अर्थमन्त्री पुनले गरे ४० भन्दा बढी देशका राजदूत र नियोग प्रमुखसँग भर्चुअल बैठक

अर्थमन्त्री पुनले गरे ४० भन्दा बढी देशका राजदूत र नियोग प्रमुखसँग भर्चुअल बैठक

A+ A A-

अर्थमन्त्री वर्षमान पुनले ४० भन्दा बढी देशका नेपाली राजदूत तथा कूटनीतिक नियोग प्रमुखहरूसँग भर्चुअल बैठक गरेका छन् ।

१६ र १७ वैशाखमा तय भएको तेस्रो लगानी सम्मेलनको तयारी स्वरुप अर्थमन्त्री पुनले राजदूतहरूसँग छलफल गरेका हुन् । शुक्रबार साँझ अबेर परराष्ट्र मन्त्रालयबाट भएको जुम बैठकमा अर्थमन्त्री, मुख्यसचिव बैठकुण्ठ अर्याल, परराष्ट्रसचिव सेवा लम्साल र लगानी बोर्डका प्रमुख कार्यकारी अधिकृत (सीईओ) सुशील भट्टलगायत सहभागी थिए ।

अर्थमन्त्री पुनले राजदूत र नियोग प्रमुखहरूलाई अबको एक महिना लगानी सम्मेलन केन्द्रित भएर काम गर्न निर्देशन दिए । ‘लगानी सम्मेलन राष्ट्रको इज्जत, प्रतिष्ठा, गौरबको विषयसँग जोडिएको छ’, पुनले भने, ‘सम्माननीय प्रधानमन्त्रीज्यूकै तर्फबाट म यहाँहरूलाई आग्रह गर्छु कि अबको एक महिना सबै काम छाडेर यसैमा लाग्नुस् ।’

अर्थमन्त्री पुनले विदेशी विकास साझेदार, ठूला लगानीकर्ता, सम्भावित लगानीकर्ता, कार्यक्रमका वक्ता र उच्च पदस्थ सरकारी अधिकारीहरूलाई यसअघि नै निम्ता पठाइसकिएको स्मरण गर्दै सम्मेलनमा आउन निश्चित भएकाको सूची तयार पारेर पठाउन पनि निर्देशन दिए ।

लगानीमैत्री वातावरण बनाउन सरकारले नीतिगत, प्रक्रियागत र कानुनी सुधारको काम अघि बढाएको उनले बताए । त्यसका लागि एक दर्जन बढी कानुनमा संशोधनमार्फत सुधारको प्रक्रिया अघि बढाइएको विषयमा आफू रहेको देशका लगानीकर्ता र सरकारी एजेन्सीलाई जानकारी गराउन पनि अर्थमन्त्री पुनले आग्रह गरेका थिए ।

भारत, चीन, कोरिया र खाडीसहित विभिन्न मुलुकमा भइरहेका पूर्वतयारीका कामलाई थप तीव्रता दिन अर्थमन्त्री पुनले निर्देशन पनि दिए । बैठकमा बेलायत, अष्ट्रेलिया, जर्मनी, बंगलादेश, भारत, ओमान, दक्षिण कोरिया र मलेसियाका राजदूत तथा नियोग प्रमुख पनि सहभागी थिए ।

प्रकाशित मिति: शनिबार, चैत १७, २०८० १२:१०