भीसीको आवेदन : जब शिक्षा मन्त्रालयका कर्मचारीले संगीता रायमाझीलाई गाली गरे

भीसीको आवेदन : जब शिक्षा मन्त्रालयका कर्मचारीले संगीता रायमाझीलाई गाली गरे

A+ A A-

त्रिभुवन विश्वविद्यालयको उपकुलपतिको लागि आवेदन दिएकी प्राध्यापक संगीता रायमाझी सर्ट लिस्टमा परिनन् । १४ जनाभित्र नअटाएकी प्राध्यापक राझमाझीले आवेदन दिन जाँदा नै आफूमाथि अपमान भएको गुनासो गरेकी छिन् ।

चैतन्य मिश्र समाज विज्ञान प्रतिष्ठानले मंगलबार त्रिविमा आयोजना गरेको 'होला त विश्वविद्यालयको शासकीय पुनर्संरचना' विषयक छलफलमा प्राध्यापक रायमाझीले आवेदन दिने क्रममा शिक्षा मन्त्रालयका कर्मचारीले गाली गरेको बताइन् ।

‘भिजन प्लान लेखेर जे–जे गर्नुपर्ने थियो सबै गरेँ । राजनीतिक पार्टीमा आबद्ध छैन भनेर पनि लेख्नुपर्ने रहेछ । त्यो पनि हालेँ । बुझाउन दुई जनालाई पठाएकाे थिएँ । सबै कागजात सिल गर्ने भनिएको थियो, सिल गरेर पठाएँ । सिल गरेको जहाँ पनि खोल्न हुँदैन । एक कर्मचारीले सबै फुकालेर नेपाली फाइल पेपर ल्याउन भनिन् । सिल गरेर पठाएको भिजन पेपर निकालेर टेबलभरि छताछुल्ल गरियो,’ उनले आवेदन दिँदाको अनुभव सुनाइन् ।

प्राध्यापकको स्वाभिमानमाथि प्रहार भएको तर्क उनको थियो । ‘सेक्सन अफिसर हो कि को हो, तपाईंलाई थाहा छैन के गर्नुपर्छ भनेर...। ४३ जनाले उपकुलपतिका लागि हो । सबैको आफ्नो परिचय छ,’ उनले भनिन् । कर्मचारीलाई त्यसरी गाली गर्ने हो भनेर आफूले प्रश्न गरेको प्राध्यापक रायमाझीले बताइन् ।

बायोडाटासमेत नचिन्ने कर्मचारी रहेको प्राध्यापक रायमाझीले बताइन् । ‘बायोडाटा दिनुस् भने । मैले यही हो भनेर देखाए । कर्मचारील ए हो रहेछ...भने । पाँचवटा किताब दिए । रिसर्च किताब बुक फममा थियो । रिसर्च यस्तो हुँदैन भन्छ,’ उनले थपिन्, ‘सेक्सन अफिसरले हाल्दे हाल्दे भन्यो । अनडिग्नीफाइड भयो ।’

उपकुलपति पदको अपमान गरिएको उनकाे गुनासो छ । ‘यो त भाइस चान्सलरको पोजिसन हो । कुनै कर्मचारीलाई पद दिन लागेको त होइन नि । प्राज्ञिक क्षेत्र हो,’ उनले भनिन्, ‘इज्जत दिनुपर्‍यो नि । विश्वविद्यालय देशको पिलर हो । राजनीतिक नेतृत्वले हामीलाई खसालेर... ।’

सर्च कमिटीमा लेक्चरर राखेकोमा पनि उनले प्रश्न गरिन् । ‘सर्ट लिस्ट गर्ने मान्छे अन्तर्वार्ता लिने लेक्चरर । नेताको कर्मचारी त होइनौँ नि । उपकुलपतिलाई कुन लेवलमा राखेको रहेछ त,' उनले प्रश्न गरिन् । प्रधानमन्त्रीले निष्पक्ष गर्छु छलाङ मार्छु भने पनि त्यसो हुन नसकेको उनको भनाइ छ । ‘रेस्टुरेन्टमा सबै मेन्यु हेर्‍यो, अन्तिममा म:म: नै खानेजस्तो भयो,’ उनले भनिन् ।

बौद्धिक चोरीको आरोप लागेका व्यक्ति सर्ट लिस्टमा पर्नुको दोषी राजनीतिक नेतृत्व पनि रहेको उनले बताइन् । ‘उपकुलपतिका लागि सर्ट लिस्टमा परेकालाई बौद्धिक चोरीको आरोप छ । 'उसले त आवेदन दियो । लिस्टमा पर्नुमा लिडरको पनि फल्ट छ', उनले भनिन्, ‘अब के–के काण्ड भन्छन् । योचाहिँ टीयू काण्ड हो ।’

आफू कुनै राजनीतिक धारमा पनि नरहेको उनले बताइन् । ‘आवेदन दिएपछि कुन धारको हो भनेर सोधियो । म कुनै धारको होइन,’ उनले भनिन् । ३ पुसमा छनोट तथा सिफारिस समितिले १५ दिनको समय दिएर आवेदन मागेको थियो । जसमा ४३ जनाले आवेदन दिएकोमा १ जनाको अस्वीकृत भएको थियो । र, ४२ जनाबाट २५ माघमा १४ जनाको सर्ट लिस्ट सार्वजनिक गरिएको थियो ।

सम्बन्धित समाचार