कहाँ रोकियो अख्तियार प्रमुखले नै अनुसन्धान सकियो भनेको टेरामक्स प्रकरण ?

A+ A A-

नेपाल दूरसञ्चार प्राधिकरणले खरिद गरेको टेरामक्स प्रविधिमा भएको अनियमितताको छानबिनले अघिल्लो कांग्रेस–माओवादी गठबन्धनका पछिल्ला दिनहरू तनावपूर्ण थिए । तत्कालीन स्वास्थ्यमन्त्री मोहन बस्नेत र सरकारका मुख्यसचिव बैकुठ अर्याल नै अख्तियार दुरुपयोग अनुसन्धान आयोगको छानबिनको घेरामा थिए । उनीहरूले टंगालस्थित आयोगको कार्यालय पुगेरै बयानसमेत दिइसकेका थिए ।

बहालवाला मन्त्री नै अख्तियारमा धाउनुपरेपछि विपक्षी दलहरूले विरोध गर्ने नै भए । एमालेलगायत प्रतिपक्षी दलले अख्तियारमा बयान दिन धाइरहेका तत्कालीन स्वास्थ्यमन्त्री मोहन बस्नेतको राजीनामा मागेका थिए । सो प्रकरणमा मुछिएका मन्त्रीहरूबारे संसद्लाई जवाफ दिनुअघि नै प्रधानमन्त्री प्रचण्डले सत्ता गठबन्धन हेरफेर गरेयता संसदमा यो विषय उठेको छैन । सँगै, सो छानबिनमा अख्तियारले गरिरहेको ढिलाइले सन्देह पैदा गरेको छ ।

१५ फागुनमा संसदकाे लेखा समितिमा उपस्थित भई अख्तियार दुरुपयोग अनुसन्धान आयोगका प्रमुख आयुक्त प्रेम राईले टेरामक्स खरिदमा भएको भ्रष्टाचारबारे आयोगको छानबिन अन्तिम चरणमा पुगेको बताएका थिए । सो प्रकरणसँग जोडिएका व्यक्तिसँग बयान लिइसकेकाले प्रमाणको मूल्यांकन गरी चाँडै नै निष्कर्षमा पुग्ने र मुद्दा चलाउने उनको दाबी थियो । अख्तियार स्रोतले एक/दुई दिनभित्रै मुद्दा चलाउन लागेको बताएको थियो ।

लगत्तै, अर्को जानकारी दिइयो– मुख्यसचिव अर्यालविरुद्ध मुद्दा चलाउँदा सिङ्गो कर्मचारीतन्त्र बदनाम हुने भएकाले उनलाई सो जिम्मेवारीबाट अलग हुन आयोगमै बोलाएर आग्रह गरिएको छ । प्रधानमन्त्री प्रचण्डले अर्याललाई राजीनामा दिन वा बिदामा बस्न आग्रह गरेको दाबी बालुवाटार स्रोतले गर्‍याे । तर, अर्यालले स्वीकारेको देखिएन । यसले भित्रभित्रै यो प्रकरण मिलाउने प्रयास त भइरहेको छैन भन्ने आशंका उब्जाएको छ ।

त्यसो त, टेरामक्स अनियमितता छानबिन रोक्न अख्तियार प्रमुख राईलाई अघिल्लो गठबन्धनबाट दबाब दिइएको विश्वस्त स्रोत बताउँछ । राई लेखा समितिमा गएर आयोगका गतिविधिबारे जानकारी दिनुको पछाडिको पृष्ठभूमि पनि त्यसैले बनाएको थियो । स्रोतका अनुसार, प्रधानमन्त्री प्रचण्ड र पूर्वप्रधानमन्त्री एवं कांग्रेस सभापति शेरबहादुर देउवाले बोलाएरै अनुसन्धान रोक्न दबाब दिएका थिए ।

सत्तारुढ गठबन्धनबाट दबाबमा परेका राईको आग्रहपछि नै लेखा समिति सभापति ऋषिकेश पोखरेलले उनलाई संसदीय समितिमा बोलाएका थिए । त्यसको वातावरण बनाउन कांग्रेस सांसद अर्जुननरसिंह केसीले समेत सघाएका थिए । लेखा समितिमा पुगेर अख्तियार प्रमुख राईले टेरामक्स अनुसन्धानबारे भनेका थिए, ‘टेरामक्सबारे बयान टुंग्याएका छौँ । प्रमाणको मूल्यांकन गरिरहेका छौँ । चाँडै मुद्दामा जान्छौँ ।’

राईले टेरामक्सबारे मात्र बताएनन्, एमाले नेता गोकुल बाँस्कोटा जोडिएको ७० करोड कमिसन मागेको टेप प्रकरणको अनुसन्धानबारे पनि संसदलाई जानकारी गराएका थिए । कांग्रेस नेताद्वय बस्नेत र ज्ञानेन्द्रबहादुर कार्की सञ्चारमन्त्री हुँदा टेरामक्स खरिद प्रकरणको अनियमिततामा संलग्न भएको आरोपमा छ । तत्कालीन सचिव अर्याल पनि सो प्रकरणमा जोडिएको पाइएपछि अख्तियारले उनीहरूसँग बयान लिएको थियो ।

प्रकाशित मिति: शुक्रबार, चैत २, २०८० १८:२३