निर्माण सकिएको ६ महिनापछि सञ्चालनमा आउँदै सिटी बसपार्क

A+ A A-

वीरेन्द्रनगरमा निर्माण सम्पन्न भएको सिटी बसपार्क सञ्चालनमा आउन अझै एक महिना लाग्ने भएको छ । गत असारमै निर्माण सम्पन्न भएको बसपार्क नगरपालिकाका कारण सञ्चालमा आउन नसकेको हो । केही समय निर्माण कम्पनीले भुक्तानी नपाएर बन्द गरे पनि पछिल्लो समय भने नगरपालिकाले कार्यविधि नबनाउँदा बसपार्क सञ्चालनमा आउन सकेको छैन ।

नगरपालिकाले संरचना निर्माण सम्पन्न भएको करिब ५ महिनापछि बसपार्क सञ्चालन कार्यविधि पारित गरेको छ । कार्यविधि पारित भएसँगै आगामी पुसदेखि बसपार्क सञ्चालनमा आउने नगरपालिकाले जनाएको छ । बसपार्क सञ्चालनका लागि पुनः टेन्डर आह्वान गरिनेछ । नगरपालिकाले सबै प्रक्रिया पूरा गरेर निजी फर्ममार्फत बसपार्क सञ्चालन गर्ने तयारी गरेको छ । ६ करोड ८२ लाख ७५ हजार आठ सय ८९ रुपैयाँमा निर्माण सम्झौता भएको थियो ।

तर तोकिएको समयमा काम नहुँदा बसपार्कको लागत अनुमानभन्दा ६२ लाख रुपैयाँ बढी खर्च भएको छ । सात करोड ४४ लाख रुपैयाँको लागतमा बसपार्कको निर्माण कार्य सकिएको नगरपालिकाका इन्जिनियर विशाल अधिकारीले बताए । उनका अनुसार नगर विकास कोषको ७ करोड ४५ लाख रूपैयाँ ऋण अनुदानमा बसपार्क निर्माण गरिएको हो । बसपार्क सञ्चालन भएपछि वीरेन्द्रनगर नगरपालिकाले कोषको ऋण रकम तिर्ने सम्झौता छ ।

बसपार्क नहुँदा मुख्य सडकसँगै जोडिएको मंगलगढी चोक नजिकको खाली जग्गाबाट काम चलाइएको छ । ठाउँ सानो हुँदा सवारी व्यवस्थापन राम्रो हुन सकेको छैन । स्थानीयले निर्माण भइसकेको बसपार्क छिटो सञ्चालनमा ल्याउन अनुरोध गरिहरहेका छन् । सिटी बसपार्क सञ्चालनमा आउने दिन नजिकिँदै गर्दा गोलाप्रथाबाट टिकट काउन्टर बाँडिएको छ ।

सुर्खेतमा रहेका यातायात व्यावसायीहरूलाई टिकट काउन्टर राख्ने कोठाहरू गोलाप्रथाबाट बाँडिएको हो । नगरपालिकाका अनुसार जिल्लामा रहेका विभिन्न ११ वटा यातायात प्रालीलाई काउन्टर राख्न कोठा उपलब्ध गराइएको हो ।