एमाले प्रदेश अधिवेशन : पटक-पटक निर्वाचन सारेर आफ्नो पक्षमा परिणाम निकाल्ने रणनीति

एमाले प्रदेश अधिवेशन : पटक-पटक निर्वाचन सारेर आफ्नो पक्षमा परिणाम निकाल्ने रणनीति

A+ A A-

‘चुनाव कति बेला सुरु हुन्छ , के कारणले रोकिएको हो भनेर नेताहरूले कार्यकर्तालाई भन्दैनन्, भन्ने भए पाँच दिनसम्म यस्तो अवस्था हुन्थ्यो,’ एमाले पार्टी कार्यलय च्यासलमा चितवनका एक प्रतिनिधिले पोखेको आक्रोश हो । च्यासलमा बागमती प्रदेश अधिवेशनकाे चुनावी प्रक्रिया अहिले जारी छ ।

एमालेले योभन्दा पहिला लुम्बिनी प्रदेश कमिटीको अधिवेशनमा पनि यसरी नै पटकपटक निर्वाचन सारेको थियो । १६ भदाैमा उद्घाटन भएको प्रदेशको पहिलो अधिवेशनमा नेतृत्व चयनमा संस्थपन पक्षले समय घर्काएको आरोप नेताहरूले लगाएका थिए । लुम्बिनीमा पटक-पटक निर्वाचन सारेर २० भदौमा मात्र नेतृत्व चयन गरेको थियो ।

यसको एउटै कारण थियो पार्टी अध्यक्ष ओली र महासचिव शंकर पाेखरेलले भनेको व्यक्ति सर्वसम्त अध्यक्ष हुन पाएनन् । अहिले एमाले अध्यक्ष र महासचिव लगायत वरिष्ठ उपाध्यक्ष संस्थापन जस्तै छन् । अर्का उपाध्यक्ष विष्णु पौडेल लगायतका नेताहरू संस्थापनइतर समूह बनेका छन् ।

संस्थापन पक्षले आफू निर्वाचनमा पनि कमजोर भएपछि निर्वाचन सार्ने गर्ने चलन पुरानै हो । लुम्बिनीमा निर्वाचन सार्दा ४० मत घटेका थिए । अथवा ४० जना प्रतिनिधिले भोट नै नहालेर घर फर्केका थिए ।

निर्वाचन लम्ब्याउँदै गएपछि मतदाताहरू थाक्ने, चासो कम दिने भएपछि माहोल विस्तारै आफू अनुकूल बनाउन सहज हुने आकलनका साथ संस्थापन पक्षले यस्तो गर्ने गरेको बताइन्छ ।

बागमती प्रदेशमा पनि त्यहि भइरहेकाे छ । लुम्बिनीमा निर्वाचन पर पर सारे पनि अन्तत: अध्यक्षमा महासिचव पाेखरेलले समर्थन गरेका हरि रिजाल दुई मतले पराजित भए । उपाध्यक्ष विष्णु पाैडेल पक्षका राधाकृष्ण कँडेलले जिते ।

बामगतीमा पनि संस्थापन पक्ष र इतरपक्षबीच कडा प्रतिस्पर्धा हुने देखिन्छ । प्राविधिक विषय देखाएर बागमती प्रदेशमा पाँचपटक निर्वाचनको कार्यक्रम पर धकेलिएको छ ।

एमाले केन्द्रीय नेतृत्वले यहाँ पनि रामेछापका कैलाश ढुंगेललाई सर्वसम्मत प्रदेशको अध्यक्ष बनाउन चाहेको थियो । तर अर्को पक्षले स्वस्थ प्रतिस्पर्धा गर्ने अडान लिएपछि पाँच दिनमा निर्वाचन सुरु भएको छ ।

ओली सर्वमान्य , दोस्रो तहका नेताका आआफ्नै रणनीति

एमालेमा अध्यक्ष ओली सर्वमान्य नेता जस्तै भएका छन् । उनको प्रतिस्पर्धी एमालेमा दसाैं महाधिवेशनपछि कोही अगाडि आएका छैनन् । तर एमालेमा दोस्रो तहदेखि केन्द्रीय सदस्य हुँदै प्रदेश र जिल्लासम्म गुट उपगुट छन् । अहिले प्रदेशमा गुटकाे लडाईं देखिएको छ ।

दोस्रो पुस्ताका नेताहरू पनि आउँदो महाधिवेशनमा नेतृत्व लिने तयारी स्वरुप प्रदेश अधिवेशनमा शक्ति परीक्षण गरिरहेका छन् । दोस्रो पुस्ताका मात्र होइनन् प्रदेश अधिवेशनमा तेस्रो पुस्ताका नेताहरू झन बढी सक्रिय रुपमा गुटमा देखिए ।

यसको सुरुवात एमालेमा लुम्बिनी प्रदेश अधिवेशनबाट भयाे ।

गत भदौ १६ गते लुम्बिनीमा उद्घाटन भएको प्रदेशको पहिलो अधिवेशनबाट नेतृत्व सर्वसम्मत चयन गर्न अध्यक्ष केपी शर्मा ओलीले निकै जाेडबल गरे । अधिवेशन उद्घाटन गरेर एक दिन त्यहिँ बसे । बस्नुको कारण थियो नेतृत्व सर्वसम्मत बनाउनु । त्यो पनि आफूले चाहेको व्यक्ति । तर लुम्बिनीमा त्यस्तो भएन । ओलीको चाहनाविपरीत भयो ।

नेकपा एमाले विभाजन भएको केही समयसम्म हरेक ठाउँमा सर्वसम्मत अथवा ओलीको चाहनाविपरीत एमालेमा केही हुँदैन थियो । तर प्रदेश अधिवेशनबाट उक्त मान्यता खण्डित भएको छ । जसको सुरुवात लुम्बिनी हुँदै बागमतीमा पुगेको छ । यो क्रम देशभरि हुने देखिन्छ ।

बागमतीको अधिवेशन उद्घाटन गर्दै अध्यक्ष ओलीले सर्वसम्मत गरे पनि राम्रो हुने बताएका थिए । तर नेतृत्व छनाेट गर्न एमालेलाई बागमतीमा पाँच दिनको समय लागेको छ । जसको कारण हो एमालेमा दोस्रो र तेस्रो तहका नेताहरूमा भएको गुटबन्दी ।

केन्द्रमा उपाध्यक्ष र महासचिवको गुटमा भएका स्थायी कमिटी पोलिटब्युरो र केन्द्रीय सदस्य प्रदेशमा फरक फरक गुट बनाएर राजनीति गरिरहेका छन् ।

एमालेमा सर्वसम्मत मात्र होइन अध्यक्ष ओलीले भने जसरी लोकतान्त्रिक तरिकाको निर्वाचन पनि नेतृत्व चयनका लागि मात्र नभएर दोस्रो र तेस्रो तहका नेताहरूको शक्ति संघर्षको मैदान पनि बन्न पुगेकाे छ प्रदेश अधिवेशन ।

लुम्बिनीको राजधानी बुटवलबाट दाङ लिनुमा एमाले महासचिव पोखरेलको हात छ । तर रुपन्देही घर भएका उपाध्यक्ष विष्णु पौडेल लुम्बिनीको राजधानी बुटवल नै राख्न चाहन्थे तर पौडेललाई बाइपास गरी ओलीसँग मिलेर पोखरेलले दाङ सारेका थिए ।

जसका कारण एमालेका यी दुई नेताहरूबीच राम्रो समबन्ध छैन । यी दुइ नेताबीच राम्रो सम्बन्ध नहुँदाको परिणाम गत वर्षका स्थानीय तहदेखि संघको निर्वाचन हुँदै एमालेको प्रदेश अधिवेशनमा प्रष्टसँग देख्न सकिन्छ ।

बागमतीमा एमाले पोलिटब्युरो सदस्य गोकुल बाँस्कोटा र महेश बस्नेतबीच पनि राजनीतिक दुस्मनी छ । यहाँ एकले अर्कोको अस्तित्व स्वीकार्दैनन् । दोस्रो पुस्तामा दुवै पौडेल निकाट मानिदै आएका थिए । तर प्रदेश अधिवेशनमा बास्कोटा पौडेल पक्षमा लागेका छन् भने बस्नेत महासचिव पोखरेल पक्षमा लागेका छन् ।

काभ्रे र भक्तपुर स्थायी घर भएका बास्कोटा र बस्नेतको लडाईं पनि बागमतीमा कसको वर्चस्व कार्यम गर्ने भन्नेमा देखिएकाे छ । यो अधिवेशनबाट हुने नेतृत्व चयनले आउँदो महाधिवेशनमा कसको शक्ति कति हुने भन्ने देखाउने छ ।

उता कर्णााली प्रदेशमा पनि अधिवेशन उद्घाटन भएकाे शुक्रबार तीन दिन भइसकेकाे छ । तर चुनाव भएकाे छैन । यहाँ पनि गुटगत प्रतिस्पर्धा हुने निश्चित छ ।

प्रकाशित मिति: शुक्रबार, असोज १२, २०८० १५:४१