मुस्कान खातुनमाथि एसिड प्रहार गर्नेलाई सुधार गृह पठाइयो

A+ A A-

मुस्कान खातुन माथि एसिड आक्रमण गर्ने दुई जना अभियुक्तलाई बालसुधार गृह पठाइएको छ । पर्सा जिल्ला अदालतको आदेशअनुसार मुस्कानमाथि एसिड प्रहार गर्ने अभियुक्तद्वयलाई बालसुधार गृह पठाइएकाे हाे ।

पर्सा प्रहरीले गत बुधबार अभियुक्तसहित अदालतमा मिसिल पेश गरेलगत्तै भएको थुनछेक बहसपछि दुवै युवालाई बालसुधार गृहमा पठाइएको पर्सा जिल्ला अदालतले जनाएको छ ।

अदालतमा पेश भएको मिसिलमा दुवै अभियुक्तको उमेर १८ वर्ष पुगेको प्रमाण नभएपछि कारागारमा नभई बालसुधार गृहमा राख्न आदेश भएको पर्सा जिल्ला अदालतका श्रेस्तेदार कृष्णप्रसाद अधिकारीले बताए ।

बालसुधार गृह चलान भएका युवाहरूमा वीरगन्ज २ छपकैयाका सम्साद मिया र मजिद आलम छन् । मुस्कान खातुनमाथि एसिड प्रहार गर्ने मिया र आलम प्रतिवादी रहेको मुद्दामा वैतनिक कानुन व्यवसायी प्रतिमा चौरसियाले मात्र बहस गरिन् ।

सरकारवादी मुद्दा भएकाले वादीको तर्फबाट सरकारी वकिल कार्यालय पर्साका जिल्ला न्यायाधिवक्ता रुद्रप्रसाद पन्थी, सहन्यायधिवक्ताद्वय टीकाराम भण्डारी र उमंग निरौलाले बहस गरेका थिए । अभियुक्तले पनि स्वीकारी बयान दिइसकेको मुद्दामा खासै कानुन व्यवसायीहरूले पनि चासो नदिने गरेको अदालतको भनाइ छ ।

अभियुक्तको मिसिलमा नै फरक उमेर

मुस्कान खातुनमाथि एसिड आक्रमण गर्ने मिया र आलमको उमेर मिसिलमा फरकफरक उल्लेख गरिएको छ । पर्सा प्रहरीले अभियुक्तसँग लिएको बयानमा आलमको उमेर १९ र मियाको उमेर १८ वर्ष उल्लेख छ ।

त्यसैगरी, प्रहरीको थुनामा भएका समयमा पर्सा प्रहरीले नारायणी अस्पतालमा चेकजाँच गराउँदा नारायणी अस्पतालका चिकित्सकहरूले अभियुक्तहरूको उमेर १६ देखि १८ र १८ देखि २० सम्मको उल्लेख गरेको पनि प्रहरीले पेश गरेको मिसिलमा जनाइएको छ ।

जन्मदर्ता प्रमाणपत्र पेश भएको मिसिलमा मजिद आलमको जन्म १ वैशाख २०६२ उल्लेख छ भने समसाद मियाको २०६४ सालमा जन्म भएको जन्मदर्ता प्रमाणपत्रमा उल्लेख छ । दुवैको जन्मदर्ताको प्रमाणपत्र भने शंकास्पद रहेको अदालतका एक कर्मचारीले बताए ।

यस्तो थियो घटना

वीरगन्ज–३ छपकैयाबाट वीरगन्ज–६ मा रहेको त्रिभुवन हनुमान माध्यमिक विद्यालयमा पढ्न जाने क्रममा गत २० भदौमा वीरगन्ज–४ विर्तास्थित गणेशमान चोकमा मुस्कान खातुनमाथि एसिड प्रहार भएको थियो ।

बाटो कुरेर बसेका मिया र आलमले एसिड आक्रमण गरी मुस्कानलाई घाइते बनाएका थिए । १५ वर्षीय मुस्कानलाई नातामा पर्ने मजिद आलमले मन पराएको र उनले चाहे बमोजिम मुस्कानले नमानेपछि समसाद मियाको सहयोगमा एसिड प्रहार गरेको मजिदले प्रहरीसमक्ष दिएको बयानमा उल्लेख छ ।

घाइते मुस्कानलाई भने वीरगन्जको नारायणी अस्पतालमा प्राथमिक उपचारपछि थप उपचारका लागि नारायणी अस्पतालले सोही दिन काठमाडाैं रिफर गरेको थियो । हाल उनी काठमाडाैंको कीर्तिपुरस्थित अस्पतालमा उपचार गराइरहेकी छिन् ।

प्रकाशित मिति: शुक्रबार, कात्तिक १, २०७६ १७:४३