आफ्नो सेना फर्काउन अमेरिकाले चाल्यो पहलकदमी, तर किम जोङले दिएनन् उत्तर (भिडियो)

आफ्नो सेना फर्काउन अमेरिकाले चाल्यो पहलकदमी, तर किम जोङले दिएनन् उत्तर (भिडियो)

A+ A A-

दक्षिण कोरियामा तैनाथ २३ वर्षे अमेरिकी सेना ट्र्याभिस किङ अहिले उत्तर कोरियाको हिरासतमा छन् । उत्तर कोरिया भागेका उनलाई त्यहाँको प्रहरीले पक्राउ गरेको हो ।

यतिबेला अमेरिकाले ट्र्याभिसलाई उत्तर कोरियाबाट फर्काउन हरसम्भव प्रयास गरिरहेको छ । तर उत्तर कोरियाले कुनै प्रतिक्रिया नदिएको अमेरिकी भनाइ छ । अमेरिकी सरकारका अनुसार दक्षिण कोरियास्थित अमेरिकी सेनाले उत्तर कोरियासँग संचार स्थापित गर्न खोज्दा कुनै जवाफ नआएको हो ।

परमाणु हतियारसम्पन्न राष्ट्र उत्तर कोरिया र अमेरिकाबीच लामो समययता विभिन्न विषयमा तिक्तता छ । विशेष गरी उत्तर कोरियाको परमाणु हतियारबाट अमेरिका सन्तुष्ट छैन । अमेरिकालाई सन्तुलनमा राख्न परमाणु हतियार गज्जबको अस्त्र भएको त्यहाँका सर्वोच्च नेता किम जोङ उनले बताउँदै आएका छन् ।

यस्तो अवस्थामा अमेरिकी सैनिक उत्तर कोरिया भागेपछि उनलाई स्वदेश फर्काउन अमेरिकाले कूटनीतिक झमेला व्यहोर्नुपर्ने भएको छ । दक्षिण कोरियाली सञ्चारमाध्यमका अनुसार ट्र्याभिस किङ हालै अनुशासन कारबाहीमा परेका थिए । उनीमाथि दक्षिण कोरियामा दुईवटा मुद्दासमेत लागेका छन् ।

उनले दक्षिण कोरियाली प्रहरीको कारमा आक्रमण गर्दै तोडफोड मच्चाएको र क्लबमा मदिराले मातेर एक व्यक्तिलाई मुक्का हानेपछि उनलाई ४ हजार अमेरिकी डलर जरिवाना तिराइएको थियो । उनलाई केहीदिन हिरासतमा पनि लिइएको थियो ।

उनलाई अमेरिका नै फर्काउने प्रक्रिया पनि सुरु भइरहेको थियो । तर, उनी हालै संयुक्त राष्ट्रसंघको आयोजनामा उत्तर कोरिया र दक्षिण कोरियालाई विभाजन गर्ने असैनिकीकृत क्षेत्र डीएमजेटमा भ्रमणका लागि गए र उतै आफ्नै खुसीले कसैलाई जानकारी नदिई उत्तर कोरिया भागे ।

अमेरिकाले तल्लो दर्जाको सैनिकलाई उत्तर कोरियाले धेरै समय हिरासतमा नराख्ने अनुमान गरेको थियो । किनभने त्यस्ता सेनाबाट ठूलो र गोप्य जानकारी हात पर्दैन । तर उत्तर कोरियाले ट्र्याभिसलाई फर्काउने कुनै संकेत नदिएपछि चिन्ता बढ्न थालेका छ ।

(भिडियो)

यतिबेला ट्र्याभिसकी आमा क्लाउडिना गेट्स छोराको ज्यानलाई लिएर चिन्तित बनेकी छिन् । उनी भन्छिन्, ‘मलाई मेरा छोरा चाहिन्छ । मेरो छोरालाई चाँडै घर फर्काइदेऊ । म भगवानसँग प्रार्थना गर्छु कि उनी सकुशल घर फर्किनेछन् ।’

सन् १९९६ यता उत्तर कोरियाले कयौँ अमेरिकी नागरिक हिरासतमा लिइसकेको छ । अमेरिकी पर्यटक, विद्वान र पत्रकारहरूलाई उत्तर कोरियाले हिरासतमा लिँदा यातना दिने गरेको पाइएको छ ।

सन् २०१७ यता अमेरिकाले आफ्ना नागरिकलाई उत्तर कोरिया भ्रमणमा प्रतिबन्ध लगाएको छ । किनभने अमेरिकी नागरिकलाई उत्तर कोरियामा कठोर यातना दिने गरिएको इतिहास छ । सन् २०१८ मा अमेरिकी विद्यार्थी ओटो वार्मबियरलाई उत्तर कोरियाले हिरासतमा लिएर छाडेको थियो । उनीमाथि होटलमा चोरी गरेको आरोप थियो ।

तर, जब उनी अमेरिका फर्काइए, उनी अचेत थिए र अमेरिका फर्किएको केही समयमै उनको मृत्यु भयो । रोयटर्स र बीबीसीको सहयोगमा

प्रकाशित मिति: शुक्रबार, साउन ५, २०८० १४:४७