फौजदारी अदालतको निशानामा रहेका पुटिन ब्रिक्स सम्मेलनमा सहभागी नहुने (भिडियो)

फौजदारी अदालतको निशानामा रहेका पुटिन ब्रिक्स सम्मेलनमा सहभागी नहुने (भिडियो)

A+ A A-

आगामी अगस्ट २२ देखि २४ सम्म दक्षिण अफ्रिकामा ब्रिक्स समूहको सम्मेलन हुँदै छ । ब्रिक्स समूहमा ब्राजिल, रुस, भारत, चीन र दक्षिण अफ्रिका समावेश छन्, जसले शान्ति, सुरक्षा, विकास र सहयोगलाई प्रवर्द्धन गर्ने लक्ष्य राखेको छ ।

तर यसपटकको ब्रिक्स सम्मेलनमा रुसका राष्ट्रपति भ्लादिमिर पुटिन सहभागी नहुने भएका छन् । बुधबार मात्र दक्षिण अफ्रिकाले पुटिनले ब्रिक्स सम्मेलनमा सहभागी नहुने पुष्टि गरेको हो । पुटिनको स्थानमा रुसका विदेशमन्त्री सर्गेई लाभरोभ जोहानसबर्गमा आयोजना हुने ब्रिक्स सम्मेलनमा सहभागी हुनेछन् ।

रुसले युक्रेनलाई आक्रमण गरेयता पुटिन अन्तर्राष्ट्रिय फौजदारी अदालत आईसीसीको निशानामा छन् । रुसी राष्ट्रपति पुटिनलाई गिरफ्तार गर्न आईसीसीले गत मार्च १७ मा पक्राउ पुर्जी जारी गरेको थियो ।

यसको अर्थ अब उनलाई आईसीसीमा आबद्ध १ सय २३ देशमा गिरफ्तार गर्न सकिन्छ । पुटिनमाथि युद्ध अपराध गरेको र युक्रेनका अनाथालयबाट बालबालिकाहरू रुस लगेको आरोप छ । दक्षिण अफ्रिका पनि आईसीसीमा आबद्ध राष्ट्र हो । यदि पुटिन ब्रिक्स सम्मेलनमा सहभागी भए उनलाई गिरफ्तार गर्नु दक्षिण अफ्रिकाको प्रमुख कर्तव्य हुन्थ्यो ।

यही कारण पुटिनले दक्षिण अफ्रिका नगएको टिप्पणी भइरहेका छन् । दक्षिण अफ्रिकाले आपसी सहमतिमै रुसका राष्ट्रपति भ्लादिमिर पुटिन ब्रिक्स सम्मेलनमा सहभागी नहुने जनाएको छ ।

दक्षिण अफ्रिकाको एक अदालतले हालै प्रकाशित गरेको कानुनी सम्झौताअनुसार दक्षिण अफ्रिकी राष्ट्रपति सिरिल रामाफोसाले आईसीसीसँग पुटिनलाई गिरफ्तार नगर्न आग्रहसमेत गरेका थिए ।

(भिडियो)

रामाफोसाले दक्षिण अफ्रिकामा पुटिन गिरफ्तार भएको खण्डमा ठूलो युद्ध हुन सक्ने खतरा उत्पन्न हुने बताएको जनाइएको छ । यस्तो समाचार बाहिरिएसँगै रुसले पुटिनलाई आईसीसीको पक्राउ पुर्जीअन्तर्गत पक्राउ गरिए युद्ध हुन्छ भनेर आफूले कहिल्यै नबताएको स्पष्ट पारेको छ ।

यद्यपि रुसी राष्ट्रपति कार्यालयका प्रवक्ता दिमित्री पेस्कोभ पुटिनको अधिकार हनन गर्ने प्रयास भए त्यसले ठूलो परिणाम निम्तने विषयमा विश्व जानकार रहेको पनि बताउँछन् । रोयटर्सको सहयोगमा

प्रकाशित मिति: बिहीबार, साउन ४, २०८० १६:५४