शरणार्थी प्रकरणमा मुछिएका कांग्रेस नेतालाई के गर्ने भन्नेमा देउवा र इतर समूहको कुरा मिलेन

शरणार्थी प्रकरणमा मुछिएका कांग्रेस नेतालाई के गर्ने भन्नेमा देउवा र इतर समूहको कुरा मिलेन

A+ A A-

नक्कली भुटानी शरणार्थी प्रकरणमा कांग्रेसका नेताहरू बालकृष्ण खाँण र आङटावा शेर्पा अनुसन्धानमा रहँदा नाम जोडिएका अन्य नेताहरू तनावमा छन् ।

शरणार्थी प्रकरणमा सभापति शेरबहादुर देउवापत्नी आरजु राणा देउवा र खाँणपत्नी मञ्जु खाँणको नाम जोडेर सामाजिक सञ्जालहरूमा टिप्पणी भइरहेको छ । राणाले सञ्चारमाध्ययमदेखि संसदसम्म नक्कली अडियो टेप बनाएर आफ्नो चरित्रहत्या गर्न खोजिएको भन्दै आपत्ति जनाइरहँदा मञ्जु भने मोबाइल बन्द गरेर 'सम्पर्कविहीन' छिन् । राणा भने ‘मेरो संलग्नता छैन’ भन्दै आफूमाथि लागेका आरोपहरूको खण्डन गरिरहेकी छन् । उक्त अडियोबाहेक यो प्रकरणमा आरजुको नाम जोडिएको प्रमाण अहिलेसम्म नभेटिएको अधिकारीहरू बताउँछन् ।

पार्टीका प्रभावशाली नेताहरू हिरासतमा पुगेको र अन्य नेताहरूमाथि पनि विभिन्न कोणबाट प्रश्नहरू उठिसकेको भए पनि कांग्रेसले पार्टीको सर्वोच्च निकाय केन्द्रीय समितिको बैठक बोलाउन आवश्यक ठानेको छैन । विधानअनुसार दुई–दुई महिनामा बस्नुपर्ने केन्द्रीय समिति बैठक नौ महिनादेखि बस्न सकेको छैन । केन्द्रीय समितिको काम केन्द्रीय कार्यसम्पादन समितिबाट गरिँदै आएको छ ।

‘केन्द्रीय कार्यसमितिको बैठक प्रत्येक दुई महिनामा कम्तीमा एकपटक बस्नेछ,’ कांग्रेस विधानको परिच्छेद ७ को दफा २१ मा भनिएको छ ।

तर, पार्टी प्रवक्ता डा. प्रकाशशरण महत भने केन्द्री कार्यसम्पादन समितिले केन्द्रीय समितिको प्रतिनिधित्व गर्ने दाबी गर्छन् । ‘केन्द्रीय कार्यसम्पादन समितिको बैठक नियमित बसिरहेको छ । केन्द्रीय समिति बैठक नहुनुमा विविध कारणहरू छन्,' महत भन्छन्, 'कार्यसम्पादन समितिले पनि केन्द्रीय समितिको प्रतिनिधित्व गर्छ । केन्द्रीय समितिको बैठक बस्नुपर्छ ।’

मंगलबार पार्टी प्रवक्ताको हैसियतमा पत्रकार भेटघाट गरेका महतले पनि आरजु राणाको बचाउमा समय खर्चिए । सार्वजनिक भएको अडियो झुटो रहेकोमा आफूलाई विश्वास रहेको उनले बताए । अनि राणाको विषयमा मिडिया ट्रायल भइरहेको पनि दाबी गरे ।

‘आरजुको विषयलाई लिएर जहाँसम्म मिडिया, सामाजिक सञ्जालको ट्रायल भइरहेको छ । उहाँ आफैँले प्रतिरक्षा गरिरहनुभएको छ,’ महतले भने, ‘आफैँले साइबर ब्युरोमा गएर यो नक्कली कुरा हो, यसको अनुसन्धान हुनुपर्छ भनेर उहाँले भनिरहनुभएको छ ।'

आरजु आरोपित पनि नभएको भनेका महतले अडियोको प्रमाणिकता नै नरहेको जिकिर गरे । 'न उहाँ आरोपित हो । न त्यो अडियोको कुनै प्रमाणिकता छ । यत्तिकै अब यो सामाजिक सञ्जाल र मिडिया ट्रयालमै दोषी हो भन्नु त भएन नि,' महतले भने, 'यसमा पार्टीको गम्भीर ध्यानाकर्षण भएको छ । प्रमाणित नहुँदै दोषीजसरी प्रस्तुत गर्नु त राम्रो कुरा भएन नि । हामीलाई विश्वास छ, त्यो अडियो झुटो हो ।’

निलम्बनको पक्षमा इतर समूह

शरणार्थी प्रकरणमा प्रश्न उठेका कांग्रेस नेताहरूप्रति संस्थापनले नरम नीति अख्तियार गर्दा इतर समूह भने कडा रूपमा प्रस्तुत भइरहेको छ । यो प्रकरणमा पार्टीले ढाकछोप गर्न नहुने इतर समूहका नेता डा. शेखर कोइरालाले बताइसकेका छन् । पदाधिकारी बैठकमा आफू नभए पनि महामन्त्री थापासँग टेलिफोनमा कुरा भएको कोइरालाले बताए । कांग्रेसको परिस्थिति गम्भीर भइरहेको भन्न पनि छुटाएनन् ।

‘निलम्बनमै जाने कि हामी । क्लिन चिट भएपछि आइहाल्नुहुन्छ भनेको थिएँ,’ बुधबार एक कार्यक्रममा कोइरालाले भने, ‘हाम्रै साथीहरू शरणार्थीको मुद्दामा फस्नुभएको छ, फसाइएको छ । यसले नेपालीको शिर निहुरिएको छ ।'

उता, धुम्बाराहीस्थित देउवा निवासमा भएको पार्टी पदाधिकारी बैठकमा महामन्त्री गगन थापाले शरणार्थी प्रकरणमा पक्राउ परिसकेपछि खाँणलाई पार्टी जिम्मेवारीबाट अलग गर्नुपर्ने बताए । थापाले बुधबार पनि पार्टीमा आबद्ध कोहीमाथि भ्रष्टाचारलगायत केही आरोप लागेमा निलम्बन गर्ने र प्रमाणित भए जेल पठाइने बताए ।

‘शरणार्थी प्रकरणजस्ता विभिन्न प्रकरण आइरहेका छन् । हाम्रो पार्टीका नेता पनि मुछिएका छन् । निलम्बन गर्ने कि नगर्ने बहस चलिरहेको छ । आरोपितलाई निलम्बन गर्ने र अदालतबाट पुष्टि भएमा जेल पठाउने हो,’ बुधबार प्रजातान्त्रिक विचार समाजको १२औँ राष्ट्रिय महाधिवेशनमा थापाले भने, ‘यो प्रकरणमा अनुसन्धान जरैसम्म पुग्नुपर्छ । जो–जो मुछिन्छन्, उनीहरूलाई कारबाही गर्नुपर्छ ।’

देउवा मौन

इतर समूहका नेताहरूले आरोपितलाई निलम्बन गर्न एकपछि अर्को गर्दै दबाब दिइरहँदा पार्टी सभापति देउवा भने आरोप लाग्दैमा निलम्बन गर्ने परम्परा थिएन भन्दै पन्छिरहेका छन् । यसका लागि देउवाले आफूपक्षीय नेताहरूको साथ पनि पाएका छन् ।

खाँण पक्राउ परेपछि आफूलाई भेट्न आएका खाँणनिकट सांसदहरूलाई देउवाले यसबारे संसदमा नबोल्न सुझाए । ‘हामीले यसबारे संसदमा कसरी कुरा उठाउने भनेर सोध्यौँ, उहाँले केही बोल्नुपर्दैन भन्नुभयो,’ भेटमा सहभागी एक सांसदले शिलापत्रसँग भनिन् । मञ्जु सम्पर्कविहीन भएको भोलिपल्ट कान्तिका सेजुवाल, नागिनाकुमारी यादव, सीताकुमारी राना, रूपा विक, सुशीला थिङलगायत सांसदहरूले देउवालाई भेटेका थिए ।

शरणार्थीबारे नेतृत्वको मौनताका सम्बन्धमा प्रश्न उठिरहँदा प्रवक्ता महत भने देउवाको स्वभाव नै त्यस्तै रहेको बताउँछन् । तर, अनुसन्धानलाई देउवाले सघाइरहेको महतले दाबी गरे ।

‘सभापतिज्यू पहिलेदेखि कम बोल्ने स्वभावको हुनहुन्छ । अनुसन्धानलाई सघाइरहनुभएको छ,’ महतले भने । खाँणले आफू निर्दोष हुन्छु, प्रमाणित गर्छु भनेपछि पार्टी जिम्मेवारीबाट नहटाइएको महतको तर्क छ ।

केन्द्रीय समिति बैठकको माग

केन्द्रीय सदस्यहरूले केन्द्रीय समिति बैठकको माग गरेका छन् । ‘उहाँ (खाँण) लाई पार्टीले जिम्मेवारीमुक्त गर्ने भन्दा पनि आफैँले अनुसन्धानको समयसम्म पार्टी जिम्मेवारीबाट अलग भइदिनुभए हुन्थ्यो । त्यसैको प्रतीक्षा हो,' केन्द्रीय सदस्य अजयबाबु सिवाकोटीले शिलापत्रसँग भने, 'यथाशीघ्र केन्द्रीय समिति बैठक राखेर सबै विषयमा छलफल हुनुपर्छ ।’

अर्का केन्द्रीय सदस्य नैनसिंह महर पनि केन्द्रीय समिति बैठकमा सबै विषयमा छलफल हुनुपर्ने बताउँछन् । ‘पार्टीमा छलफल नहुँदा पार्टीबारे नकारात्मक धारणा बन्न झन् सजिलो भएको छ । पार्टी आलोचनाबाट मुक्त हुन पनि उठेका सबै विषयमा केन्द्रीय समिति बैठकम छलफल हुनुपर्छ,’ महरले भने ।

प्रकाशित मिति: बुधबार, जेठ ३, २०८० १९:०७