गाउँका लोपोन्मुख भाका ब्युँताउने सपनाले माइक समातेका फिदिमे नोगेन (भिडियोसहित)

गाउँका लोपोन्मुख भाका ब्युँताउने सपनाले माइक समातेका फिदिमे नोगेन (भिडियोसहित)

A+ A A-

सानैदेखि गायक बन्ने सपना थियो उनको । मञ्च पायो कि गाउन अघि बढिहाल्थे । गायनप्रति उनको पागलपन देखेरै अभिभावक पनि उनलाई कक्षा २ मा पढ्दादेखि नै संगीत कक्षा भर्ना गरिदिन बाध्य भए । अनि लगातार ७ वर्ष उनले पाँचथर फिदिमको न्यु वरदान संगीतालयमा बुद्धराज लिम्बूसँग संगीत सिके । फिदिम नगरपालिका- १० का नोगेन लिम्बू हाङ्सरुम्बा अहिले १९ वर्षका भए ।

सफल गायक बन्ने सपना बोकेर तीन वर्षअघि काठमाडौं आएका उनले तीन दर्जनजति गीत रेकर्ड पनि गराइसकेका छन् । यद्यपि, गायनमा उनलाई अझै अघि जानु छ । भन्छन्, ‘म आफूसँगै पूर्वको कुनामा रहेको पाँचथरलाई चिनाउन चाहन्छु । हाम्रो गाउँठाउँमा बाजेबजुहरूले गाउँने पुराना भाकाहरूलाई ज्यान दिन चाहन्छु । यसका लागि म यतिमै सीमित भएर हुँदैन,’ शिलापत्रसित उनले भने ।

उनी यतिबेला रियालिटी शो द भ्वाइस अफ नेपालको उपाधि कसरी जित्ने भन्ने ध्याउन्नमा छन् । नोगेन कोच प्रमोद खरेलको समूहबाट प्रतिस्पर्धा गरिरहेका छन् । यो समूहमा मनाङकी तेन्जिङ डोल्मा गुरुङ पनि छिन् । अबको यात्रा अडियन्सको हातमा छ । टप ८ मा नाेगन लिम्बूसँगै कुमार प्रयास, मकरबहादुर योञ्जन, मोनिका राई, तेन्जिङ डोल्मा गुरुङ, विवेक बस्नेत, विनोद राई र त्रिजा प्रधान छन् ।

‘बल्लबल्ल यहाँसम्म आइपुगेको छु, जिते पनि नजिते पनि सपना पूरा गर्न काम गरिरहनेछु’, नोगेनले भने । उनी आफ्नो परिवार कलाप्रेमी रहेको बताउँछन् । भन्छन्, ‘बुबा देउमान लिम्बू, आमा सरिताको साथ नभएको भए म कहाँ यहाँसम्म आउन सक्थेँ होला र ! मेरो भाइ विवेक पनि राम्रो नाच्छ, मोडल बन्ने उसको सपना छ ।’

आफ्ना सन्तानको प्रतिभा चिनेर त्यसको प्रस्फुटन गर्न अभिभावकले साथ दिनुपर्ने नोगेन बताउँछन् । भन्छन्, ‘मैले ९/१० वर्षको उमेरदेखि गाउन थालेको हुँ । स्कुलका र स्कुलबाहिर हुने कुनै पनि सांगीतिक कार्यक्रमहरूको मञ्च अक्सर छुटाउँदिनथेँ । मलाई मेरा अभिभावकले सघाउनुभयो ।’

फिदिमकै नयाँ नमुना माविबाट एसईई, फिदिम माविबाट प्लस टु गरेका उनी अहिले स्नातक पहिलो वर्षमा आर्ट्स पढिरहेका छन् । ‘ब्याचलर फिदिममै भर्ना भएको छु तर काठमाडौंमै संघर्ष गर्ने भएपछि यतै सार्ने तयारीमा छु,’ उनले सुनाए ।

एक महिनामा ३० गीत रेकर्ड

आफ्नो गायनमा सर्ट भिडियो प्लेटफर्म टिकटक र सामाजिक सञ्जाल फेसबुकको महत्त्वपूर्ण मद्दत रहेको नोगेन बताउँछन् । नेपालमा अहिले टिकटक प्रतिबन्धित छ । तर, खुला रहेका बेला नोगन टिकटकमै गाएर सर्ट क्लिप्स हाल्ने गर्थे । ‘धेरैले मन पराएर उत्साहित प्रतिक्रिया दिनुहुन्थ्यो, मलाई त्यसले थप मिहिनेत गर्न हौसाउँथ्यो’, उनले भने ।

यो पनि..

सोलुको स्वर सुनाउन काठमाडौं आएका लोखिम गाउँका कुमार (भिडियो)

टिकटक र फेसबुकमा भिडियो हाल्दाहाल्दै उनलाई कसैले काठमाडौं जान सुझायो । र, २०७७ सालमा उनले काठमाडौंका लागि झोला कसे । नोगेन सम्झिन्छन्, ‘फेसबुक र टिकटकमा हालेको भिडियोको थप प्रभाव काठमाडौं आएपछि थाहा पाएँ । बादल लिम्बूको संगीत र सत्यराज चौलागाईंको शब्दमा रहेको ‘एक्लो बनायौ’लगायत केही गीतमा आवाज दिएँ । काठमाडौं छिरेकै महिनामा मैले ३० वटाभन्दा बढी गीत गाएँ ।’

आगामी दिनमा पाँचथरमा बिहेबटुलामा गाउने भाकादेखि लोप भइसकेका काँठे गीतहरूलाई ब्युँताउने उनको योजना छ । गाउँघरमा घाँस-दाउरा, पानी पँधेरीमा पानी भर्दा, मेलापात गर्दा र विभिन्न चाडपर्व र उत्सवहरू मनाउँदा हालिने भाकाहरूलाई पुनर्जीवन दिने उनको योजना छ । भन्छन्, 'लिम्बू समुदायमा लोकप्रिय हक्पारे, पालाम, हम्लाक्वा, ख्याली, केसाम आदिलाई नयाँ पुस्तामाझ थप लोकप्रिय बनाउन कोसिस गर्नेछु ।'