फलाेअपः यी हुन् इजरायलमा सम्पर्कविहीन भएका नेपाली विद्यार्थी (विवरणसहित)

A+ A A-

इजरायलमाथि हमासको आक्रमणपछि १२ नेपाली विद्यार्थी सम्पर्कविहीन छन् । इजरायल बस्ने सुनिता गिरीका अनुसार, सम्पर्कविहीन हुने नेपाली विद्यार्थीमा लोकेन्द्र धामी, राजेश स्वर्णकार, प्रविन डिसी, प्रवेश भण्डारी, पदम थापा, साजन फुलारा, आशीष चौधरी, नारायण न्यौपानेलगायत छन् । १२ जना सम्पर्कमा नरहेकाे कुरा सरकारले नै पुष्टि गरिसकेकाे छ ।

सुरक्षित ठाउँमा जान सफल विद्यार्थीहरूले नै बाँकी साथीहरू हराएको खबर गरेका हुन् । गम्भीर घाइते दुई जनाको अस्पतालमा उपचार भइरहेको छ ।

हमासको बम आक्रमणमा परी घाइते भएका अन्य तीन जना अस्पतालमा उपचाररत छन्, तीमध्ये दुई जनाको अवस्था चिन्ताजनक रहेकाे बताइएकाे छ । अस्पतालमा उपचाररत रहेकाहरूमा धनबहादुर चौधरी, हिमाञ्चल कट्टेल र विधान सेजुवाल छन् । उपचाररत घाइतेमध्ये धनबहादुरकाे अवस्था सामान्य छ ।

बाँकी दुई जना एक बंकरमा रहेको र उनीहरू सम्पर्कमै रहेको तेलअभिभस्थित नेपाली दूतावासले जनाएको छ ।

उनीहरू किबुज अलुमिन कृषि फार्ममा काम गर्थे, जुन हमासले शासन गरिरहेकाे गाजापट्टीकाे सीमामा पर्छ । उक्त फार्मले उपलब्ध गराएकाे आवासमा १७ जना नेपाली विद्यार्थी थिए । सेदोत नेगेभमा पढ्ने उनीहरू सबै सुदूरपश्चिम प्रदेशका भएकाे बताइएकाे छ ।

सम्बन्धित समाचार

मध्यपूर्वमा खतराको घण्टीः हमासको आक्रमणमा मारिने इजरायलीको संख्या ३०० पुग्यो, १५ सय घाइते

इजरायलमा नेपाली समुदायको अवस्थाबारे संसदलाई जानकारी गराउने क्रममा परराष्ट्रमन्त्री साउदले १२ जना नेपाली विद्यार्थी सम्पर्कमा नरहेको बताएका छन् ।

शनिबार बिहानदेखि हमासले इजरायलका विभिन्न ठाउँमा आकाश, जमिन र समुद्रबाट आक्रमण गरिरहेको छ । आक्रमण अहिले पनि जारी छ । किबुज क्षेत्रमा अहिले पनि इजरायली सेना पुगिसकेकाे छैन ।

इजरायलमा आक्रमणबाट जोगिन हरेक आवास क्षेत्रमा बंकर राखिएको हुन्छ । तर, हमासले हिजो अभूतपूर्व आक्रमण गरेकाले धेरैले तयारी नै गर्न नपाएको इजरायली मिडियाले लेखेका छन् । यति आश्चर्यजनक तरिकाले हमासले आक्रमण गरेको कुरा इजरायली गुप्तचरले कसरी थाहा पाएनन् भन्ने कुराको अहिले त्यहाँ बहस नै भइरहेको छ ।

हमासले हिजाे बिहानदेखि थालेकाे आक्रमणमा परी मृत्यु हुनेकाे संख्या तीन सय नाघिसकेकाे छ । आक्रमणमा १५ सय ९० जना बढी घाइते भएका इजरायल डिफेन्स फाेर्स (आईडीएफ) लाई उद्धृत गर्दै द टाइम्स अफ इजरायलले जनाएकाे छ । यीमध्ये तीन सयकाे अवस्था चिन्ताजनक छ । इजरायली शहरका अस्पतालहरू घाइतेहरूले भरिभराउ बनेका छन् ।

याे पनि..

गाजाका केही सीमावर्ती समुदायलाई प्यालेस्टाइनी विद्राेही समूह हमासकाे नियन्त्रणबाट मुक्त गराउने इजरायली सेनाकाे प्रयासका क्रममा नरसंहारको अवस्था बनेकाे बताइएकाे छ । इजरायली अखबार जेरुसलेम पाेस्टका अनुसार, हमासले सीमाभन्दा २४ किलोमिटर टाढासम्मका शहर र अन्य समुदायसहित दक्षिणी इजरायलका २२ ठाउँमा आक्रमण गरेको छ । केही स्थानसम्म आक्रमणकारीहरू बन्दुक बोकेर घण्टौँ घुमेका थिए । 'यस क्रममा उनीहरूले नागरिक र सैनिकमाथि गोली बर्साए, यीमध्ये कति नागरिक आफ्नै घरमा मारिए र केही सडकमै मारिए । एउटा ठूलो आउटडोर पार्टीमा पनि मानिसहरू मारिए,' द टाइम्स अफ इजरायलमा समाचार छ ।

यसैबीच, हमासको आक्रमणपछि इजरायलले गाजापट्टीमा लगातार हवाई आक्रमण गरिरहेकाे छ । इजरायलको जवाफी कारबाहीमा परी गाजाका करिब ३ सय मानिस मारिएका छन् भने १०० भन्दा बढी घाइते भएका विदेशी मिडियाले लेखेका छन् ।

याे पनि..

इजरायलको सेनाले नाकाबन्दी झेलिरहेका गाजापट्टीका सात फरकफरक क्षेत्रका मानिसलाई आफ्नो घर छोडेर सिटी सेन्टर वा शिविरहरूमा जान भनेको छ । ठूलो संख्यामा मानिसहरू घर छोडेर संयुक्त राष्ट्र संघले सञ्चालन गरेको शिविरतिर बढिरहेका छन् ।

बीबीसीका अनुसार, अहिले गाजा क्षेत्रको अवस्था अत्यन्तै भयभीत छ । प्यालेस्टाइनी विद्रोही समूह हमासले शनिबार बिहानदेखि इजरायलमा आक्रमण गरिरहेको छ । इजरायलतर्फ ३ सयभन्दा बढी मानिस मारिएका छन् भने झण्डै १६ सय जना घाइते भएका छन् ।

याे पनि..

प्रकाशित मिति: आइतबार, असोज २१, २०८० १४:४९