सिंहदरबारमा बिदाइ समाराेह नसकिँदै रेखा–शक्तिलाई शपथकाे निम्ताे आएपछि...

A+ A A-

प्रधानमन्त्री पुष्पकमल दाहाल प्रचण्डले सत्ता गठबन्धन फेरेसँगै पदमुक्त हुन पुगेका माओवादीका दुई जना निवर्तमान मन्त्रीलाई बिदाइ समाराेहकैबीच फेरि मन्त्रीकाे शपथ खाने निम्ताे आएकाे छ ।

बुधबार दिउँसो सवा एक बजे ऊर्जा जलस्रोत तथा सिँचाइ मन्त्रालयमा शक्तिबहादुर बस्नेतको बिदाइ कार्यक्रम चल्दै गर्दा उनलाई फेरि शपथ खान निम्ताे आएकाे हाे ।

कर्मचारीहरू बिदाइ गर्दै मायाको चिनो थमाएपछि मन्त्री बस्नेतको बोल्ने पालो आयो । उनले बोल्न सुरु गरेलगत्तै सहयोगीले हतार–हतार फोन थमाए । स्रोतका अनुसार उक्त फाेनमा बस्नेतलाई ५ बजे मन्त्री पदको शपथका लागि राष्ट्रपति कार्यालय शीतलनिवास आउन भनियाे ।

यता सञ्चार तथा सूचना प्रविधि मन्त्रालयमा पनि त्यही भयो । पदमुक्त सञ्चारमन्त्री रेखा शर्मालाई पनि बिदाइ कार्यक्रमकै क्रममा मन्त्री दोहारिने खबर सुनाइयाे । सिंहदरबारबाट बिदा हुने तयारीमा रहेकै बेला शर्मालाई मन्त्रीमा निरन्तरता दिने जानकारी गराइएकाे थियाे ।

माओवादीले अर्थमा वर्षमान पुन, उपप्रधान तथा परराष्ट्रमन्त्रीमा नारायणकाजी श्रेष्ठलाई पठाउने भएकाे छ । यस्तै, रेखा शर्मा र शक्ति बस्नेत पुरानै मन्त्रालयमा दाेहाेरिने भएका छन् । शर्मा सञ्चार र बस्नेत ऊर्जामा यथावत् रहने पक्का भएकाे छ ।

नयाँ मन्त्रिपरिषद्‌मा पुन र हितबहादुर तामाङ नयाँ हुन् । पुन अघिल्लोपटक मन्त्री बनेका थिएनन् । तामाङ पहिलोपटक मन्त्री बन्दै छन् । उनलाई संस्कृति, पर्यटन तथा नागरिक उड्डयनमन्त्री बनाउने तयारी छ । माओवादीमा पर्यटनमन्त्री सुदन किराँती मात्र बाहिरिनेमा परेका छन् ।

प्रकाशित मिति: बुधबार, फागुन २३, २०८० १५:५७