क्यानडामा खालिस्तान समर्थकले हरदीप सिंहको हत्याको विरोधमा जलाए भारतीय झण्डा

क्यानडामा खालिस्तान समर्थकले हरदीप सिंहको हत्याको विरोधमा जलाए भारतीय झण्डा

A+ A A-

क्यानडामा खालिस्तान समर्थकहरूले भारतको झण्डा जलाएका छन् । खालिस्तान समर्थक सिख नेता हरदीप सिंह निज्जरको हत्याको विरोधमा क्यानडाको भ्यानकुभर र ओटावामा विरोध प्रदर्शन गरिएको थियो ।

सोहीबेला सिख फर जस्टिस समूहले भारतीय झण्डा च्यात्दै जलाइदिएका हुन् । भ्यानकुभरस्थित भारतीय दूतावास अगाडि नै प्रदर्शनकारीले भारतीय झण्डा च्यात्दै जलाएका हुन् । उनीहरूले भारतीय प्रधानमन्त्री नरेन्द्र मोदीको तस्वीर पनि च्यातिदिए ।

क्यानडाका प्रधानमन्त्री जस्टिन ट्रुडोले सिख नेता हरदीप सिंहको हत्यामा भारत सरकारका एजेन्टको हात रहेको बताएपछि भारत र क्यानडाबीच विवाद चर्किएको अवस्था छ । उक्त आरोपसँगै क्यानडाले भारतका एक कूटनीतिज्ञलाई देश निकाला गर्दा भारतले पनि क्यानडाका वरिष्ठ कूटनीतिज्ञलाई देश निकाला गरिदियो । त्यसपछि क्यानडाले भारतको मणिपुर, जम्मु-कस्मिर र आसामजस्ता क्षेत्रमा क्यानडाका नागरिकलाई घुम्न नजान एड्भाइजरी जारी गर्‍यो ।

भारतका ती क्षेत्रमा आतंकवाद र अपहरणको खतरा भएको क्यानडाको भनाइ छ । भारतले पनि प्रतिक्रिया जनाउँदै क्यानडामा खतरा भएकाले आवश्यकबाहेक क्यानडा घुम्न नजान भारतीय नागरिकलाई आग्रह गरेको छ । भारतले क्यानडामा भिसा सेवालाई अनिश्चित समयका लागि स्थगन गरेको छ ।

क्यानडाका अनुसार गत जुनमा भारत सरकारको एजेन्टले ब्रिटिस कोलम्बियास्थित सिख समुदायका नेता हरदीप सिंह निज्जरको हत्या गरेका थिए । प्रधानमन्त्री ट्रुडोले संसदमै भनेका थिए, ‘क्यानडाको भूमिमा हाम्रै नागरिकको हत्यामा विदेशी सरकार संलग्न हुनु त्यो हाम्रो देशको सार्वभौमसत्ताको उल्लंघन हो । हामी यो हत्याको अनुसन्धानमा सहयोग गर्न भारत सरकारलाई दबाब दिनेछौँ ।’

तर, भारतले भने क्यानडाले लगाएका सबै आरोपको खण्डन गरेको छ । भारतका अनुसार यस्ता आधारहीन आरोपहरू खालिस्तानी आतंककारी र अतिवादीहरूबाट ध्यान हटाउने प्रयास हुन् । भारतले भनेको छ, ‘खालिस्तानीलाई क्यानडामा शरण दिइएको छ र उनीहरू भारतको सार्वभौमसत्ता र क्षेत्रीय अखण्डताका लागि खतरा हुन् ।’

क्यानडामा मारिएका हरदीप सिंह निज्जर भारतमा मोस्ट वान्टेड आतंकवादीको सूचीमा समावेश थिए । पछिल्लो समय भारतभित्रै र क्यानडा तथा अन्य देशहरूमा खालिस्तान आन्दोलन चर्किएको छ । खालिस्तान आन्दोलन भारतबाट पञ्जाव प्रान्तलाई अलग्याउने अभियानसँग सम्बन्धित छ ।

यस्तोमा खालिस्तान नेता हरदीप सिंह निज्जर मारिएपछि र क्यानडाले यो हत्यामा भारतलाई दोष दिएपछि सिख समुदाय जो खालिस्तान राष्ट्र चाहन्छन्, उनीहरूले भारतीय झण्डा जलाइदिएका हुन् ।

प्रकाशित मिति: मंगलबार, असोज ९, २०८० १२:२६