछ तुरुन्तै रिपोर्ट गर्नुस् ।’ मुख्य मन्त्री शाहीले भने, ‘नीतिगत, कानुनी तथा व्यावहारिक समस्या जे आउँछ, तुरुन्त समाधान गरेर अगाडि बढ्नुपर्छ ।’

काम गर्न सकिँदैन भने इमानदारीका साथ सक्दिनँ भन्नुपर्ने बताउँदै मुख्य मन्त्री शाहीले आर्थिक वर्षको अन्त्यमा मन्त्रालयको प्रगति कमजोर देखिए त्योभन्दा ठूलो जनताप्रतिको धोका अरु केही पनि नहुने बताए ।

‘प्रदेश सरकारले तय गरेको नयाँ संगठन संरचनाबमोजिमका कार्यालय स्थापना तथा कर्मचारी व्यवस्थापनका कारण प्रथम चौमासिकको प्रगति सन्तोषजनक देखिएको छैन,’ उनले भने, ‘दोस्रो चौमासिकको प्रगति उत्साहजनक हुनुपर्छ ।’

प्रकाशित मिति: आइतबार, मंसिर १५, २०७६ १८:४९