छाडा चौपायाले अस्तब्यस्त जनकपुर, नियन्त्रणको प्रयास असफल

A+ A A-

जनकपुरधाम उपमहानगरपालिकाले छाडा चौपाया नियन्त्रणका लागि अभियान सञ्चालन गरे पनि यो सफल हुन सकेको छैन । पछिल्लो समय छाडा चौपायाको आतंक बढेपछि जनकपुर उपमहानगरपालिकाले जिल्ला ट्राफिक प्रहरी कार्यालयसँग समन्वय गरी छाडा चौपाया नियन्त्रण अभियान शुरू गरेको थियो । तर, याे अभियानले निरन्तरता नपाउँदा छाडा चौपाया नियन्त्रणकाे प्रयास प्रभावकारी हुन नसकेको हो ।

नेपाली कांग्रेस जनकपुर नगरका सभापति मनोज साहले नगरपालिकाले सानो प्रयासले हुनसक्ने कामसमेत गर्न नसकेको आरोप लगाए । उनले नगरको विकासका लागि ठूलो काम त परै जाओस्, छाडा चौपाया नियन्त्रण अभियानसम्म सफल पार्न नसक्नु दुःखद रहेको प्रतिक्रिया दिए ।

सडकमा जताततै छाडा चौपायाका कारण सवारी साधन चलाउनुका साथै पैदल हिँडडुल गर्नसमेत समस्या भएपछि उपमहानगरगरले नियन्त्रण अभियान चलाएको थियो । छाडा चौपायाका कारण सवारी दुर्घटना बढ्दै गएकाे छ । तर, जनकपुरधाम उपमहानगरपालिकाले ६ महिनादेखि यसप्रकारको कुनै कार्यक्रम नल्याएको स्थानीयवासीहरूले बताएका छन् ।

छाडा चौपायाबाट सर्वसाधारण मात्र पीडित छैनन्, बाहिरबाट जनकपुरधाम घुम्न आएका पर्यटकसमेत सडक र जानकी मन्दिर वरपर घुम्ने छाडा चौपाया देखेर नाक खुम्चाउने गरेको दृष्य सहजै देख्न सकिन्छ ।

प्रदेश २ को अस्थायी राजधानीसमेत रहेको जनकपुरधाममा सवारी साधनको बढ्दै गरेको चापले छाडा चौपायाको नियन्त्रण हुन नसक्दा ट्राफिक व्यवस्थापनसमेत चुनौतीपूर्ण बनेको ट्राफिक प्रहरी कार्यालय जनकपुरका अधिकारीहरूले बताए ।

स्थानीयवासीलाई चौपाया व्यवस्थित गर्न आग्रह गरेपछि उनीहरूले वर्षौदेखि खुला छोडेको चौपायालाई किन हटाउने भनेर जवाफ फर्काउने गरेको ट्राफिकको गुनासो रहेको छ ।

नगरपालिकाकै केही मेस्तरले सुँगुर पालेका छन् । ती सुँगुरले पनि जनकपुरधामको सफाइमा समस्या देखिएको छ । नगरपालिकाकै कर्मचारी रहेका राजी मेस्तरसँग करिब ४ दर्जन सुँगुर रहेको छ । उनको सुँगुर शहर बजारमा खुल्ला रूपमा घुमिरहेका हुन्छन् ।

जनकपुरधाम उपमहानगरपालिकाकी उपप्रमुख रिताकुमारी मिश्रले चाँडै यो समस्या समाधान हुने दाबी गरिन् । उनले यसका लागि नगरपालिका अझै प्रभावकारी योजनाका साथ अगाडि बढ्ने बताइन् ।

प्रकाशित मिति: सोमबार, कात्तिक ४, २०७६ १८:०४