ओत लाग्न त्रिपाल र टेन्ट छैन, एकद्वार प्रणालीबाट कसरी भइरहेको छ राहत वितरण ?

A+ A A-

‘त्रिपाल र टेन्टको पूर्ण रूपमा अभाव छ । ७ हजार घरधुरीलाई कहाँबाट पुर्‍याउने ? दुर्गम पालिका भएकाले टोल टोलमा पुर्‍याउन पनि गाह्रो भएको छ,’ रुकुम पश्चिम आठबिसकोट नगरपालिकाकी उपप्रमुख धनकुमारी शाहीले शिलापत्रसँग भनिन् । भूकम्प गएको चार दिन पुगिसक्दा पनि राहत सामग्री पर्याप्त नआएको उनको गुनासो छ ।

जिल्ला प्रशासन कार्यालय र संघसंस्थाबाट आएको राहत सामग्री भने वडामार्फत प्रभावितको घरदैलोमा पुर्‍याउने काम भइरहेको उनले बताइन् । ‘दुर्गम ठाउँ भएकाले समयमा राहत पुर्‍याउन सकिएको छैन । संस्था र जिल्लाबाट आएको राहत वितरण भइरहेको छ,’ उनले भनिन् ।

प्रभावित क्षेत्रमा विशेषगरी चिसोमा ओत लाग्न त्रिपाल र टेन्ट नभएकाले स्थानीय बिरामी पर्न थालेका छन् । भूकम्प प्रभावितहरूको अवस्था नाजुक बन्दै गएको स्थानीयको गुनासो छ । ‘चिसो रात र खुला चौरमा बस्न बाध्य बालबालिका र वृद्धवृद्धाहरू बिरामी हुने अवस्थामा पुगेका छन् । राहत पनि आएको छैन,’ आठबिसकोट नगरपालिका-१४, ज्यामिरकोटकी अृमता मल्लले भनिन् ।

368027676_300849739453075_2106871507774477638_n1699343439.jpg

अर्का स्थानीय महेश मल्ल घर भत्किएर खुला चौरमा बस्न विवश भएको बताउँछन् । ‘सरकारले राहत दिन्छौँ भनेर आश्वासन मात्र दियो,’ उनले गुनासो गरे । रुकुम पश्चिमका सहायक प्रमुख जिल्ला अधिकारी प्रवेश बढुवाल जिल्लामा आएका राहत सामग्री प्रभावित क्षेत्रमा पठाइएको बताउँछन् । ‘जिल्लामा राहत सामग्री छैन । प्रभावित क्षेत्रमा पठाएका छौँ,’ उनले भने । उनका अनुसार जिल्लामा २३ वटा संघसंस्थाबाट राहत पुगेको छ ।

‘पालिकाहरूले माग गरे अनुसार राहत पठाएका छौँ । कतिपय दुर्गम ठाउँमा पुग्न ढिला भएको हो,’ उनले भने । जिल्ला विपद् व्यवस्थापन समितिको समन्वयमा जिल्ला प्रशासन कार्यालयले प्रभावित पालिकामा राहत पठाइएको उनले बताए । केन्द्र सरकारको निर्णयअनुसार नै एकद्वार प्रणालीबाट राहत वितरण भइरहेको बढुवालले बताए । ‘हामीले पालिकामा पठाउँछौँ । पालिकाले वडा र वडाले प्रभावितको घरमा पुर्‍याउँछ,’ उनले भने ।

399833327_3938953686338606_4780655875578311619_n1699237331.jpg

रुकुम पश्चिमको सानीभेरी गाउँपालिकाका अध्यक्ष विर्खबहादुर विष्ट पनि एकद्वार प्रणालीमा राहत वितरण भइरहेको बताउँछन् । ‘जिल्ला र संघसंस्थाबाट राहत आएको छ । तर, सबैलाई त्रिपाल पुर्‍याउन सकिएको छैन,’ उनले भने ।

सानीभेरीमा ४ हजार त्रिपाल र कम्बल आवश्यक रहेको उनले बताए । ‘पालिकाले खरिद गर्न खोज्दा पनि पाइएको छैन । आज बेलुकासम्म प्रभावित सबैलाई त्रिपाल पुर्‍याउने योजना छ । राहत आएको छ तर पर्याप्त छैन,’ उनले भने । भूकम्प प्रभावित जाजरकोटका स्थानीयले पनि समयमा राहत नपाएको गुनासो गरेका छन् । ‘भूकम्पले घर ध्वस्त भएको छ । घरसँगै भएको सबै अन्न पुरियो, के खाने ? कहाँ बस्ने ? भाँडाकुँडा पनि सबै घरसँगै पुरिए, पाल हालेर बसेका छौँ, जाडोको समय छ, के गरी बस्ने हो, लुगा किन्ने पैसा छैन,' जाजरकोटको भेरी नगरपालिका-१ की शिवा बादीले भनिन् ।

तर, जिल्ला प्रशासन कार्यालय जाजरकोटले भने जिल्लामा आएको राहत सामग्री पालिकामा पठाएको बताएको छ । ‘एकद्वार प्रणालीबाट वितरण गरेका छौँ । जिल्लाबाट पालिका र पालिकाबाट वडा र वडाबाट टोलमा राहत पुग्छ । पालिकाले माग गरे अनुसार पठाएका छौँ,’ जिल्ला प्रशासन कार्यालय जाजरकोटका सूचना अधिककारी हरिश्चन्द्र शर्माले भने ।

जाजरकोट नलगाड नगरपालिका अध्यक्ष डम्बरबहादुर रावत सोमबारबाट राहत वितरण सुरु गरिएको तर विकट ठाउँमा पुर्‍याउन समय लागेको बताउँछन् । ‘एकद्वारबाट नै राहत वितरण भइरहेको छ । जिल्लामा इन्ट्री गरेर पालिकामा राहत आएको छ । विकट गाउँ भएकाले राहत पुर्‍याउन एक-दुई दिन लागेको हो,’ उनले भने ।

कतिपय पालिका प्रमुखहरूले एकद्वार प्रणालीका कारण राहत वितरणमा समस्या भएको बताएका छन् । ‘एकद्वार प्रणालीको नाममा पीडित मारमा परेका छन् । थप झन्झट भएको छ । पीडितले समयमा राहत पाएका छैनन्,' बारेकोट गाउँपालिकाका अध्यक्ष वीरबहादुर गिरीले भने, ‘स्थानीय सरकारमातहतबाट सिधै राहत वितरण हुनुपर्छ ।’

जिल्ला प्रशासन कार्यालयहुँदै पालिकामा आइपुग्न समय लागेकाले भूकम्पपीडितलाई पीडा भएको उनी बताउँछन् । ‘सीडीओ, प्रहरीहुँदै आउँदा राहत वितरणमा विलम्ब भएको छ । राहत सिधै स्थानीय सरकारलाई आयो भने पीडितले छिटो पाउँछन्,’ उनले भने ।

tripal bhukampa jajrokt1699350356.jpg