गाजासिटी पूर्ण रूपमा घेराबन्दी गरेको इजरायली दाबी, हमास भन्छ- इजरायली सेना लास बन्नेछन्

गाजासिटी पूर्ण रूपमा घेराबन्दी गरेको इजरायली दाबी, हमास भन्छ- इजरायली सेना लास बन्नेछन्

A+ A A-

इजरायल र हमासबीचको युद्ध २८औँ दिनमा प्रवेश गरिरहँदा इजरायली सेनाले हमास शासित गाजास्ट्रिपमा थल आक्रमणलाई व्यापक बनाएका छन् । गाजाको गाजासिटीलाई यतिबेला इजरायली सेनाले पूर्ण रूपमा घेराबन्दी गरेको अवस्था छ ।

इजरायली प्रधानमन्त्री बेन्जामिन नेतान्याहुले बिहीबार राति एक विज्ञप्ति जारी गर्दै हमासविरुद्धको दोस्रो चरणको युद्ध सफल भइरहेको बताएका छन् । उनले भनेका छन्, ‘हामी युद्धको उचाइमा छौँ । हामीले प्रभावशाली सफलता पाइरहेका छौँ र गाजासिटीको बाहिरी भाग पार गरिसकेका छौँ ।’

केही समयअगाडि मात्र इजरायलले गाजा सिटीका लाखौँ मानिसलाई दक्षिणी गाजाका भागमा शरण लिन आग्रह गरेको थियो । गाजास्ट्रिपको गाजासिटी हमासको अखडा र रणनीतिक क्षेत्र मानिन्छ । यो क्षेत्रलाई पूर्ण रूपमा ध्वस्त बनाउन इजरायलले हरेक उपायको प्रयोग गर्नेछ ।

इजरायलका रक्षामन्त्री योभ ग्यालान्टले हमासविरुद्ध तीन चरणमा युद्ध हुने बताएका थिए । पहिलो चरणमा इजरायलले हमासको पूर्वाधार ध्वस्त बनाउने लक्ष्य राखेको थियो । यतिबेला दोस्रो चरणको युद्धमा इजरायलले हमासको ठेगानाहरू पत्ता लगाएर त्यसलाई ध्वस्त बनाउने र उनीहरूको प्रतिरोध आन्दोलनको केन्द्रलाई नष्ट गर्ने लक्ष्य राखेको छ ।

पछिल्लो २८ दिनको आक्रमणमा गाजास्ट्रिपका ५० प्रतिशत भौतिक पूर्वाधार ध्वस्त भएका छन् । यस्तोमा गाजासिटीलाई घेरेर इजरायलले त्यहाँका बंकरमा लुकेर बसेका हमास लडाकुलाई परास्त गर्न चाहन्छन् । यसैहप्ता मात्र इजरायली सेना गाजाभित्रै घुसेर हमाससँग युद्ध गर्न धेरै पटक गइसकेका छन् ।

पछिल्लो युद्धमा गाजा घुसेका १९ इजरायली सेनाको मृत्यु भएको छ । मृत्यु भएका सबै इजरायली सेनाको उमेर १९ देखि २५ वर्षको भएको बताइएको छ । हमाससँगको युद्धमा हालसम्म ३२६ इजरायली सेनाको मृत्यु भइसकेको छ । यस्तै, पछिल्लो २४ घण्टाको युद्धमा हमासका १५० लडाकु मारिएका छन् ।

इजरायल डिफेन्स फोर्सले आफूहरू हमासलाई पूर्ण रूपमा समाप्त गर्ने युद्धमा भएको बताएको छ । इजरायलले यतिबेला राष्ट्रसंघको युद्धविरामको प्रस्तावलाई पनि अस्वीकार गरिरहेको छ । यस्तोमा बिहीबार राति प्रधानमन्त्री नेतान्याहुले भनेका छन्, ‘हामी पहिल्यैबाट गाजास्ट्रिपको गाजा सिटीमा छौँ । अब हामीलाई कसैले रोक्न सक्दैन । हाम्रो प्रयास प्यालेस्टाइनीको सुरक्षा सुनिश्चित गर्नु हो र हमासलाई समाप्त गर्नु हो ।’

यस्तोमा हमासको लडाकु ब्रिगेड अल-कासिमले भने इजरायली सेना लास बनेर फर्किने चेतावनी दिएको छ । हमासको समर्थनमा लेबनानका हिजबोल्ला लडाकुले आफूहरूले १९ स्थानबाट इजरायली सेनालाई आक्रमण गरिरहेको बताएको छ ।

प्रकाशित मिति: शुक्रबार, कात्तिक १७, २०८० ११:५८