भारत जाँदै गरेको जहाजमा हुथीको ड्रोन आक्रमण, विश्वमा महँगी बढ्ने त्रास कायमै

भारत जाँदै गरेको जहाजमा हुथीको ड्रोन आक्रमण, विश्वमा महँगी बढ्ने त्रास कायमै

A+ A A-

भारत जाँदै गरेको जहाजलाई यमनका हुथी विद्रोहीले ड्रोनबाट आक्रमण गरेको अमेरिकाले जनाएको छ । अमेरिकी रक्षा विभागले रेड सी हुँदै भारत जाँदै गरेको जहाजमा आक्रमण भएको जानकारी दिएको हो ।

अमेरिकाका अनुसार केम प्लुटो नामक कार्गो जहाज शनिबार बिहान १० बजे हुथीको ड्रोनको निशानामा परेको थियो । आक्रमणसँगै उक्त जहाज अमेरिकाको सम्पर्कमा पुगेको थियो ।

भारतको नौसेनाका अनुसार एमभी साईबाबा जहाजमा २५ भारतीय चालकदलका सदस्य थिए । उक्त जहाज जापानको भएको र त्यो अमेरिकाले दाबी गरेजस्तै भारतीय झण्डावाहक जहाज नभएको पनि भारतले जनाएको छ ।

आक्रमणपछि पनि भारतीय चालकदलका सदस्यलाई केही नभएको बताइएको छ । यमनको सलिफ बन्दगरगाहदेखि करिब ४५ माइल टाढाको समुद्री क्षेत्रमा भारतीय जहाजमाथि आक्रमण भएको हो । उक्त आक्रमणपछि ठूलो धमाका भएको अमेरिकाले जनाएको छ ।

त्यसपछि नै अमेरिकाले भारतीय चालकदलका सदस्य रहेका जहाज नजिकै अमेरिकी युद्धपोत यूएसएस लबुनलाई त्यहाँ पठाएको थियो । हुथीले त्यसपछि नर्वेको अर्को तेल ट्यांकरमा पनि आक्रमण गरेको अमेरिकी भनाइ छ । उक्त आक्रमणलाई आफूहरूले विफल बनाएको अमेरिकी दाबी छ ।

अमेरिकाका अनुसार रेड सी जलक्षेत्रमा पछिल्लो ७० दिनमा हुथी विद्रोहीले १५ वटा जहाजमाथि आक्रमण गरिसकेका छन् । एक महिना अगाडि मात्र हुथी विद्रोहीले रेड सी हुँदै तैरिरहेको इजरायली कार्गो विमान आक्रमण गर्दै कब्जा गरेको थियो ।

रेड सीमा हुथीको आतंकले विश्वमा तेलसँगै सबै सामग्रीको मूल्य बढ्ने अनुमान छ । वास्तवमा रेड सी त्यो रणनीतिक जलमार्ग हो, जसले हजारौँ किलोमिटरको समुद्री जलमार्गलाई छोट्याउँछ । यो सागर तरल प्राकृतिक ग्यास ढुवानी, साथै अन्य उपभोग्य सामानहरूका लागि संसारको सबैभन्दा महत्त्वपूर्ण मार्गहरूमध्ये एक हो । रेड सीनजिकै स्वेज नहर पनि छ ।

यो जलमार्गले युरोप र एसियालाई लामो बाटो छाडेर छोटो समुद्री बाटोको विकल्प प्रदान गर्दछ, जसले व्यापारीक जहाजलाई गन्तव्यमा छिटो पुग्न मद्दत गर्छ । तर, हुथी विद्रोहीको आक्रमणले यतिबेला विश्वभरका व्यापारिक जहाज उक्त जलमार्ग प्रवेश गर्न डराएका छन् ।

यसो हुँदा अब विश्वभरका व्यापारिक जहाजले लामो बाटो तय गर्नुपर्ने हुन्छ । जसका कारण अब तेलसँगै सबै सामग्रीको मूल्य विश्वभर बढ्ने विज्ञहरू बताउँछन् ।

यमनका हुथी विद्रोहीहरूले हमासको समर्थनमा लगातार रेड सीमा तैनाथ अमेरिकी जहाजमाथि आक्रमण गरेपछि धेरै कम्पनीहरूले यो मार्गबाट ढुवानी रोकेका छन् । हुथीहरूले इजरायलीहरूसँगको युद्धमा हमासलाई समर्थन गरेको घोषणा गरेका छन् र उनीहरूले इजरायलतर्फ जान लागेका जहाजलाई निशाना बनाउने बताइसकेका छन् ।एजेन्सीको सहयोगमा

प्रकाशित मिति: आइतबार, पुस ८, २०८० १३:०८