रामजानकी विवाह पञ्चमी अन्तर्गत आज वैवाहिक कार्यक्रम

A+ A A-

रामजानकी विवाह पञ्चमीको अवसरमा आज विहानै देखि जनकपुरको प्रसिद्ध जानकी मन्दिरमा भीड लागेको छ ।

जनकपुरको गंगासागर र धनुष सागरमा नुहाई भक्तजनहरुले जानकी मन्दिरमा राम जानकीको पुजा अर्चना गरिरहेका छन ।

विवाह पञ्चमीका दिन भगवान राम र जानकीको निष्ठापूर्वक पूजा गर्दा मनोवाञ्छित फल प्राप्त हुने जनविश्वास छ ।

विवाह पञ्चमीमा सहभागी हुन नेपाल भारतका अतिरिक्त तेस्रो देशबाट समेत ठूलो संख्यामा भक्तजन जनकपुर आएका छन् ।

रामजानकी विवाह पञ्चमी अन्र्तगत आज वैवाहिक कार्यक्रम हुने छ । जानकी मन्दिरका उत्तराधिकारी महन्थ रामरोश दास वैष्णवका अनुसार पहिला रंगभूमि मैदानमा राम जानकीको स्वयंवर हुने छ र त्यसपछि राति जानकी मन्दिरको प्राङ्गणमा वैदिक रुपमा वैवाहिक कार्यक्रम हुने छ ।

ती दुवै कार्यक्रमको जनकपुरमा विशेष तयारी भईरहेको छ । आज जनकपुरको जानकी मन्दिरबाट शोभा यात्रा पनि निकालिने छ । सो शोभा यात्रामा नेपाल र भारतका साधु सन्तकासाथै ठूलो संख्यामा भक्तजनहरु सहभागी हुनेछन् ।

सात दिवसीय रामजानकी महोत्सव अन्र्तगत जनकपुर दर्शन, फुलवारी लीला, धनुषयज्ञ र मटकोर कार्यक्रम सम्पन्न भएको छ । आज वैवाहिक कार्यक्रम हुनेछ भने भोलि राम कलेवा हुनेछ ।

त्रेता युगमा भगवान राम र सीताको विवाहको स्मरणमा प्रत्येक वर्ष धुमधामका साथ विवाह पञ्चमी महोत्सव जनकपुरमा मनाइने गरिन्छ ।
विवाहपञ्चमीको अवसरमा जनकपुरधामकोठाउँ ठाउँमा निःशुल्क भोजन, जलपान,चिया,पानी वितरण गर्नुका साथै ठाउँ ठाउँमा स्वास्थ्य शिविरहरु लगाइएको छ ।

प्रकाशित मिति: आइतबार, मंसिर १५, २०७६ ०९:०९