विवाह पञ्चमी महोत्सवमा प्रहरीको विशेष अभियान

A+ A A-

रामजानकी विवाहपञ्चमी महोत्सवमा पाकेटमारीविरूद्ध धनुषा प्रहरीले विशेष अभियान चलाएको छ । पाकेटमारी गर्दै हिँडेका ५० जनाभन्दा बढी पाकेटमारलाई प्रहरीले पक्राउ गरेको छ ।

विवाहपञ्चमी महोत्सव महोत्सवमा दर्शनार्थीहरूको भीडभाडको मौका छोपी पाकेटमारी गर्ने ५० जनाभन्दा बढीलाई पक्राउ गरेको जिल्ला प्रहरी कार्यालय धनुषाले जनाएको छ ।

पाकेटमारी गर्ने अधिकांश भारतीय र महिला रहेको धनुषाका प्रहरी नायब उपरीक्षक सन्तु जयसवारले जानकारी दिए । उनका अनुसार भीडभाडको मौका छोपेर भारतबाट ठूलो संख्यामा पाकेटमार आएका छन् ।

जानकी मन्दिर, रंगभूमि मैदान बाह्रविघा, राममन्दिरलगायतका भीडभाड हुने क्षेत्रबाट उनीहरू पक्राउ परेको प्रहरी नायव उपरीक्षक जयसवारले बताए ।

पक्राउ परेकाहरूलाई नियन्त्रणमा लिई केहीलाई जिल्ला प्रहरी कार्यालयको थुनुवा कक्षमा राखिएको छ भने नअटेकाहरूलाई तरापट्टी र जटही प्रहरी चौकीमा राखिएको छ ।

यस्तै तीर्थालुहरूबाट अत्यधिक रकम असुली गर्ने एक जना होटेल सञ्चालकलाई समेत नियन्त्रणमा लिइएको उनले बताए ।

ठगी गर्ने होटलवाला पक्राउ

भारतबाट आएका श्रद्धालुहरूलाई जनकपुरको रामानन्दचोकस्थित होटल सिटी प्यालेस गेष्ट हाउस एण्ड फेमिली रेष्टुरेन्टमा एक रातका लागि एउटा कोठाको ५ हजार ५ सय रूपैयाँसम्म लिएको पाइएको छ ।

धनुषाका प्रमुख जिल्ला अधिकारी प्रदीपराज कणेलले सूचना पाएलगत्तै स्थलगत अनुगमन गर्दै होटल सञ्चालकलाई नियन्त्रणमा लिएर प्रहरीको जिम्मा लगाएको जनाइएको छ ।

प्रकाशित मिति: आइतबार, मंसिर १५, २०७६ १३:२३