सकारात्मक भएन ओली–प्रचण्ड वार्ता, एमालेलाई माेर्चामा भित्र्याउने प्रयास असफल

सकारात्मक भएन ओली–प्रचण्ड वार्ता, एमालेलाई माेर्चामा भित्र्याउने प्रयास असफल

फाइल तस्वीर

A+ A A-

समाजवादी मोर्चामा सत्ता गठबन्धनको सबैभन्दा ठूलो दल नेकपा एमालेलाई पनि सहभागी गराउने प्रयास असफल भएको छ । प्रधानमन्त्री एवं माओवादी केन्द्रका अध्यक्ष पुष्पकमल दाहाल प्रचण्डको चाहनामा एमालेलाई मोर्चामा सहभागी गराउन मोर्चाका संयोजक नेत्रविक्रम चन्द विप्लव खटिएका थिए ।

विप्लवले यसबारे बिहीबार साँझ बालकोटमै पुगेर एमाले अध्यक्ष ओलीसँग छलफल गरेका थिए । तर, ओलीले एमाले समाजवादी मोर्चामा सहभागी नहुने शुक्रबार प्रस्ट पारेका छन् । सिंहदरबारमा प्रधानमन्त्री एवं माओवादी केन्द्रका अध्यक्ष पुष्पकमल दाहाल प्रचण्डसँगको भेटवार्तापछि बाहिरिने क्रममा सञ्चारकर्मीहरूसँग संक्षिप्त प्रतिक्रिया दिँदै ओलीले एमाले समाजवादी मोर्चामा सहभागी नहुने बताएका हुन् ।

हाल समाजवादी मोर्चामा माओवादी केन्द्रसहित एकीकृत समाजवादी, जनता समाजवादी पार्टी र विप्लव नेतृत्वको नेकपा सहभागी छन् । कांग्रेससहितको गठबन्धन कायमै रहेका बेला चार पार्टीलाई समेटेर समाजवादी मोर्चा गठन भएको थियो । त्यतिबेला कतिपयले यसलाई सत्ता गठबन्धनकै उपगठबन्धनको संज्ञासमेत दिएका थिए ।

कांग्रेससँगको गठबन्धन भत्किएर एमाले सत्तारुढ बनेसँगै एमालेलाई पनि मोर्चामा सहभागी गराउने कसरत चलेको थियो । तर, एमाले यसमा सहमत भएन ।

प्रचण्डसँगको छलफलपछि सिंहदरबारबाट बाहिरिन गाडीमा बसिसकेका ओलीलाई पत्रकारहरूले एमाले पनि समाजवादी मोर्चामा सहभागी हुने हो भनेर सोधेका थिए । जवाफमा ओलीले 'होइन' भने । ओलीलाई पत्रकारहरूको अर्को प्रश्न थियो– के–के कुरा भयो प्रधानमन्त्रीसँग ? यसबारे पनि ओली खुलेर बोल्न चाहेनन् । उनले 'राम्रै कुरा भयो' मात्र भने ।

पत्रकारहरू र ओलीबीच भएको संक्षिप्त सवालजवाफले ओली–दाहालबीच समाजवादी मोर्चाबारे भएको छलफल सकारात्मक हुन नसकेको छनक दिन्छ ।

एमाले नआए पनि समाजवादी मोर्चा अगाडि बढ्छः भुसाल

यसैबीच, नेकपा माओवादी केन्द्रकी उपाध्यक्ष पम्फा भुसालले समाजवादी मोर्चामा सत्तारुढ एमाले नआए पनि मोर्चा कायम रहने बताएकी छन् । उनले वामपन्थी दल र समाजवादी हुनुको नाताले समाजवादी मोर्चामा एमाले पनि आउनु राम्रो हुने बताइन् ।

उनले समाजवादी मोर्चा विगतमै बनेको उल्लेख गर्दै अहिले सत्ता समीकरण फेरिँदा एमाले पनि सरकारमा रहेका कारण समाजवादी मोर्चाप्रति एमाले भ्रमित हुन नहुने बताइन् । उनले एमालेसँग छलफल गरेपछि समाजवादी मोर्चा अझै बृहत् हुन सक्ने बताइन् । उनले एमालेसँग सत्ता सहकार्य भइरहेकाले एमाले मोर्चामा नआए पनि आपसी असमझदारी हुनु नहुने बताइन् ।

उपाध्यक्ष भुसालले समाजवादी मोर्चामा आबद्ध पार्टीहरूका बीचमा नीति, कार्यक्रमहरूमा सहमति बन्दै गएमा एकताको तहसम्म पुग्ने बताइन् ।

प्रकाशित मिति: शुक्रबार, चैत ९, २०८० १६:२२