उमेर ढल्किए पनि लयमै छन् मेस्सी र रोनाल्डो, बढ्दै छ साउदी प्रो लिग र एमएलएसको लोकप्रियता

उमेर ढल्किए पनि लयमै छन् मेस्सी र रोनाल्डो, बढ्दै छ साउदी प्रो लिग र एमएलएसको लोकप्रियता

A+ A A-

अर्जेन्टिनी स्टार लियोनल मेस्सीले अमेरिकी मेजर लिग सक्कर गत महिनादेखि मात्र खेल्न सुरु गरेका हुन् । तर, उनले त्यहाँ आफ्नो प्रभाव देखाइसके । उनले अमेरिकी क्लब इन्टर मायामीमा पुगेपछि आफूले खेलेका सबै ६ खेलमा गोल गरेका छन् ।

उनको गोल संख्या ९ पुगेको छ भने उनकै प्रभावशाली खेलमा इन्टर मायामी पहिलोपटक कुनै प्रतियोगिताको फाइनलमा पुगेको छ । मायामीले लिग्स कपको उपाधिका लागि नासभिलसँग २० अगस्टमा प्रतिस्पर्धा गर्दै छ ।

विश्वकप विजेता मेस्सी ७ पटकका बालोन डि’अर विजेता हुन् । उनले ६ पटक युरोपियन गोल्डेन बुटसँगै चार यूईएफए च्याम्पियन्स लिग जितेका छन् । पीएसजीसँग सम्झौता सकिँदै गर्दा मेस्सीलाई साउदी क्लब अल-हिलालले आकर्षक प्रस्ताव गरेको थियो । उनलाई वर्षमा ४०० मिलियन अमेरिकी डलर तलब दिने प्रस्ताव गरेको थियो । तर, मेस्सी अमेरिकी क्लब मायामी पुगेका हुन् ।

३६ वर्षे मेस्सीले अमेरिकामा आफ्नो प्रभुत्व बढाउँदै गर्दा मेस्सीका लामो समयदेखिका खेल प्रतिद्वन्द्वी पोर्चुगिस् स्टार खेलाडी क्रिस्टियानो रोनाल्डोले पनि साउदी अरबको फुटबलमा धमाका मच्चाइरहेका छन् ।

साउदी क्लब अल-नासरबाट खेलिरहेका पाँचपटकका बालोन डि’अर, चारपटकका युरोपियन गोल्डेन बुट र पाँचपटकका यूईएफए च्याम्पियन्स लिग विजेता ३८ वर्षे रोनाल्डोले हालै अरब क्लब च्याम्पियन्स कप जित्न सफल भए । रोनाल्डोले उक्त प्रतियोगितामा गोल्डेन बुट जिते ।

युरोपमा सनसनी मच्चाइसकेका मेस्सी र रोनाल्डो समग्रमा जहाँ पुगेका छन्, उमेर ढल्कँदै गए पनि उनीहरूले आफ्नो जादु देखाइरहेका छन् । रोनाल्डो साउदी पुगेपछि हालसम्म २५ खेलमा २० गोल गरिसकेका छन् । उनी अल–नासरका सर्वाधिक गोलकर्ताको १०औँ स्थानमा छन् ।

स्मरण रहोस्, रोनाल्डो रियल मड्रिडका सर्वाधिक गोलकर्ता हुन् । उनले मड्रिडबाट ४२० गोल गरे । त्यसैगरी, मेस्सी बार्सिलोनाका सबै समयका सर्वाधिक गोलकर्ता हुन्, उनले बार्साबाट ६७२ गोल गरे ।

रोनाल्डो साउदी गएपछि यतिबेला करिम बेन्जेमा, नेमार जुनियर, साडियो माने, एन्गोलो कान्टेजस्ता स्टार खेलाडी पनि साउदी क्लबमा आबद्ध भइसकेका छन् । उता मेस्सी मायामी गएपछि उनी आबद्ध भएकै क्लबमा जोडी अल्बा र सर्जियो बुस्केट्स पनि आबद्ध भएका छन् ।

यतिबेला रोनाल्डोका कारण साउदी लिग पहिलेभन्दा चर्चामा छ । त्यसैगरी, अमेरिकी एमएलएस पनि मेस्सी गएदेखि चर्चामा छ । पहिलेभन्दा बढी साउदी प्रो लिग र एमएलएस हेर्न पनि थालिएको छ ।

प्रकाशित मिति: बिहीबार, साउन ३२, २०८० १४:४८