ऋणमा फसेको पाकिस्तान एयरलाइन्स बन्दको संघारमा, १० करोड डलर तत्काल तिर्नुपर्ने

ऋणमा फसेको पाकिस्तान एयरलाइन्स बन्दको संघारमा, १० करोड डलर तत्काल तिर्नुपर्ने

A+ A A-

पाकिस्तानको राष्ट्रिय ध्वजावाहक एयरलाइन्स पाकिस्तान इन्टरनेसनल एयरलाइन्स पीआईएले आफ्ना ३१ अन्तर्राष्ट्रिय उडानमध्ये १४ उडान स्थगित गरेको छ ।

ठूलो ऋणमा फसेका कारण पीआईएले उडानमा कटौती गरेको हो । कयौँ खाडी राष्ट्रलाई तेलको पैसा तिर्न नसकेका कारण ती देशमा पनि उडान ठप्प पारिएका छन् । वास्तवमा पीआईए बन्द हुने संघारमै पुगिसकेको छ । पाकिस्तान इन्टरनेसनल एयरलाइन्सले सरकारले आपत्‌कालीन कोष उपलब्ध नगराए यो राष्ट्रिय उड्‌डयन सेवा जुनसुकै बेला बन्द हुन सक्ने बताएको छ ।

पीआईएले बैंकबाट ऋण तिर्न केही रकम थपेको भए पनि त्यसबाट सहयोग लिन समय लाग्ने बताएको छ । बोइङ र एयरबसजस्ता विश्वचर्चित विमान उत्पादक कम्पनीले तिर्न बाँकी रहेको रकम भुक्तान नगरिए यो सेप्टेम्बरको मध्यबाट विमानका स्पेयर पार्ट्सको आपूर्ति रोक्न सक्ने बताएको थियो ।

ठूलो ऋणमा फसेपछि पाकिस्तानको वर्तमान सरकारले सरकारी एयरलाइन्स पीआईएलाई निजीकरण गर्ने योजना यसअघि नै प्रस्तुत गरिसकेको छ । तर, यसका लागि सरकारको आलोचना पनि भइरहेको छ । नाफाबिना आर्थिक संकटमा परेका कम्पनीलाई किन र कसले किन्छ भन्ने टिप्पणी भइरहन्छन् । विपक्षी पार्टी पाकिस्तान तहरीक-ए-इन्साफ पीटीआईले एक रिपोर्टलाई उद्धृत गर्दै वर्तमान पाकिस्तान डेमोक्रेटिक मुभमेन्ट पीडीएम गठबन्धनको सरकारलाई अर्थ व्यवस्था बर्बाद गर्ने कारक भनेको छ ।

सरकारी उड्‌डयन कम्पनी पाकिस्तान इन्टरनेसनल एयरलाइन्स कर्पोरेसनले करिब ६ कम्पनीलाई १० करोड डलर तत्काल तिर्नुपर्ने भएको छ । अन्यथा यो एयरलाइन्स बन्द गर्नुपर्ने अवस्था आउन सक्छ । ब्लूमबर्गको रिपोर्टमा, पीआईएका प्रवक्ता अब्दुल्ला खानलाई उद्धृत गर्दै भनिएको छ कि पीआईए तलब र एयरपोर्ट शुल्क पनि तिर्न सक्षम छैन ।