शान्ति प्रक्रियाका बाँकी काम टुंग्याउन शीर्ष नेताहरू सकारात्मक

A+ A A-

शान्ति प्रक्रियाका बाँकी काम टुंग्याउन शीर्ष नेताहरू सकारात्मक देखिएका छन् । सोमबार प्रधानमन्त्री निवास बालुवाटारमा बसेको शीर्ष नेताहरूको बैठक सकारात्मक रहेको हो ।

सरकार पीडित केन्द्रित कानुन बनाउने कुरामा तयार भएकाले शीर्ष नेताहरूबीच टीआरसी विधेयक टुंग्याउनेतर्फ सकारात्मक देखिएका हुन् । बैठकपछि सञ्चारकर्मीहरुसँग कुरा गर्दै एमाले सचेतक महेश बर्तौलाले नेकपा एमाले, नेपाली कांग्रेस, नेकपा (माओवादी केन्द्र) का नेताहरूको छलफल भएको र पीडितमैत्री कानुन बनाउने हो भने तत्काल प्रक्रिया अघि बढ्ने बताए ।

'सकारात्मक निस्कर्ष भनेको आगामी संसदको अधिवेशन विषय लैजाने र केही दिनमा पुनः शीर्ष नेताहरूको छलफल हुने भन्ने निस्कर्ष छ । विषय खुलेको छ । भिक्टिम सेन्ट्रिक कानुन बनाउने कुरामा सरकार तयार छ, सकारात्मक ढंगबाट अघि बढ्ने अवस्था देखिएको छ,’ उनले भने ।

पीडितले न्याय पाएको अनुभूति गर्ने गरी कानुन बन्ने सहमति शीर्ष नेताहरूमा जुटेको र आउँदो हिउँदे अधिवेशनमा टीआरसी विधेयक संसदमा प्रस्तुत हुने बर्तौलाले बताए । सरकार पीडितमैत्री कानुन बनाउन सकारात्मक भएकाले आउँदो अधिवेशनमा विधेयक प्रस्तुत गर्ने सहमति करिब जुटेको उनको भनाइ छ ।

‘शान्ति प्रक्रियालाई टुंगोमा पुर्‍याउन कसरी अघि बढ्न सकिन्छ भनेर विशेष गरी तीन दल नेकपा एमाले, नेपाली कांग्रेस, नेकपा (माओवादी केन्द्र) बीचका नेताहरूको छलफल भयो,' उनले भने, 'पीडितमैत्री कानुन बनाउने हो भने तत्काल अघि बढोस् । आउँदो हिउँदे अधिवेशनमा भिक्टिमले न्याय पाएको अनुभुति गर्नेगरी कानुन बन्ने हो भने नेकपा एमाले यही कुरा भनिरहेका छौँ । सरल ढंगले अघि बढ्छ ।'