व्यवस्थालाई दोष दिने बेला भएको छैनः मन्त्री गुरुङ

A+ A A-

शहरी विकासमन्त्री सीता गुरुङले व्यवस्थालाई दोष दिने बेला नभएको बताएकी छन् । सोमबार ललितपुरमा बसोबास दिवसको अवसरमा आयोजित कार्यक्रमलाई सम्बोधन गर्दै उनले कानुनी र संवैधानिक रूपमा संघीयता प्राप्त गरे पनि व्यावहारिक रूपमा कार्यान्वयन गर्न नसकेको उनको भनाइ छ ।

‘अहिले नै व्यवस्थालाई दोष दिने बेला भएको छैन । झन्डै ४० वटा यस्तै प्रकृतिका र यस्तै समस्या समाधान गर्ने ऐन, कानुनहरू बनाउन बाँकी छ । त्यो हिसाबले पनि हामी कार्यान्वयनकै चरणमा छौँ,' उनले भनिन्, 'कार्यान्वयनकै चरणमा सबैकुरा भएन भन्ने हो भने गलत हुन्छ होला ।'

झन्डै ४० वटा संघीय कानुन बनाइसकेपछि अहिले भएका समस्या समाधान हुने मन्त्री गुरुङको दाबी छ । कार्यान्वयनकै चरणमा सबैकुरा भएन भन्नु गलत हुने उनको विश्लेषण छ । आम नागरिकको चासो शहरकेन्द्रित हुन थालेको उनले बताइन् ।

'शहर र बस्तीको कुरा गर्दा विश्वसँग तुलना गर्ने हो भने अधिकांश लगानी शहर निर्माणको निम्ति लगाइएको छ । आम नागरिकको चासो, चिन्ता, रहर के छ भने शहरमा पुगियो भने सेवा सुविधा प्राप्त गर्न सकिन्छ, त्यसैले हाम्रो रोजाईको बसाई भनेको शहर हो भन्ने छ । यो सबै मानिसको मनोविज्ञानमा छ,’ उनले भनिन् ।

स्मार्ट सिटी, सुरक्षित नागरिक आवास, एकीकृत बस्ती विकासको योजना अघि सारे पनि कार्यान्वयन लैजान नसकिएको उनले स्वीकार गरिन् । त्यसका लागि अघि बढाउन बजेट पर्याप्त नभएको उनले गुनासो गरिन् । सबैको साझा संकल्प र प्रतिबद्धता हुन नसक्दा यी योजनाहरू कार्यान्वयनमा जान नसकेको उनले सुनाइन् ।

‘सीमापारी पुग्दा छुट्टै सेवा सुविधासहितको शहर पाउने, तर त्यही सीमानाको वारी खान पनि नपाउने गरीको अवस्था सिर्जना नहोस् भनेर स्मार्ट सिटी बनाउने सीमा क्षेत्रमा भनेका थियौँ, तयारी गरेका थियौँ तर कार्यान्वयन गर्न सकेका छैनौँ,' उनले भनिन्, 'नयाँ शहर निर्माणका लागि एक लाख रोपनी र धेरै ठाउँमा जग्गा अकुपाइ पनि गरिएको छ तर कार्यान्वयनमा लैजान सकिएको छैन ।'

बनेका शहरलाई व्यवस्थित गर्ने र बन्ने शहरको संरचनाबारे पहिल्यै ध्यान दिनुपर्ने आवश्यकता रहेको उनले बताइन् । उनले सबै पालिकामा शहर निर्माणको बेस लाइन योजनाबारे आवश्यक अध्ययन हुन जरुरी रहेकोमा जोड दिइन् ।

प्रकाशित मिति: सोमबार, असोज १५, २०८० १४:२७