कर्णाली, भेरी र बबई नदीतटीय क्षेत्रका नागरिकलाई उच्च सतर्क रहन सुर्खेत प्रशासनको आग्रह

कर्णाली, भेरी र बबई नदीतटीय क्षेत्रका नागरिकलाई उच्च सतर्क रहन सुर्खेत प्रशासनको आग्रह

फाइल तस्वीर

A+ A A-

कर्णाली, भेरी र बबई नदीतटीय क्षेत्रमा बसोबास गर्ने नागरिकलाई उच्च सतर्कता अपनाउन सुर्खेत प्रशासनले आग्रह गरेको छ । निरन्तरको भारी वर्षासँगै यी तीन नदीमा पानीको बहाव बढ्न थालेपछि सतर्क रहन प्रशासनले सूचित गरेको हो ।

गए रातिदेखि कर्णाली प्रदेशका विभिन्न जिल्लामा निरन्तर भारी वर्षा भइरहेको छ । मौसम पूर्वानुमान शाखाका मौषमविद् सञ्जीव अधिकारीका अनुसार आज र भोलि कर्णालीका विभिन्न जिल्लामा मध्यमदेखि भारी वर्षा हुने सम्भावना रहेको छ ।

सुर्खेत बाढी, पहिरो र अन्य ९ जिल्ला पहिरोको उच्च जोखिममा रहेका जिल्लाहरू हुन् । सुर्खेतका आठ पालिका भेरी, कर्णाली र बबई नदीको उच्च जोखिमा छन् भने एक पालिका बाढी र पहिरोको उच्च जोखिमा छ ।

विपद् प्रतिकार्यका लागि तयारी अवस्थामा रहेको उल्लेख गर्दै कहीँ कतै बाढीपहिरोजन्य घटना भएको खण्डमा यथाशीघ्र सम्बन्धित पालिका, प्रहरी वा प्रशासनलाई जानकारी गराउन पनि सुर्खेत प्रशासनले अनुरोध गरेको छ ।

यता कर्णाली प्रदेश सरकारले पनि विपद्पूर्व र विपद्पछिको खोज उद्धार, राहत र पुनर्स्थापनाका लागि सम्बन्धित निकाय तयारी अवस्थामा रहेको बताएको छ । सरकारले चालु आर्थिक वर्षमा विपद् पूर्वतयारीका लागि मनसुन पूर्वतयारी तथा प्रतिकार्य कार्ययोजना २०८० अनुसार तयारी अवस्थामा रहेको आन्तरिक मामिला तथा कानुन मन्त्रालयअन्तर्गत रहेको विपद् व्यवस्थापन शाखाका अधिकृत कृष्णबहादुर रोकायाले जानकारी दिए ।

विपद्‌पूर्व सम्भावित क्षेत्रमा विभिन्न खालका जनचेता जगाउने तथा विपद्पछि खोज, उद्धार, राहत र पुनर्स्थापनाका लागि प्रदेश सरकार, सम्बन्धित जिल्ला प्रशासन कार्यालय, तीनवटै सुरक्षा निकाय तथा रेडक्रसको उद्धार टोली हेलिकोप्टरसहित तयारी अवस्थामा रहेको रोकायाको भनाइ छ ।

विपद्पछि हुन सक्ने सम्भावित क्षतिको पूर्वानुमान गरी विभिन्न विकास साझेदारहरूसँगको समन्वयमा राहत तथा उद्धार सामाग्रीसमेत तयारी अवस्थामा राखिएको अधिकृत रोकायाको भनाइ छ ।

यसैबीच, वर्षाका कारण कर्णालीका विभिन्न सडकहरु अवरुद्ध भएका छन् । वर्षाका कारण आएको बाढीले कर्णाली राजमार्ग, कोहलपुर–सुर्खेत, सुर्खेत–दैलेख, छिन्चु–सल्यानलगायतका सडक अवरुद्ध भएका छन् । अवरुद्ध सडकहरू खुलाउने प्रयास भइरहेको जनाइएको छ ।

प्रकाशित मिति: आइतबार, साउन २८, २०८० १२:५९