जनकपुरमा विवाह पञ्चमी महोत्सव आजबाट सुरु

A+ A A-

मिथिलाञ्चलको सबैभन्दा ठूला उत्सवहरूमध्येको एक विवाहपञ्चमी महोत्सव आजबाट सुरू हुँदैछ । मंसिर शुक्लपञ्चमीका दिन त्रेतायुगमा भगवान् राम र सीताको विवाह जनकपुरधाममा भएको सम्झनामा प्रत्येक वर्ष विवाहपञ्चमी महोत्सवको आयोजना गरिँदै आएको छ ।

जनकपुरधाममा हुने सप्ताहव्यापी विवाहपञ्चमी महोत्सवका लागि तयारी अन्तिम चरणमा पुगेकाे छ । विवाहपञ्चमी महोत्सवका लागि जानकी मन्दिरलाई सजाउनेदेखि लिएर विभिन्न कार्यक्रमको तयारी गर्नमा जानकी मन्दिर प्रशासन लागेको छ । आजबाट सुरु हुन लागेको सप्ताहव्यापी विवाहपञ्चमी महोत्सवका लागि जानकी मन्दिरले १ सय ५१ सदस्यीय मूल समारोह समितिसमेत गठन गरेको छ ।

विभिन्न उपसमिति बनाएर मन्दिर प्रशासनले महोत्सवलाई भव्यता प्रदान गर्ने तयारीमा लागेको छ । एक सातासम्म मनाइने विवाहपञ्चमी महोत्सवअन्तर्गत आज पहिलो दिन नगर दर्शनबाट सुरु हुनेछ ।

नगर दर्शनमा राम र लक्ष्मण जनकपुरधाम बजार परिक्रमा गर्नेछन । दोस्रो दिन फूलबारी लीला, तेस्रो दिन धनुषा यज्ञ, चौथो दिन तिलकोत्सव, पाँचौं दिन मटकोर, छैटाैं दिन स्वयम्बर एवं विवाह र सातौं दिन राम कलेवा विधिसँगै महोत्सव सम्पन्न हुनेछ ।

जन्तीलाई स्वागत गर्न जानकी मन्दिर तयार

विवाहपञ्चमी महोत्सवको सबैभन्दा ठूलो आकर्षण भारतको अयोध्याबाट आउने जन्ती हो । हुन त प्रत्येक वर्ष अयोध्याबाट विवाहपञ्चमी महोत्सवमा जन्तीहरू सहभागी हुने गर्छन् तर प्रत्येक ५ वर्षमा अत्यधिक संख्यामा त्यहाँबाट जन्ती आउने गर्छन् ।

त्यसैले यस पटक विवाहपञ्चमी महोत्सवका लागि भव्य तयारी गरिएको जानकी मन्दिरका उत्तराधिकारी महन्थ रामरोशन दास वैष्णवले बताए ।

भारतको सर्वोच्च अदालतले अयोध्यामा राम मन्दिर निर्माणको पक्षमा फैसला सुनाएपछि श्रद्धालु भक्तजनहरू भारी संख्यामा सहभागी हुने उनको भनाइ छ । उनका अनुसार यस पटक अयोध्याबाट ५ सयको संख्यामा जन्ती आउनेछन् ।

बिहीबारबाट नै अयोध्याबाट प्रस्थान गरेको जन्ती मंसिर ११ गते साँझसम्म जनकपुरधाम आइपुग्नेछ । जन्तीमा सहभागीहरूलाई जानकी मन्दिरले मंसिर १३ गते औपचारिक कार्यक्रम गरेर तिलकोत्सव महोत्सवमा स्वागत गर्ने उत्तराधिकारी महन्थ वैष्णवले बताए ।

विवाहपञ्चमीमा भारतका गृहमन्त्री अमित शाह र उत्तर प्रदेशका मुख्यमन्त्री योगी आदित्यनाथलाई आमन्त्रण गरिएको उत्तराधिकारी महन्थ दासले जानकारी दिए । उनीहरूलाई आमन्त्रण गरिएपनि सहभागी हुने/नहुने विषयमा औपचारिक जानकारी नआएको उनले बताए ।

विवाहपञ्चमी महोत्सवको प्रमुख अतिथिको रूपमा राष्टपति विद्या देवी भण्डारी सहभागी हुन लागेकी छिन् । उनी १३ मंसिरकाे विवाहपञ्चमी महोत्सवमा सहभागी हुनका लागि जनकपुरधाम आउन लागेकी हुन् ।

भारतको अयोध्याबाट आउने जन्तीलाई राष्ट्रपति भण्डारीले रंगभूमि मैदानमा आयोजना हुने एक कार्यक्रमका बीच स्वागत गर्नेछिन् । त्यस्तै, यहाँका प्रत्येक राजनीतिक दलका प्रमुख नेताहरूलाई समेत आमन्त्रण गरिएको छ ।

सुरक्षा व्यवस्थामा कडाइ

विवाहपञ्चमीलाई दृष्टिगत गर्दै सुरक्षा व्यवस्थामा कडाइ गरिएको छ । यस महोत्सवमा नेपालसहित भारतका श्रद्धालु भक्तजनहरू आउने गरेकाले सुरक्षामा करिब ३ हजार २ सय प्रहरी परिचालन गरिने धनुषाका प्रहरी उपरीक्षक शेखर खनालले जानकारी दिए ।

उनका अनुसार श्रद्धालुहरूको सुरक्षाका लागि जनपद प्रहरी २ हजार ३ सय ३०, ट्राफिक प्रहरी १ सय १६, सशस्त्र प्रहरी ७ सय ८ जना परिचालन गरिनेछ ।

सुरक्षालाई मध्यनजर गर्दै कुकुर टोलीलाई समेत खटाइने जनाइएको छ । यस्तै, संवेदनशील स्थान पहिचान गरी १ सयभन्दा बढी स्थानमा सीसी क्यामेरा जडान गरी जानकी मन्दिरमा सुरक्षा पोस्ट कमाण्ड स्थापना गरी २४सै घण्टा सीसी क्यामेरामार्फत निगरानी गरिनेछ ।

सातदिवसीय कार्यक्रम

सात दिनसम्म विभिन्न कार्यक्रम गरी मनाइने ‘विवाह पञ्चमी महोत्सव १६ गतेसम्म सञ्चालन हुनेछ । कार्यक्रमअनुसार विवाह पञ्चमी महोत्सवको पहिलो दिन मंसिर १० गते मंगलबार जनकपुरधाम नगर दर्शन, दोस्रो दिन फूलबारी लीला (विवाह मण्डपको फुलवारीमा), तेस्रो दिन धनुषयज्ञ (रंगभूमि), चौथो दिन तिलकोत्सव (राम मन्दिर प्रांगण), पाँचौ दिन मटकोर (गंगासागर पोखरी घाट), छैटाैं दिन स्वयम्वर तथा शुभविवाह र सातौं दिन (रामकलेवा) जानकी मन्दिर प्रांगणमा अयोध्याबाट आएका जन्तीलाई बिदाइ गरी विवाह पञ्चमी समापन हुने परम्परा छ ।

प्रकाशित मिति: मंगलबार, मंसिर १०, २०७६ १३:४२