इजरायली अस्पतालमा ढलेकाे छोरालाई ढाडस दिँदै निमबहादुरले भने, ‘नआत्ती बाबु, सबै ठीक हुन्छ’

इजरायली अस्पतालमा ढलेकाे छोरालाई ढाडस दिँदै निमबहादुरले भने, ‘नआत्ती बाबु, सबै ठीक हुन्छ’

A+ A A-

दाङका निमबहादुर डाँगी हिजैदेखि इजरायलमा रहेको २३ वर्षे छोरा प्रवीणको आवाज सुन्न तड्पिरहेका थिए । हमासले इजरायलमा रकेट हान्यो भनेको सुनेदेखि नै उनी बेचैन थिए । इजरायलमा केही नेपाली विद्यार्थी घाइते भएको खबर सुनेपछि त उनी झन् त्राहिमाम बने ।

लामो समययता हड्डीसम्बन्धी बिमार झेलिरहेकी प्रवीणकी आमा टंककुमारीले हिजोदेखि केही खाएकी छैनन् । सम्पर्कविहीन छोराको आवाज सुन्न निमबहादुर कम दाैडिएनन् । उनले राजदूतावासका कर्मचारीलाई फोन गरे । चिनजानका मान्छेदेखि नातेदारसम्मलाई प्रवीणको खोजखबर गरिदिन अनुनय गरे ।

दङ्गीशरण गाउँपालिकामा आज बिहानैदेखि बिजुली छैन । कतैबाट पार नलागेपछि इन्टरनेट खोज्दै हेकुली गाउँका निमबहादुर दिउँसो वडा नम्बर ३ को कार्यालय पुगे । उनले कसैमार्फत एक इजरायली स्वास्थ्यकर्मीकाे सम्पर्क नम्बर पाएका थिए । त्यो लगेर वडा कार्यालयनजिकै फोटो स्टुडियो चलाएर बसेका लोकेश चौधरीलाई दिए ।

लोकेशले उक्त नम्बरमा ह्वाट्सएप रहेको थाहा पाए र एउटा म्यासेज छोडिदिए । केही बेरलगत्तै उक्त नम्बरबाट भिडियो कल आयो, जसमा निमबहादुरले छोरा प्रवीणलाई देख्न पाए ।

‘ऊ अस्पतालको कुनै बेडमा थियो । छेउमा नर्स पनि थिइन्,’ निमबहादुरले शिलापत्रसित भने ।

आफूले बल्लबल्ल ज्यान जोगाएको प्रवीणले बुबालाई बताए । साथै, घटनाका बारेमा सुनाए । आफ्नो एउटा खुट्टा नाजुक अवस्थामा रहेको कुरा प्रवीणले जानकारी गराए ।

निमबहादुरले पनि छोरालाई ढाडस दिँदै भने, ‘ज्यान जोगिनु ठूलो कुरा हो बाबु, नआत्ती, सबै ठीक हुन्छ ।’

४ मिनेटजति कुरा गरेपछि प्रवीणले ‘बुबा घाउ हेर्नु त’ भनेर खुट्टातिर क्यामेरा घुमाउन खाेजे । ‘तर खुट्टा देखिनुअघि नै नर्सले प्रवीणलाई रोकेर मोबाइल खोसिन्,’ निमबहादुर भने ।

निमबहादुरले छोरासित कुरा गर्दा वडाध्यक्ष सुकलाल चौधरी सँगै थिए । उनले पनि प्रवीणलाई सान्त्वना दिएको बताए ।

‘भिडियोमा कुरा गर्दा हामीले नर्सलाई पनि देख्यौँ । प्रवीणले एउटा खुट्टा भाँचिएको कुरा गर्‍यो । ऊ बेडमा सुतेको थियो, अक्सिजन मास्क लगाएको थियो,’ वडाध्यक्ष चौधरीले शिलापत्रसित भने ।

प्रवीण निमबहादुरका तीन भाइमध्ये कान्छा छोरा हुन् । कृषिमा स्नातक गरेपछि उनी सिक्दै कमाउँदै कार्यक्रममा एक महिनाअघि मात्रै इजरायल गएका थिए । उनी बस्ने सेदेद नेगेभ क्षेत्रसहित २२ ठाउँमा हिजाे बिहानैदेखि प्यालेस्टाइनी विद्राेही समूह हमासले रकेट हानिरहेकाे छ । यस क्रममा उनी घाइते भएका हुन् । उनीसँगैका केही साथी बेपत्ता छन् भने बाँकी केही घाइते अवस्थामा उपचारतर छन् ।

इजरायल बस्ने सुनिता गिरीका अनुसार, सम्पर्कविहीन हुने नेपाली विद्यार्थीमा लोकेन्द्र धामी, राजेश स्वर्णकार, प्रवेश भण्डारी, पदम थापा, साजन फुलारा, आशीष चौधरी, नारायण न्यौपानेलगायत छन् । सम्पर्कविहीन भएकाहरूकाे सूचीमा यसअघि प्रवीणकाे पनि नाम सामेल थियाे । तर, उनी दूतावास र परिवारकाे सम्पर्कमा आए पनि अझै ११ जना नेपाली विद्यार्थीको अवस्था अज्ञात छ ।

प्रवीणका बुबा स्थानीय हिमालय इंग्लिस बोर्डिङका शिक्षक हुन् ।

‘एउटा भिडियोमा उसले बंकरभित्रको कालो कोठामा बसेर मर्छु होला भन्ने सन्देश रेकर्ड गरेको रहेछ, उसकै साथीले पोस्ट गरेपछि हामीले पनि हेर्‍यौँ । त्यसमा उसले आमाको उपचार गर्न सकिनँ भनेको थियो,’ निमबहादुरले भने ।

प्रवीणकी आमा टंककुमारी केसी (डाँगी) लामो समययता हड्डीसम्बन्धी समस्या झेलिरहेकी छन् ।

दूतावासले हप्कायो

निमबहादुरले हिजोदेखि छोराको खोजखबरमा थुप्रै कल गरिसके । तर, आइतबार दिउँसोसम्म उनले कतैबाट शान्तिको सास फेर्न सकिने खालको खबर पाएनन् । उनले फोन नम्बर पत्ता लगाएर इजरायलस्थित नेपाली दूतावासमा फोन गर्दा उल्टै हप्काएको गुनासो गरे । ‘दूतावासमा चारपल्ट फोन गरिसकेँ, उताबाट तपाईंलाई मात्र चिन्ता छ, हामीलाई झन् धेरै चिन्ता छ भनेर हप्काउँछन्’, उनले भने ।

तीन जना घाइते

हमासको बम आक्रमणमा परी घाइते भएका तीन जना अस्पतालमा उपचाररत छन्, तीमध्ये दुई जनाको अवस्था चिन्ताजनक रहेकाे बताइएकाे छ । अस्पतालमा उपचाररत रहेकाहरूमा धनबहादुर चौधरी, हिमाञ्चल कट्टेल र विधान सेजुवाल छन् । उपचाररत घाइतेमध्ये धनबहादुरकाे अवस्था सामान्य छ ।

उनीहरू किबुज अलुमिन कृषि फार्ममा काम गर्थे, जुन हमासले शासन गरिरहेकाे गाजापट्टीकाे सीमामा पर्छ । उक्त फार्मले उपलब्ध गराएकाे आवासमा १७ जना नेपाली विद्यार्थी थिए । सेदोत नेगेभमा पढ्ने उनीहरू सबै सुदूरपश्चिम प्रदेशका भएकाे बताइएकाे छ ।

सम्बन्धित समाचारहरूः