संरक्षणको पर्खाइमा मुस्ताङको ढि खोलाको तातोपानी मुहान

A+ A A-

मुस्ताङको लो–घेकर दामोदरकुण्ड गाउँपालिका– ४, ढि खोलाको तातोपानीको मुहान उपयोग र संरक्षणको पर्खाइमा छ । अध्ययन अनुसन्धान र उपयुक्त प्रविधिको पहिचान हुन नसक्दा ढि खोलाले बनाएको खोँचभित्र रहेको तातोपानीको मुहानलाई प्रयोगमा ल्याउन नसकिएको हो ।

लो–घेकर दामोदरकुण्ड गाउँपालिका– ४ का पूर्ववडाध्यक्ष हीरा गुरुङले ढि खोलाको तातोपानी खेर गइरहेको बताए । 'चिसो हावापानी र मौसम हुने मुस्ताङको तातोपानी प्रकृतिको वरदान हो,' उनले भने, 'तातोपानीलाई व्यवस्थित रूपमा उपभोग गर्न सक्ने हो भने पर्यटन र आर्थिक हिसाबले धेरै राम्रो हुने थियो ।'

मुहानको तातोपानीलाई नजिकै स्नानगृह र पोखरी बनाएर प्रयोगमा ल्याउन पहल गरिए पनि अनुसन्धान तथा प्रविधिमा पहुँच नपुग्दा सफल हुन नसकेकामा पूर्ववडा अध्यक्ष गुरुङले चिन्ता व्यक्त गरे ।

खोँचभित्र पहाडबाट तातोपानीको फोहोरा निस्कने गर्छ । बर्खामा तातोपानीको फोहोराभन्दा माथि खोलाको सतह पुग्छ । हिउँदमा खोलामा हिँडेर करिब ५० डिग्री सेल्सियस तातोपानीको फोहोरा निस्कने ठाउँसम्म सहजै पुग्न सकिने लो–घेकर दामोदरकुण्ड गाउँपालिका– ४, ताङ्ग्या गाउँका पासाङ छिरिङ गुरुङले बताए ।

'पाइपबाट जस्तै गरी पहाडको प्वालबाट निस्कने तातोपानीको फोहोराले मानिसलाई ढलाउला झैँ गर्छ,' उनले भने, 'मुहानबाट आएको तातोपानी मिसिएको खोलामा स्नान गर्न सकिन्छ ।' तातोपानीको मुहानवरपर झरना र तलाउ चिसोले जमेर बरफ बनेको छ । बेनी–जोमसोम–कोरला सडकमा पर्ने लो–घेकर दामोदरकुण्ड गाउँपालिकाको केन्द्र चराङ गाउँदेखि ३० मिनेट गाडीमा यात्रा गरेपछि ढि गाउँमा पुगिन्छ । ढि गाउँदेखि ३० मिनेट पैदल हिँडेर तातोपानीको मुहानमा पुग्न सकिन्छ । साविक सुर्खाङ गाविसको भूगोलमा रहेको यो तातोपानीको मुहाननजिकै सुर्खाङ, ढि, यारा र घारा गाउँ छन् ।

उपल्लो मुस्ताङ घुम्न आउने पर्यटकका लागि ढि खोलाको तातोपानी नयाँ आकर्षण बन्न सक्ने सम्भावना छ । दिगो रूपमा बाह्रै महिना नियमित तातोपानीलाई प्रयोगमा ल्याउने आधार पहिचान गर्न अध्ययन अनुसन्धानको आवश्यकता रहेको पूर्ववडाध्यक्ष गुरुङले बताए ।

स्थानीयवासीका अनुसार मुस्ताङको पूर्वराजपरिवारका सदस्य स्नानका लागि ढि खोलामा आउने गर्दथे । उनीहरूले मुहाननजिकै स्नानका लागि आउनेहरूका लागि आश्रयस्थल बनाइदिएका थिए । स्थानीयवासीहरू हिउँदयाममा ढि खोलाको तातोपानी नुहाउन जान्छन् । व्यवस्थित हुन नसकेकाले पर्यटक भित्र्याउन सकिएको छैन । गण्डकी प्रदेशसभा सदस्य विकल शेरचनले ढि खोलाको तातोपानीलाई व्यवस्थित गर्न पहल गरिने बताए ।

प्रकाशित मिति: बिहीबार, माघ १८, २०८० ०९:१३