कर्णालीमा रोजगारीका लागि ठूला उद्योग आवश्यकः मन्त्री रावत

A+ A A-

नेपाल सरकारका स्वास्थ्य राज्यमन्त्री नवराज रावतले रोजगारी दिन नसके समृद्धिको नारा सफल हुन नसक्ने बताएका छन् । नेपाल घरेलु तथा साना उद्योग महासंघ कर्णाली प्रदेशको आयोजनामा भएको पाँचौं उद्योग स्थापना दिवसको अवसरमा आयोजित समारोहलाई सम्बोधन गर्दै उनले त्यस्तो भनाइ राखेका हुन् ।

कर्णाली प्रदेशमा अहिले ठूला उद्योग नभएका कारण यो प्रदेशमा उद्योग खोल्न सरकारले प्रोत्साहन गरेको राज्यमन्त्री रावतले बताए । ‘उद्योगको हिसाबले पछि परेको कर्णाली प्रदेशमा ठूला उद्योगहरू स्थापना हुन सकेका छैनन्,’ उनले भने, ‘यस्तो अवस्थामा साना उद्योगले पनि कहीँ न कहीँ कतै न कतै रोजगारीको सिर्जना गरिरहेकाले उद्योग स्थापनाका लागि सरकारले लगानी गर्न सक्नुपर्छ ।’

उद्योगको प्रगतिका लागि उद्योगीहरूसमेत सक्रिय भएर लाग्नुपर्ने बताउँदै स्थानीय उत्पादित वस्तु आफैंले प्रयोग गर्ने र आवश्यकताभन्दा बढी उत्पादन गरेर निर्याततर्फ ध्यान दिनुपर्ने राज्यमन्त्री रावतले बताए । ‘उद्योगको विकास गर्नका लागि संकल्पका साथ अगाडि बढ्न जरुरी छ,’ उनले भने, ‘स्थानीय उत्पादनलाई जोड दिन सकेको खण्डमा यहाँको रोजगारी पनि वृद्धि हुन्छ ।’

नेपाल घरेलु तथा साना उद्योग महासंघ कर्णाली प्रदेशका अध्यक्ष चन्द्रबहादुर बिसीले बजार क्षेत्रमा प्रतिस्पर्धा गर्नका लागि गुणस्तरीय सामानको उत्पादनमा जोड दिनुपर्ने बताए । उनले भने, ‘नेपाल सरकारले एकद्वार प्रणालीबाट कर लिने वातावरण सिर्जना गर्न जरुरी छ । उद्योग प्रवद्र्धनका लागि प्रदेश सरकारदेखि स्थानीय सरकारले समेत औधोगिक ग्रामको नीतिलाई कार्यान्वयन गरेर अगाडि बढ्नुपर्छ ।’

प्रकाशित मिति: सोमबार, मंसिर ९, २०७६ १८:३९