कर्णाली प्रदेशले घरेलु हिंसाविरुद्धको विधेयक ल्याउँदै

A+ A A-

कर्णाली प्रदेशको सामाजिक विकास मन्त्रालयले ‘घरेलु हिंसाविरुद्धको विधेयक’ संसदमा लैजाने तयारी गरेको छ । महिला हिंसाका घटना रोक्न र घरेलु हिंसामा परेका महिला तथा बालबालिकाको आश्रय, कानुनी उपचारका लागि उक्त विधेयक संसदमा लैजाने तयारी गरेको हो ।

लैंगिक हिंसाविरुद्धको १६ दिने अभियानको उद्घाटन गर्दै कर्णाली प्रदेशमा ग्रामीण इलाकामा घरेलु हिंसाका घटनामा वृद्धि हुँदै गएको र त्यसलाई रोक्नका लागि ‘घरेलु हिंसाविरुद्धको विधेयक’ ल्याउने तयारी गरिएको सामाजिक विकास मन्त्रालय जनाएको छ ।

कर्णाली प्रदेशमा हुने महिला हिंसा तथा घरेलु हिंसाका घटना आफ्नै प्रकारकाले यहाँका समस्या, तिनको कानुनी उपचारका लागि आफ्नै खाले विधेयक ल्याउन लागिएको सामाजिक विकास मन्त्रालयका सचिव डा. मानबहादुर बीकेले बताए । ‘कर्णालीमा हुने घरेलु हिंसाका घटना आफ्नै खालका रहेका छन्,’ उनले भने, ‘यी घटना रोक्नका लागि सामाजिक विकास मन्त्रालयले ‘घरेलु हिंसाविरुद्धको विधेयक’ ल्याउन लागेको छ ।’

सचिव बीकेले यो विधेयक आएपछि कर्णालीका स्थानीयस्तरमा हुने महिला हिंसाका घटनामा कमी आउने दाबी पनि गरे । उनले भने, ‘यो प्रदेशमा हुने हिंसाका घटना रोक्नका लागि हिउँदे अधिवेशनमै घरेलु हिंसाविरुद्धको विधेयक संसदमा पेश हुन्छ ।’

कर्णालीमा हिंसामा परेका महिलाहरूलाई सुरक्षित गर्न, रोजगारीको व्यवस्था मिलाउनका लागि ‘मुख्य मन्त्री महिला रोजगार कार्यक्रम, सडक बालबालिकामुक्त अभियान सञ्चालन गर्न लागिएको सामाजिक विकास मन्त्रालयले जनाएको छ ।