जंगली जनवारसँग मानिसको द्वन्द्व बढ्दो

A+ A A-

गत शुक्रबार हुम्लामा जंगली भालुको आक्रमणबाट खार्पुनाथ–४ स्थित नल्ला गाउँकी ३५ वर्षीय भगवती शाही गम्भीर घाइते भइन् । वनमा घाँस काट्न गएकी शाहीलाई भालुले आक्रमण गरेको थियो ।

गत महिनाको असोज २३ गते जुम्लाको गुठीचौर गाउँपालिका ४ झारज्वालामा भालुको आक्रमणबाट पाँचजना घाइते भए । भालुले आक्रमण गर्दा स्थानीय ३८ वर्षीय खगेन्द्र अधिकारी, २४ वर्षीया वसन्ती भण्डारी, मानबहादुर भण्डारी, इश्वर बुढा र कालु परियार घाइते भएका थिए ।

गत साउन महिना २३ गते कालिकोट नरहरिनाथ गाउँपालिका–९ लालु गडिगाउँमा भालुको आक्रमणबाट कर्णवीर शाही गम्भीर घाइते भए । शाहीलाई गाउँको मकै बारी नै भालुले आक्रमण गरेको थियो ।

गत भदौ ६ मुगुको छायानाथ रारा नगरपालिका–८ झ्यारी गाउँमा भालुको आक्रमणबाट स्थानीय रनबहादुर रावल, विजलाल कामी र गणेश रावलका एक/एक गाई र लक्ष्मी रावल, शेरसिंह कार्कीका एक एक घोडा भालुले मार्‍यो ।

यी माथिका घटनाले के देखाउँछ भने जंगली जनवार मानिस बीचको द्वन्द्व बढ्दै गएको छ । साउनदेखि यता कर्णाली प्रदेश हुम्ला, कालिकोट र हुम्लामा गरेर जंगली भालुको आक्रमणबाट ७ जना घाइते भए । कैयौं पशुचौपायासमेत मारिए ।

कर्णाली प्रदेशका हिमाली जिल्लामा अहिले भालुको आक्रमण बढ्दै गएको छ । जंगलहरू मासिदै जानु र जंगली जनवारका बासस्थानमा कमी भएका कारणले जंगली जनवारहरु अहिले मानिस बसोबास क्षेत्र नजिकै आइपुगेका कारणले जंगली जनवारको आंतक बढ्दै गएको छ ।

जंगली जनवार वनका आएको आहार कमी, बासस्थान कमीका कारणले जंगली जनवार र मानिसबीच द्वन्द्व बढ्दै गएको जुम्ला डिभिजन वन कार्यालयका निमिक्त कार्यालय प्रमुख उपेन्द्रप्रसाद चौलागाईले बताए ।

‘वनहरू मासिदै गएका कारणले अहिले जंगली जनवारहरू आहारको खोजी गाउँमा पस्ने गरेका छन्,’ उनले भने, ‘जंगली जनवारका नजिक मानिस देखा पर्‍यो भने उसले आफूलाई आक्रमण गर्न आएको सोच्छ र आक्रमण गर्छ ।’

जंगलमा आहारको कमी हुँदा बाली पाक्ने समयमा दिनमा सक्रिय हुने जनावर भए पनि मानव बस्तीनजिक बस्ने भालु साँझपख र राति पनि सक्रिय हुने भएकाले यसले बस्तीमा आंतक मच्चाउने गरेको निमिक्त प्रमुख चौलागाईले बताए ।

‘भालुको सुघ्ने क्षमता अति तीक्ष्ण हुन्छ,’ उनले भने, ‘शरद ऋतुमा भालुहरूले पहिलादेखि जम्मा गरेको खानेकुरा ठूलो मात्रामा खान्छन् । त्यो सकियो भने मानिसले लगाएको खानेकुरा आउने गर्दछन् ।’

प्रकाशित मिति: सोमबार, कात्तिक ४, २०७६ १४:४४