विश्वस्तरीय फुटबलको झल्को दिने त्यो खेल

A+ A A-

दोस्रो संस्करणको नेपाल सुपर लिगको प्लेअफका दुई खेल सकिएका छन् । क्वालिफायर– १ मा धनगढीले पोखरामाथि पेनाल्टी सुटआउटमा रोमाञ्चक जित निकाल्दै फाइनलमा आफ्नो स्थान सुरक्षित गरेको छ भने एलिमिनेटरमा ललितपुर सिटी एफसीले काठमाडौंमाथि ३–० को जित निकाल्दै क्वालिफायर–२ मा पोखरासँगको भेट पक्का गरेको छ ।

यी दुवै खेलले कुनै विश्वस्तरीय टोलीबीच भएको प्रतिस्पर्धाको झल्को दिएको थियो । क्वालिफायर–१ अन्तर्गत पोखरा थन्डर्स र धनगढी एफसीबीचको खेल ऐतिहासिक बन्यो । निर्धारित ९० मिनेट र अतिरिक्त समयमा पनि खेलको नतिजा नआउँदा खेल पेनाल्टी सुटआउटमा गएको थियो । नेपाल सुपर लिगको दोस्रो संस्करणमा आइपुग्दासम्म यसअघिका कुनै पनि खेल पेनाल्टी सुटआउटमा गएका थिएनन् ।

यस संस्करणका अन्य खेलहरूमा भन्दा सोमबार दशरथ रंगशालामा भएको पोखरा र धनगढीबीचको प्रतिस्पर्धामा दर्शकहरूको उपस्थिति उल्लेखनीय थियो । रंगशालामा छुट्टै किसिमको रौनक छाएको थियो भने सुरुवाती समयदेखि नै खेलको ‘टेम्पो’ उच्च थियो । त्यसलगत्तै खेल सुरु भएको पाँचौँ मिनेटमा पोखराका लागि आयुस घलानले गोल गरे । पहिलो हाफभरि पोखरा धनगढीमाथि हावी भएको थियो । पोखराले गोल गर्ने उत्कृष्ट मौकाहरू बनाएको थियो भने पोजेसन पनि आफ्नो पक्षमा राख्न सफल भएको थियो । यता, धनगढीले पनि निकै उत्कृष्ट प्रहारहरू नगरेको भने होइन । तर, पहिलो हाफको समाप्तिमा पोखराले एक गोलको अग्रतालाई कायम राख्न सफल भयो ।

दोस्रो हाफमा धनगढी केही फरक योजनाका साथ मैदानमा उत्रियो । खेल सुरु हुनासाथ धनगढीले पोखराविरुद्ध आक्रामक फुटबल खेल्न थाल्यो र खेलको ५३औँ मिनेटमा धनगढीका कप्तान देवेन्द्र तामाङले पोखराविरुद्ध बराबरी गोल गरे ।

यसबीचमा पोखराले पनि धनगढीको पोस्टमा उत्कृष्ट प्रहार गर्‍यो । तर, धनगढीको गोल पोस्टमा गोलकिपर मोहम्मद ताहा भित्ता जसरी खडा भए । उनले उनीमाथि प्रहार भएको बललाई छेके र धनगढीलाई खेलमै राख्न सफल भए ।

खेलको निर्धारित ९० मिनेट र त्यसपछि थपिएको ७ मिनेटमा पनि दुवै टोली बराबरीको स्थितिमा रहेका थिए । खेलमा अतिरिक्त समयको रूपमा ३० मिनेट थपियो । अतिरिक्त समयको पहिलो हाफमा पोखराका स्टेफन एनोरले गोल गरे र पोखराले खेलमा पुनः एकपटक अग्रता लियो ।

अतिरिक्त समयको केही सेकेन्ड मात्रै बाँकी रहेको अवस्थामा धनगढीका लागि क्वालिफायर–१ बाट सिधै फाइनलमा जाने लगभग सबै ढोका बन्द भइसकेजस्तै थियो । तर, धनगढीका अहमद हिजाजीले खेलको १२०औँ मिनेटमा गोल प्रहार गरे र खेल पेनाल्टीतर्फ लम्कियो ।

पेनाल्टी सुटआउटमा दुवै टोलीले सुरुवातको दुई प्रहारलाई गोलमा परिणत गर्न सफल भए । धनगढीका लागि तेस्रो पेनाल्टी प्रहार गर्न आएका हिजाजीको प्रहार भने पोखराका किपर प्रिसोले रोके । पोखरालाई खेलमा फेरि एकपटक अग्रता लिने मौका बन्यो । पोखराका खेलाडीले तेस्रो प्रहारलाई पनि गोलमा परिणत गर्दै ३–२ को पोखराले अग्रता लियो ।

धनगढीले बाँकी दुई पेनाल्टीलाई गोलमा परिणत गर्न सफल भयो तर पोखराका लागि चौथो पेनाल्टी प्रहार गरेका लिगका सर्वाधिक गोलकर्ता मोजेज र पाँचौँ पेनाल्टी प्रहार गरेका पोखराका मार्की खेलाडी आयुस घलानले पेनाल्टीलाई गोलमा परिणत गर्न चुके र धनगढी पेनाल्टीमा ४–३ ले विजयी हुँदै नेपाल सुपर लिगको फाइनलमा प्रवेश पायो ।

यता, मंगलबार काठमाडौं र ललितपुरबीचको एलिमिनेटर खेल ललितपुरका लागि नयाँ उपलब्धि बन्न पुगेको थियो । यसअघिका तीन खेलमा काठमाडौंविरुद्ध एक गोल पनि नगरेको र तीनै खेलमा पराजित भएको ललितपुरले काठमाडौंविरुद्ध ३–० को जित निकाल्दै क्वालिफायर–२ का लागि छनोट भयो । गत सिजनको प्लेअफमा काठमाडौंविरुद्ध ३–० गोलले पराजित ललितपुरले गत सिजनकै स्कोरलाइनलाई यसपटक आफ्नो पक्षमा पारेर काठमाडौंसँग बदला लियो ।

बिहीबार क्वालिफायर–२ अन्तर्गत पोखरा र ललितपुरले प्रतिस्पर्धा गर्दै छन् । क्वालिफायर–२ को विजेताले धनगढीसँगै फाइनलमा स्थान बनाउनेछ ।

प्रकाशित मिति: बुधबार, पुस ११, २०८० १६:३७