खाँणकाे विषयले पेचिलाे बन्दैछ कांग्रेस केन्द्रीय समिति बैठक

फाइल तस्वीर

A+ A A-

साउन २ मा बस्ने कांग्रेस केन्द्रीय समिति बैठकका एजेन्डा अझै तय हुन सकेकाे छैन । वर्ष दिनपछि बस्न लागेको बैठकमा कांग्रेसभित्र के छलफल हुन्छ भन्ने चासाे बढेकाे छ । त्यसैले कांग्रेसले के एजेन्डा बनाउँछ त्याे कांग्रेसभित्र मात्र नभई बाहिर पनि चासाे छ ।

कांग्रेस सहमहामन्त्री भीष्म आङदेम्बेका अनुसार नेतृत्वले साझा एजेन्डा तय गर्नेछ ।

नेताहरूले साझा एजेन्डा बनाउने बताए पनि कांग्रेसमा नक्कली भुटानी शरणार्थी प्रकरणमा मुछिएका नेता बालकृष्ण खाँणको विषय पेचिलो बन्ने पक्का छ । किनकी खाँणको विषयमा पार्टीमा छलफल हाेस् भन्ने सभापति शेरबहादुर देउवा चाहँदैनन् । खाँण अहिले नक्कली भुटानी शरणार्थी प्रकरणमा पुर्पक्षका लागि थुनामा छन् । त्यसैले याे विषय एजेन्डामा नरहने देउवानिकटक नेताहरू बताउँछन् ।

तर, एक वर्षदेखि केन्द्रीय समिति बैठक नहुँदा चिढिएका केन्द्रीय सदस्यहरूलाई याे विषयमा बाेल्नबाट राेक्न सकिने अवस्था नरहेकाे देउवानिकटकै नेताहरू स्वीकार्छन् । संस्थागत एजेन्डा नभएकाे विषयमा केन्द्रीय सदस्यले बाेलेपछि त्यसलाई निर्णयमा कसरी सम्बाेधन हुन्छ त्याे विषय पेचिलाे बन्ने देउवानिकट एक नेताले बताए ।

संस्थापनइतर समूह खाँणलाई तत्काल पार्टी भूमिकाबाट अलग गर्नुपर्ने पक्षमा छ । यो प्रकरणमा पहिला आक्रामक देखिएका इतरसमूहका नेता शेखर कोइराला एक महिनायता देउवाप्रति ‘सफ्ट’ देखिएका छन् । खाँणलाई पार्टी भूमिकाबाट अलग गर्नुपर्ने अभिव्यक्ति दिएका महामन्त्री गगन थापा र सभापति देउवाबीच एजेन्डामा सहमति हुन सकेको छैन ।

खाँणलाई पार्टी जिम्मेवारीबाट अलग गर्नुपर्ने र कायमै राख्नुपर्ने बारेमा संस्थापन र इतरसमूहबीच जेठ पहिलो सातादेखि नै टकराव छ । खाँणप्रति ‘सफ्ट’ देखिएकाे संस्थापन समूह आफ्नो अडानबाट पछि नहट्ने देखिन्छ ।

खाँण देउवा समूहभित्र बलियाे उपगुट बनाएका प्रभावशाली नेता हुन् । कांग्रेसभित्र उनी मात्र एक यस्ता नेता हुन् जाे नेविसंघ र तरुण दलकाे अध्यक्ष भएर पार्टीमा स्थापित भए । साथै गृहमन्त्री पनि भइसकेकाले उनीसँग देशका सबै जिल्लामा जाेडिएका नेताहरू छन् । उनकाे नेटवर्क सबै जिल्लामा छ ।

अहिले खाँणलाई निलम्बन गर्दा उनीसँग जाेडिएका नेताहरू बिच्किने डर देउवालाई छ । त्यसैले उनी खाँणलाई कारबाही गरेर उनीहरूलाई आफूबाट टाढा बनाउन देउवा चाहँदैनन् । पार्टीकाे १५औँ महाधिवेशनमा सभापतिकाे उम्मेदवार हुने आकांक्षा राखेका उपसभापति पूर्णबहादुर खड्का पनि खाँणकै पक्षमा देखिन्छन् । अहिले कांग्रेसमा सभापति देउवा भए पनि पार्टी निर्णयमा खड्का हावी भइरहेका छन् ।

शरणार्थी प्रकरणमा मुछिएका कांग्रेस नेतालाई के गर्ने भन्नेमा देउवा र इतर समूहको कुरा मिलेन

साउन २ गते बिहानसम्म भए पनि एजेन्डामा सहमति हुने आङ्देम्बे बताउँछन् । ‘अधिकतम समय दिएर बैठकको एजेन्डाका बारेमा पदाधिकारी बसेर एक रूप दिनेछन् । सबैको साझा एजेन्डा बनाएपछि पार्टीमा विवाद हुने कुरै भएन । साझा एजेन्डा भएपछि यो पक्ष त्यो पक्ष हुने कुरै भएन,’ सहमहामन्त्री आङ्देम्बेले भने ।

बैठकको मोटामोटी एजेन्डाहरूमा एक वर्ष केन्द्रीय समिति बैठक नबस्दा कार्यसम्पादन समितिले गरेका निर्णय अनुमोदन, नीति अधिवेशन, संगठनको कार्ययोजना, कार्यतालिका र समसामयिक राजनीतिक विषय, कांग्रेसका संगठनलाई चलायमान बनाउन राष्ट्रव्यापी अभियान चलाउने, चुनावी समीक्षाका साथै संघ र प्रदेश सरकारको कामको समीक्षा पनि बैठकमा हुनेछ ।

त्यतै, कांग्रेस प्रवक्तासमेत रहेका अर्थमन्त्री डा. प्रकाशशरण महतले ल्याएको बजेटमा रकम विनियोजन समानुपातिक ढंगले नभएको असन्तुष्टि पनि बैठकमा पोखिनेछ ।

एजेन्डाबाहेकका विषयमा पनि सबै केन्द्रीय सदस्यलाई समय दिएर कुरा राख्न दिने प्रचार विभाग प्रमुख मीन विश्वकर्माले जानकारी दिए । खाँणको विषयमा अदालतमा विचाराधीन विषय भएकाले शीर्ष नेतृत्वमा जिम्मेवारी दिइने उनले बताए ।

‘अदालतमा विचाराधीन विषयमा हामीले दोषी करार गरेर पार्टीको जिम्मेवारीबाट हटाउने भन्ने हुँदैन । मुद्दा प्रभावित पार्न हुँदैन । यसबारेमा शीर्ष नेतृत्वमा छलफल भइरहेको छ । यस विषयमा उहाँहरूले जे गर्नुहुन्छ, त्यही हुन्छ,’ विश्वकर्माले भने ।