त्रिविको उपकुलपति छनोट: सांसदहरूले भने- प्रधानमन्त्रीलाई समितिमा बोलाऔँ

A+ A A-

त्रिविको उपकुलपति छनोट प्रक्रियामा प्रश्न उठेपछि सांसदहरूले प्रधानमन्त्री एवं कुलपति पुष्पकमल दाहाल प्रचण्डलाई संसदीय समितिको बैठकमा बोलाउन माग गरेका छन् ।

सोमबार संसदको शिक्षा समितिमा राष्ट्रिय स्वतन्त्र पार्टीकी सांसद सुमना श्रेष्ठ र एमाले सांसद विद्या भट्टराईले कुलपतिलाई बैठकमा बोलाउन माग गरेका हुन् । 'प्रधानमन्त्री एवं कुलपति चाहियो । प्रधानमन्त्रीले आश्वासन दिएको अनुसार काम भएको छैन,' सांसद श्रेष्ठले भनिन् ।

यस्तै, एमाले सांसद भट्टराईले समिति सभापति भानुभक्त जोशीलाई प्रधानमन्त्री बोलाउन पटक-पटक आग्रह गर्दा पनि सुनुवाइ नभएको गुनासो गरिन् । 'सभापतिज्यूसँग गुनासो छ, हाम्रो माग सुनुवाइ भएन । प्रधानमन्त्री एवं कुलपति नै समितिको बैठकमा आउनुपर्छ,' उनले भनिन् ।

त्यसअघि समितिको बैठकमा शिक्षा विज्ञान तथा प्रविधि राज्यमन्त्री प्रमिला कुमारीले त्रिभुवन विश्वविद्यालयको उपकुलपति छनोट नियमसंगत भएको दाबी गरेकी थिइन् । सर्ट लिस्टमा परेका १४ जनामध्ये केही व्यक्तिका नाममा प्रश्न उठेपछि बैठकमा उपस्थित राज्यमन्त्री कुमारीले कसैका विरुद्ध सिफारिस समितिमा उजुरी नपरेको बताइन् । पूर्वउपकुलपति तीर्थ खनियाँलाई बौद्धिक चोरीको आरोप लागेको छ तर उनी सर्ट लिस्टमा परेका छन् ।

'पूर्वपदाधिकारी हुनुहुन्छ । बौद्धिक चोरीको आरोप लाग्यो तर उहाँविरुद्ध उजुरी परेको छैन,' उनले भनिन् । कार्यवाहक उपकुलपति शिवलाल भुसाललाई सूचना लुकाएको आरोप छ । तर, भुसालका विषयमा पनि उजुरी नपरेको मन्त्री कुमारीले बताइन् । 'सूचना लुकाएको आरोप छ, जो निमित्त भीसी हुनुहुन्छ । सर्ट लिस्टमा पर्नुभएको छ तर उजुरी परेको छैन । सिफारिस समितिले प्रक्रिया अगाडि बढाएको छ । सबै काम कानुनसंगत भएका छन्, ' मन्त्री कुमारीले भनिन् ।

शिक्षा मन्त्रालयका सचिव सुरेश अधिकारीले अहिले सर्च कमिटी नभई सिफारिस समिति रहेको बताए । 'सर्च कमिटी होइन, अहिलेको सिफारिस समिति हो । समितिले एप्लिकेसन आह्वान गर्‍यो । प्रिजेन्टेसन भयो । मेरिटका आधारमा कुलपतिलाई सिफारिस गर्ने हो,' उनले भने । सहकुलपति एवं शिक्षामन्त्री अशोक राईलाई समितिको बैठकमा बोलाइएको थियो । तर, मन्त्री राई बाहिर रहेको भन्दै समितिको बैठकमा राज्यमन्त्री कुमारी उपस्थित भएकी हुन् ।

प्रकाशित मिति: सोमबार, माघ २९, २०८० १२:१४