गणेशमान सिंहको सन्देश नयाँ पुस्तामा पुर्‍याउन आवश्यक छः राष्ट्रपति पौडेल

A+ A A-

राष्ट्रपति रामचन्द्र पौडेलले राजनीति सत्ता र शक्तिको साधन होइन भन्ने गणेशमान सिंहको सन्देश नयाँ पुस्तासम्म पुर्‍याउन आवश्यक रहेको बताएका छन् ।

मंगलबार भक्तपुरमा गणेशमान सिंहको प्रतीक अनावरण कार्यक्रममा पौडेलले राष्ट्र निर्माणको लागि जीवन समर्पण गर्ने आदर्श त्याग र निष्ठावान नेता गणेशमानको सन्देश वर्तमान र भावि पुस्तासम्म पुर्‍याउन आवश्यक रहेको बताए ।

'राजनीतिलाई सत्ता र शक्तिको साधन होइन । राष्ट्र निर्माणको लागि जीवन सर्मपण गर्ने आदर्श त्याग र निष्ठाको निस्काम कर्महरू भनेर प्रमाणित गर्ने गणेशमानको सन्देश हामीले वर्तमान र भावि पुस्तासम्म पुर्‍याउन सक्नुपर्छ,' पौडेलले भने, 'वाटिकाले गणेशमानको आर्दशपूर्ण जीवनलाई भावी पुस्तासम्म जीवन्त राख्न मद्दत पुर्‍याउँछ ।'

गणेशमान सिंहलाई सबैले सर्वमान्य नेताको रूपमा मानेको पौडेलले बताए । सिंहले राजनीतिलाई सत्ता र शक्तिको साधन नभएको भन्दै राजाले प्रधानमन्त्री बन्नुभन्दा समेत अस्वीकार गरेको स्मरण गरे ।

‘गणेशमान सिंहलाई म सर्वमान्य नेताको रूपमा मान्छु । नेपालमा एउटा नेता गणेशमान सिंह हो । एक पटक सम्पूर्ण नेपालीले नेता माने । वामपन्थी र कांग्रेस नभनी सबैले मानेको नेता उहाँ नै हो,' पौडेलले भने ।

प्रतीक सहितको गणेशमान पार्कले सिंहको आर्दशपूर्ण जीवनलाई भावी पुस्तासम्म जीवन्त राख्न मद्दत पुर्‍याउने विश्वास लिएको पौडेलको भनाइ छ । गणेशमानको साथ र समिप्यता आफ्नो राजनीतिक जीवनमा पनि पाएको उनले स्मरण गरे । गणेशमानको समिप्यताले आफूलाई पनि सत्य र आदर्शको बाटोमा हिँड्न प्रेरित गरेको उनको भनाइ छ ।

'उहाँको साथ र समिप्यता मेरो राजनीतिक जीवनमा पनि पाएँ । त्यसले मलाई सत्य र आदर्शको बाटोमा हिँड्न प्रेरित गरेको छ,' पौडेलले भने ।

लोकतन्त्रलाई राज्य सञ्चालनको एउटा माध्यम मात्रै होइन जीवन दर्शन र संस्कार पनि हो भन्ने गणेशमान सिंहले देखाएको बाटोमा हिँड्नसक्नु उनीप्रति सच्चा श्रद्धाञ्जली हुने पौडेलको भनाइ छ ।

'लोकतन्त्रलाई राज्य सञ्चालनको एउटा माध्यम मात्रै होइन । जीवन दर्शन र संस्कार पनि हो भन्ने गणेशमान सिंहले देखाउनुभएको बाटोमा हिँड्नसक्यौँ भने मात्रै उहाँप्रति सच्चा श्रद्धाञ्जली हुनेछ,' पौडेलले भने ।

गणेशमान जस्तो महापुरुषको नाममा स्थापना गरिएको १७५ रोपनी क्षेत्रफलमा फैलिएको पार्कले व्यस्त जीवनशैलीका उपत्यका बासीका लागि स्वच्छ वातावरणमा रम्ने उपयुक्त स्थल बन्नसक्ने उनको भनाइ छ ।

गणेशमान पार्कलाई नेपालमा आउने पर्यटकहरूलाई नेपालको जानैपर्ने एउटा ठाउँ बनाउने गरी विकास गर्न पौडेलले आग्रह गरे ।

प्रकाशित मिति: मंगलबार, असोज २, २०८० १७:४९