गायक बन्न नदिने भएपछि घर छोडेर भागेका कञ्चनपुरे मकर

A+ A A-

बाल्यकालमा रेडियो नेपालमा घन्केका गीत सुनेर लट्ठै पर्ने मकरबहादुर योञ्जन ती शब्द तुरुन्तै कापीमा उतारेर कण्ठस्थ पार्थे । अनि स्कुलमा गएर साथीहरूलाई गाएर सुनाउँथे । उनको आवाजको साथीहरूले खुब प्रशंसा गर्थे । त्यही बेलादेखि हो उनमा गायक बन्ने सपना सवार भएकाे ।

२०३९ सालमा सर्लाहीमा जन्मेका योञ्जन ‘फेवा तालको आँगनमा लैलै, माछापुच्छ्रे छाया, जीवन मेरो सेती बगर बिनातिम्रो माया’ गुनगुनाउँदै सुनाउँछन् । भन्छन्, ‘त्यस समय रेडियोमा बज्ने यस्ता गीत आजसम्म पनि बिर्सन सकेको छैन ।’

यो पनि..

गाउँका लोपोन्मुख भाका ब्युँताउने सपनाले माइक समातेका फिदिमे नोगेन (भिडियोसहित)

त्यसबेलाबाटै आफूमा गायनको लत बसेको उनी बताउँछन् । सुरिलो स्वरका कारण उनलाई सबैजसोले औधी रचाउँथे, माया गर्थे । साथीबाट पाएको यस्तै हौसलाले आफूलाई संगीत क्षेत्रमा अघि बढ्न आत्मविश्वास प्रदान गरेको उनी बताउँछन् ।

मकरको सपना संगीत अनि संगीत थियो । तर, परिवारले उनको अर्कै भविष्य सोचिरहेको थियो । त्यसैले गायनमा पूर्णकालीन हुने उनको योजना परिवारलाई फिटिक्कै मन परेन । तर, मकरको मगजमा संगीतभन्दा अरु केही पस्नै मानेन । २०५८ सालमा घर छाडेर उनी भागे । यसरी गायक बन्ने सपनाले उनलाई काठमाडौंसम्म ल्याइपुर्‍यायो ।

तर, काठमाडौंमा उनले संगीत सिक्ने ठाउँ भेटेनन् । काठमाडौं आएको दुई वर्ष बितिसकेको थियो। संगीत सिक्ने सोच अधुरै थियो । कसैले सुनाइदियो शास्त्रीय संगीत सिक्न त भारत जानुपर्छ । केही नसोची उनी भारततिर हानिए, जहाँ उनले चिनेजानेका कोही थिएनन् ।

भारत पुगेका उनले सुरुवाती दिनमा खान बस्न नै कम संर्घष गर्नुपरेन । होटलको हेल्परदेखि वेटर, अनि पाएसम्म र भ्याएसम्म सबै काम गरे । भन्छन्, ‘त्यतिबेला मैले महसुस गरेँ- संगीतमा लाग्नुभन्दा पहिले दालभातको पनि जोहो गर्नुपर्ने रहेछ ।’ त्यही संघर्षले नै आफूलाई जीवनमा अगाडि बढ्न सिकाएको मकर बताउँछन् ।

यो पनि..

सोलुको स्वर सुनाउन काठमाडौं आएका लोखिम गाउँका कुमार (भिडियो)

बिस्तारै संगीतको लहरो समात्न पुगेका उनले भारतका राष्ट्रियस्तरका गजल तथा गायन प्रतियोगितामा उपाधि चुमे । पछि मञ्चहरूमा गाउने अवसर पाउँदै गए । विभिन्न लाइभ कन्सर्ट गर्न थाले । दुई दशकसम्म उनले भारतमा सांगीतिक अनुभवहरू सँगाल्न पाए । तर, मकर नेपालमै बसेर केही गर्न चाहन्थे । आफूभित्र संगीतको सपना भर्ने नेपाल नै थियो भन्ने कुरा उनले सम्झिए । भारतमा उनलाई धेरैले चिन्न थालेका थिए । तैपनि नेपाल फर्किने कुनै बहाना खोजिरहेका थिए ।

अरू पनि..

नेपालमा ‘द भ्वाइस अफ नेपाल सिजन ५’ को अडिसन खुल्दै थियो । साथीहरूसँगै परिवारले समेत उनलाई भ्वाइसमा सहभागी हुन सल्लाह दिए । भारतबाट भ्वाइसको डिजिटल अडिसनमा सहभागी भए ।

अडिसनमा योञ्जन छनोट मात्र भएनन्, यतिखेर द भ्वाइस अफ नेपाल सिजन- ५ मा सहभागीमध्ये सबैभन्दा जेठा प्रतिस्पर्धी तथा लोकप्रिय प्रतिस्पर्धी पनि बन्न सफल भएका छन् । उनलाई यस सिजनको दाबेदारको रूपमा समेत हेरिएको छ । हिजोको एपिसोडदेखि उनका प्रतिस्पर्धीमध्ये एक विवेक बस्नेत बाहिरिएका छन् । आज थप एक जना बाहिरिने छन् । त्यसपछि फाइनलिस्ट ४ जनाबीच प्रतिस्पर्धा हुने छ ।

रियालिटी शोको उपाधि जिते पनि नजिते पनि अब नेपालमै रहेर पर्यावरणका क्षेत्रमा काम गर्ने सोचमा रहेका योञ्जन भ्वाइसमार्फत नेपाली जनताले दिएको माया आफ्ना लागि अविस्मरीय रहेकाे बताउँछन् ।